3 Iwano 1:1-14
1 Yange munalume wa kukola.* Njili na kusonekela yobe mukwetu Gayasi injazema manene.
2 Obe injazema, njilomba ngwange mu byuma byoshe utwaleleleho kukala mwamubwa na kulikangula ngwe hano muuli mwamubwa.
3 Mwafwa njabwahelelele manene omwo bandolome bezile na kwana bukaleho bwa busunga buunakwata omwo uli na kutwalelelaho kwenda mu busunga.
4 Kukwesi cuma cili na kunjizibisa manene kubwaha* kutubakana kuziba ngwabo bana bange bali na kutwalelelaho kwenda mu busunga.
5 Obe injazema, uli na kumwesa kulongwa kwobe mu byuma biuli na kulingila bandolome nameme kuubazibuka.
6 Banambulula bya cizemo cobe ku cikungulukilo. Mubakatuka, bakwase mu ngila ije izibisa Njambi kubwaha.
7 Mwafwa bakatukilile lizina lya Njambi, co kubambatele byuma ku banu ba ku mafuti.
8 Ngeci, tunapande kutambula banu ba cifweci mangana tupangele hamo nabo mu kukundwiya busunga.
9 Njasonekelele cikungulukilo byuma bimo, oloni Diotilefe uje washaka kupwa wakulibanga mukati kabo kesi na kutambula mu kasingimiko cuma ca kutunda kuli yetu.
10 Mukemwo nga njija okwo, njakutala byuma byali na kulinga omwo ali na kushandola biñanda bya makuli hali yetu.* Kasikisilile aha lika, oloni ali na kubyana lalo kutambula na bandolome mu kasingimiko, co baje bashaka ngwabo babatambule, ali na kushaka kubakibakiba na kubatundisa mu cikungulukilo.
11 Obe injazema, keti utembwinine byuma byabibi, oloni tembwinina byuma byabibwa. Uje alinga byuma byabibwa ali ku mutamba wa Njambi. Uje alinga byuma byabibi kazibuka Njambi.
12 Boshe bali na kwendeka byuma byabibwa hali Dimetriya, co na busunga nabwo bunamwesa ngoco. Cili bene netu bene tuli na kwana bukaleho bwabubwa hali ikeye, co muzibuka ngweni bukaleho butukana bwapwa bwa busunga.
13 Byabingi binjinashakele kukusonekela, oloni kunjishaka kutwalelelaho kubisoneka na peni na inki.
14 Njakulahela ngwange ololo tulimona, co twakwendeka mesho na mesho.
Kwoloka kukale nobe.
Babusamba bange banakumenekako. Njimenekeleko umo na umo wa babusamba bange.
Majwi a kwinikila
^ Nambe “mukulunu.”
^ Nambe hamo “cili na kunjilingisa njikandelele.”
^ Lijwi na lijwi “ali na kumbamba byuma bya makuli hali yetu.”
