Bilinga 12:1-25
12 Mu matangwa aje, mwene Heloda washangumukile kuyandesa bamo mu cikungulukilo.
2 Watsiile Jemusi ndolome ya Iwano na moko ya mukwale.
3 Heloda mwamwene ngwendi eci cuma cinazibisa Bajuda kubwaha, wakutile lalo na Pita. (Ebi byalingiwile ha matangwa a Cilika ca Makende a Kujeneka Musima.)*
4 Wamukwatele na kumwaka mu kamenga. Wamwanene ku bibunga biwana bya maswalale. Mu cibunga na cibunga mwakele maswalale bawana baje bakele na kumunyunga oku baliinga-inga luwana, mwafwa wayongwele kumunena* ku banu munima ya Paseka.
5 Ngeci, Pita bamunyungililile mu kamenga, oloni cikungulukilo cakele na kumulombelela manene kuli Njambi.
6 Heloda mwakele muyehi na kutuhwisa Pita, buje butsiki Pita walalele mukati ka maswalale babali oku banamukutu malyenge abali. Co ha cikolo hakele baka-kunyunga kamenga.
7 Haje bene kangelo ka Yehova wakwimanene kuje, co ceke catwililile mu mulili wa kamenga. Uje kangelo waningangele Pita ku bimati, wamwindwile na kumuleka ngwendi: “Katuka bwasi!” Co aje malyenge akele ku maboko endi awile.
8 Uje kangelo walekele Pita ngwendi: “Libwahesele na kuzala masanda obe.” Pita walingile bene ngoco. Kangelo walekele lalo Pita ngwendi: “Zala na cikobelo cobe ca helu, co utwaleleleho kunjikabangeya.”
9 Ngeci, Pita watuhukile hanja, co watwaleleleleho kumukabangeya. Oloni kazibukile ngwendi byuma byakele na kulinga uje kangelo byakele na kulingiwa bene. Ikeye wasinganyekele ngwendi ali na kumona cimona.
10 Mubatubakanene cibunga ca baka-kunyunga cakulibanga, neci camucibali, betele ha cikolo ca cikubo ca kutuhuka mu nganda, co calishokolokelele cikeco babenya mangana baite. Mubatuhukile hanja, baile hamo mu ngila, co haje bene kangelo wamusezele.
11 Pita mwanangukile byuma byakele na kulingiwa, wendekele ngwendi: “Hano njazibukoni ngwange cili bene Yehova natumine kangelo kendi, co nanjobola mu liboko lya Heloda na ku byuma byoshe bibanakele na kubandamena Bajuda ngwabo bilingiwa.”
12 Mwanangukile ngoco, waile ku njibo ya Maliya, ina ya Iwano uje ibasanene lalo ngwabo Maki, kuje kubakungulukilile bandongesi babangi na kulombela.
13 Pita mwatotele ha cikolo ca hanja, ngamba wa mumbanda wa lizina lya Roda, wezile na kutalako.
14 Mwazibile lijwi lya Pita, wabwahelelele manene ngeci kashokolwele na ku cikolo. Oloni washatukilile mukati na kukambulula ngwendi Pita nemana hanja ku cikolo.
15 Bamukumbulwile ngwabo: “Unazaluka.” Oloni ikeye wakakateyeye kubaleka ngwendi byakele na kwendeka bya busunga. Bakebo bendekele ngwabo: “Nga ngoconi, co kangelo kendi.”
16 Oloni Pita watwaleleleleho kwimana kuje oku atota. Mubashokolwele ku cikolo, bamumwene, co balikomokelele manene.
17 Oloni wabashobweyeye na liboko ngwendi boloke. Co wabalumbunwinine mu kushula mwanamutundisila Yehova mu kamenga. Wabalekele ngwendi: “Lekeni Jemusi na bandolome ebi byuma.” Ngeci watundile kuje, waile ku mutambela weka.
18 Mukwakile, maswalale bakele mu citanga cakama ha byuma byalingiwile kuli Pita.
19 Heloda watondatondele manene Pita, oloni mwonowele kumuwana, wehozwele baka-kunyunga, na kushika ngwendi babane kashitiko. Co watundile ku Judeya, waile ku Sezaliya, co kukekwo kwakakele ha simbu yailahako.
20 Heloda walubalelele* banu ba ku Tile na ba ku Sidoni. Ngeci, balizibasanene na kwija kuli ikeye. Co mubakokweyeye Blastasi, muka-kutala bya njibo ya mwene,* balombele ngwabo bakale nabo mu kwoloka, mwafwa lifuti lyabo lyakulahelele byakulya bya kutunda ku lifuti lya mwene Heloda.
21 Ha litangwa libangwile, Heloda wazalele cizalo cendi ca bumwene, co watumamene mu citwamo ca kusompela na kushangumuka kwendeka ku mbunga ya banu.
22 Co baje banu bakungulukile bashangumukile kutambeka ngwabo: “Eli linapu lijwi lya njambi, keti lya munu embwe!”
23 Haje bene kangelo ka Yehova wamutuminine mushongo, mwafwa kanene Njambi bumpau, co mabuno bamulile, co watsile.
24 Oloni lijwi lya Yehova lyatwaleleleleho kukola na kujalakana.
25 Omwo Banabasi na Saulu bamanesele cipangi cabo ca kutwala bukwasi mu Jelusalema, belukile ku Antioke, co belukile na Iwano uje ibasanene lalo ngwabo Maki.
Majwi a kwinikila
^ Nambe “Cimela.”
^ Nambe “kumunena mangana bamusompe.”
^ Nambe “washakele kulwisa.”
^ Lijwi na lijwi “mulili wa mwene wa kulala.”
