1 Tesalonika 4:1-18
4 Mukumanesa bandolome, ngwe mumwatambwile mashiko kuli yetu aje amwesa mumunapande kwendela mangana muzibise Njambi kubwaha, ngwe mumuli na kwendela hano, tumilomba na kumilambelela muli Mwata Yesu ngwetu mutwaleleleho kulinga manene ngoco.
2 Mwafwa muzibuka mashiko atwamyanene kwitila mu lizina lya Mwata Yesu.
3 Mwafwa eci cikeco cizango ca Njambi, ngwendi mupwe ba kujela na kujenjuka ku bupangala.*
4 Umo na umo weni napande kuzibuka mwakwendesela mubila* wendi mu kujela na mu kasingimiko,
5 keti na mashungu a kulilala a kutubakanesa aje aija mwafwa ya nuna, ngwe abali nawo baka-kaye baje kubazibuka Njambi.
6 Naumo wahi napande kutubakana ha seteko inapande na kulinga mwamubi ndolome yendi mu ñanda ei, mwafwa Yehova ana banu kashitiko mwafwa yebi byuma byoshe ngwe mutwabangele kumileka na kuminangula manene.
7 Mwafwa Njambi katusanene ngwendi tupwe ba mazilo, oloni ngwendi tupwe ba kujela.
8 Ngeci, munu ombwanesa ebi byuma, kesi na kwombwanesa munu, oloni ali na kwombwanesa Njambi, uje ali na kumyana sipilitu yendi ya kujela.
9 Oloni kutalesa ku cizemo ca kuzema bandolome, kutwapandele nawa kumisonekela, mwafwa Njambi namilongesa kulizema umo na mukwabo.
10 Muli na kulinga mwamubwa ku bandolome boshe ba mu Masedonia. Oloni bandolome, njimishongangeya ngwange mutwaleleleho kulinga manene ngoco.
11 Lingeni mwoshe mumwasela mangana mukale mu kwoloka, na kujeneka kulikobelesa mu biñanda byambala, na kupanga na maboko eni ngwe mutwamishikile,
12 mangana banu ba hanja bamone ngwabo muli na kwenda mwamubwa, co kumutondo cuma nambe cimo.
13 Co lalo bandolome kutushaka ngwetu mukale kunzimba* hali baje banalala tulo twa kutsa mangana keti muzibe busiwa ngwe buje bubakazibi banu baje kubesi na lilabelelo.
14 Mwafwa nga tunakulahela ngwetu Yesu watsile na kusanguka, co tunakulahela lalo ngwetu baje banalala tulo twa kutsa muli Yesu, Njambi akabanena hamolika nendi.
15 Mwafwa ebi bikebyo bitumileka kwitila mu lijwi lya Yehova ngwetu bamo betu baje bakayoya ha simbu ya kukalako kwa Mwata, kubakalibanga kulutwe lwa baje banalala tulo twa kutsa,
16 mwafwa Mwata babenya akasikumuka kutunda mwilu na lijwi lya kushika, lijwi lya kangelo wakama, na lupembo lwa Njambi, co baje banatsi mu kulikwatasana na Kristu bakalibanga kusanguka.
17 Kutundaho, bamo betu baje bakayoya ha simbu oyo, hamolika nabo, bakatutwala mu mashelwa, co tukaliwana na Mwata mu bukambwila, co tukakala hamo na Mwata simbu yoshe.
18 Ngeci, twaleleleniho kulizembeleka umo na mukwabo nawa majwi.
Majwi a kwinikila
^ Mu Cigriki por·nei′a. Taleni Majwi Abanalumbununa.
^ Lijwi na lijwi “cikwata.”
^ Nambe “mujeneke kuzibuka.”
