Bilinga 1:1-26
1 Obe Teofilo, mu muzimbu wakulibanga, njakusonekelele byuma byoshe byashangumukile kulinga Yesu na bije byalongesele,
2 kweta na ha litangwa libamutwalele mwilu mwamanesele kwana mashiko kwitila mu sipilitu ya kujela ku tupositolo baje bangwile.
3 Munima ya kuyanda, walisholwele kuli bakebo na bukaleho bwabwingi bwa kushula oku ayoya. Bamumwene ha matangwa oshe 40, co wakele na kwendeka bya Bumwene bwa Njambi.
4 Mwaliwanene nabo, wabashikile ngwendi: “Keti mutunde mu Jelusalema, oloni twaleleleniho kubandamena byanamikulahesa Tate, bije bimunazibi kuli yange.
5 Mwafwa Iwano wambwitikile banu na mema, oloni yeni bamimbwitika na sipilitu ya kujela munima ya matangwa amandondo lika.”
6 Mubalikungulwile hamolika, bamwihwile ngwabo: “Mwata, wilwisa bumwene kuli Baisalele ha simbu ino ndi?”
7 Wabalekele ngwendi: “Kumwapandele kuzibuka bisimbu nambe myaka, byanalyangwila Tate mu nzili yendi.
8 Oloni mukatambula nzili omwo sipilitu ya kujela ikaija hali yeni, co mukapwa bakaleho bange mu Jelusalema na mu Judeya mwoshe na mu Samaliya na ku mitambela ya kulako ya lifuti-libu.”
9 Mwamanesele kwendeka ebi byuma, bamutwalele mwilu oku banatala, co lishelwa lyakumufwikile, ngeci kubamumwene lalo.
10 Simbu bacikele na kutala mwilu omwo wakele na kuya, kukasumuka banalume babali banazala bizalo bya kutoka banemana nabo.
11 Bendekele ngwabo: “Eni banalume ba ku Galileya, bika bimunemanena oku munatala mwilu? Ou Yesu ibanatundisa kuli yeni na kumutwala mwilu akaija mu cifwa cimolika ngwe mumunamumono mwanaila mwilu.”
12 Ngeci belukile ku Jelusalema kutunda ha munkinda ubasana ngwabo Munkinda wa Olive uje wakele kuyehi na Jelusalema, yapwile nunda ibatabesele kwenda ha litangwa lya sabata.*
13 Mubetele, baile mu mulili wa helu muje mubatulilile. Muje mu mulili mwakele Pita, Iwano, Jemusi na Andru, Filipu na Tomasi, Batolomeu na Mateu, Jemusi muna Afeyasi, na Simoni wa ntwima, na Judasi muna Jemusi.
14 Boshe batwaleleleleho kulombela oku bali na biyongola bimolika, hamolika na banakazi bamo na Maliya ina ya Yesu na bandolome ba Yesu.
15 Ha matangwa aje, Pita wemanene mukati ka bandolome (baje banu boshe betele ku 120), co wendekele ngwendi:
16 “Eni banalume, bandolome, kwapandelemo cisoneka cilishulisilile cije ciyapolofwetele sipilitu ya kujela kwitila muli Devidi hali Judasi uje watwamenenene baje bakutile Yesu.
17 Mwafwa wapwile umo wetu, co bamwangwile apange omu mu cipangi.
18 (Ou munalume ikeye walandele libu na fweto yawanene mu bilinga bya kuhenga, co wawile ca mutwe, lifu lyendi lyatubikile,* co byamwimo lyendi byoshe byacapulukile hanja.
19 Banu boshe batungile mu Jelusalema bazibukile ei ñanda, ngeci basanene lije libu mu ndaka yabo ngwabo Akedama, kulumbununa “Libu lya Maninga.”)
20 Mwafwa banasoneka mu mukanda wa Bisamu ngwabo, ‘Njibo yendi ipwe ya mupulungwa, keti mukale munu,’ co ‘Cipangi cendi ca kutwamenena bacipange ku munu weka.’
21 Ngeci, kunapande hali banalume baje bendele netu simbu yoshe omwo Mwata Yesu wapangele bipangi byendi* mukati ketu,
22 kushangumukila bene habamumbwitikilile kuli Iwano kweta na ku litangwa libamutundisile kuli yetu na kumutwala mwilu, hakati ka aba banalume hakale umo alikwatasana netu mu kwana bukaleho bwa kusanguka kwa Yesu.”
23 Ngeci bangwile banalume babali, Jozefu ibasanene ngwabo Basabasi uje lalo ibasanene ngwabo Justasi, mukwabo wapwile Matiyasi.
24 Co balombelele ngwabo: “Obe Yehova, yobe uzibuka bimbunge bya banu boshe, tumwese iunangula hali aba banalume babali
25 mangana ainge eci cipangi na bupositolo byanaseze Judasi na kuya mu ngila yendi babenya.”
26 Ngeci batele biñela hali bakebo, yawililile hali Matiyasi, co bamutandelele hali baje 11.*
Majwi a kwinikila
^ Nambe “nunda ya kukokela ku kilomita imo.”
^ Nambe “watabukile hakati.”
^ Lijwi na lijwi “wakobelele na kutuhuka.”
^ Nambe “bamumwene ngwe mubamwene baje 11.”
