1 Tesalonika 1:1-10
1 Yange Paulu, njili hamo na Siuvenasi* na Timothi. Njili na kusonekela cikungulukilo ca baka-Tesalonika cije cinalikwatasana na Njambi Tate na Mwata Yesu Kristu ngwange:
Ngozi yakama na kwoloka bikale neni.
2 Simbu yoshe tukakandelela Njambi mutukamyaka mu malombelo etu mubaboshe,
3 mwafwa simbu yoshe tukanuka bipangi bimuli na kupanga mwafwa ya likulahelo lyeni na kufwitangana kweni mwafwa ya cizemo na kukolesa kweni mwafwa ya lilabelelo limuli nalyo muli Mwata wetu Yesu Kristu ku mesho a Njambi yetu na Tate yetu.
4 Eni bandolome babazema kuli Njambi, tuzibuka kumyangula kwamyangwile Njambi,
5 mwafwa muzimbu waubwa utuli na kwambulula kuwezile kuli yeni na majwi lika embwe, oloni wezile na nzili na sipilitu ya kujela na kukulahela manene, ngecilika mumuzibukila bifwa bitwamwesele mutwakele mukati keni mwafwa yeni.
6 Co mwatutembwininine na kutembwinina Mwata, mwafwa mwatambwile lijwi mu kubwahelela kuje kunemana ha sipilitu ya kujela, oku muli na kuyanda manene,
7 co mwapwile mwanja ku baka-kutaba boshe ba mu Masedonia na mu Akaya.
8 Lijwi lya Yehova keti likelyo lika linatundu kuli yeni na kuya mu Masedonia na mu Akaya, oloni na likulahelo lyeni linajalakana mu mitambela yoshe. Ngeci, yetu neci citunapande kwendeka bene cahi.
9 Mwafwa bakebo babenya bali na kutuleka mutwaliwanenene neni lwakulibanga, nomu mumwatengulukilile kuli Njambi kutunda ku kulemesa tumponya na kushangumuka kupangela Njambi wa kuyoya wa busunga,
10 na kubandamena Munendi kutunda mwilu uje yasangwile ku batsi, kulumbununa Yesu uje atwobola ku butenu buje buli na kwija.
Majwi a kwinikila
^ Ibasana lalo ngwabo Silasi.
