2 Tesalonika 2:1-17
2 Oloni bandolome, kutalesa ku kukalako kwa Mwata wetu Yesu Kristu na kutukungulwila hamo kuli ikeye, tumilomba ngwetu
2 keti mutabese bisinganyeka byeni babyungumune bwasi-bwasi, nambe kulijujukila mwafwa ya majwi a kuhwiminina,* nambe mwafwa ya muzimbu ubanendeka, nambe mwafwa ya mukanda uje usholoka ngwe utunda kuli yetu uje umwesa ngwawo litangwa lya Yehova linete.
3 Keti mutabese munu amyungumune* nambe kamandondo, mwafwa eli litangwa kulija tahi kubanga kutengulukila kunaija, na muka-kupokola mashiko banamusholola, uje wapwa muna kunyonga.
4 Wapwa muka-kulwisa, co ali na kulijundula ikeye babenya hakamwa ya cuma coshe cibasana ngwabo njambi nambe cuma ca kulemesa* mangana atumame mu tempele ya Njambi na kulimwesa ha kujela ngwendi napu njambi.
5 Kuma kumwanuka ngweni munjakele neni njakele na kumileka ebi byuma ndi?
6 Co hano muzibuka cuma cili na kumuzikila mangana bakamusholole ha simbu yendi inapande.
7 Cili bene, lihungu lya kupokola mashiko linashangumuka laja kupanga, oloni litwalelelaho lika kupwa lihungu kweta noho hakatundilako uje ali na kumuzikila.
8 Co muka-kupokola mashiko bakamusholola, uje yakatsiya Mwata Yesu na sipilitu ya mu kanwa kendi na kumunyongesa ha simbu ikukasholoka kukalako kwendi.
9 Oloni kukalako kwa muka-kupokola mashiko kuli na kulingiwa mu nzili ya Satana kwitila mu bipangi byoshe bya nzili na bizibukiso bya makuli na bikomokeso bya makuli
10 na makuli aje anemana ha bilinga byoshe bya kuhenga. Ali na kupangesa ebi bingila byoshe mu kukwisa baje banyonga kupwa kashitiko kabo, mwafwa kubatambwile busunga na kubuzema mangana base kubobola.
11 Mukemwo Njambi nabecelela ngwendi makuli abongumune mangana batabe makuli,
12 mangana boshe base kubasompa mwafwa kubatabele busunga, oloni bazemene byuma bya kuhenga.
13 Oloni simbu yoshe tukakandelela kuli Njambi mwafwa yeni, eni bandolome babazema kuli Yehova, mwafwa kushwa ku mashangumukilo Njambi wamyangwile ngwendi mukoboke. Walingile ngoco kwitila mu kumijelesa na sipilitu yendi, co lalo mwafwa mwakulahelele busunga.
14 Wamisanene ngwendi mwoboke kwitila mu muzimbu waubwa utuli na kwambulula mangana mukatambule bumpau bwa Mwata wetu Yesu Kristu.
15 Ngeci bandolome, imaneni mbe na kukakateya ku byuma bibamilongesele kwitila mu majwi a kwendeka nambe kwitila mu mikanda ya kutunda kuli yetu.
16 Co lalo Mwata wetu Yesu Kristu na Njambi Tate yetu uje watuzemene na kutwana kuzembeleka kwa myaka yoshe na lilabelelo lyalibwa kwitila mu ngozi yakama,
17 bazembeleke bimbunge byeni na kumikanyamesa* mu bilinga byoshe byabibwa na mu lijwi lyoshe lyalibwa.
Majwi a kwinikila
^ Nambe “mwafwa ya sipilitu.” Taleni Majwi Abanalumbununa, “Sipilitu.”
^ Nambe “amikokweye.”
^ Nambe “cibasingimika.”
^ Nambe “kumikolesa.”
