Bilinga 13:1-52
13 Mu cikungulukilo ca mu Antioke mwakele tupolofweto na balongesi. Mwakele Banabasi, Simyoni uje ibasanene ngwabo Wakuzibala,* Lushasi wa ku Sailini, Manane uje wakobelele hamo sikola na Heloda muka-kuyula mbongi, na Saulu.
2 Mubakele na kupangela Yehova na kulibindika kulya, sipilitu ya kujela yendekele ngwayo: “Njangwileni Banabasi na Saulu bapange cipangi cinjinabasanena.”
3 Mubamanesele kulibindika kulya na kulombela, babakambekele maboko, co babasuwile baye.
4 Ngeci, aba banalume bayatumine sipilitu ya kujela baile ku Selusha, co mubatundile kuje, baile ku Saiprasi na bwato.
5 Mubetele ku Salamisi, bashangumukile kwambulula lijwi lya Njambi mu masinagogi a Bajuda. Bakele na Iwano uje wakele na kubapangela.*
6 Mubetile mu liñanda lyoshe, baketele na ku Pafosi, co bawanene munalume wa Kajuda wa lizina lya Bar-Yesu, uje wapwile muka-kupanda, co lalo wapwile kapolofweto wa makuli.
7 Wakele hamo na ngubulu* Segiasi Paulasi, munalume wa mana. Ou munalume wasanene Banabasi na Saulu mwafwa washakele kuziba lijwi lya Njambi.
8 Oloni Elimasi muka-kupanda washangumukile kubalwisa mangana onowese ngubulu kukulahela Mwata. (Lizina lya Elimasi balinungulula ngwabo muka-kupanda)
9 Co Saulu uje ibasanene lalo ngwabo Paulu washulile na sipilitu ya kujela, wamutalele shwii,
10 na kwendeka ngwendi: “Obe munu wa kushula na muyati woshe wa makuli na muyati woshe wa bubi, muna Liyabolo, citozi ca byuma byoshe bya kusungama, kuma anga ciutanganesa bingila byabibwa bya Yehova ndi?
11 Tala! Liboko lya Yehova lili hali yobe, co upwa kapuputwa, kuumono litangwa ha simbu yakupwamo.” Haje bene mbundu na lisusulungu byamufwikile, co wapuputiiye noku-noku mangana awane amukwata ku liboko na kumutwamenena.
12 Ngubulu mwamwene byuma byalingiwile, watengulukile na kupwa muka-kutaba, mwafwa byuma byalilongesele hali Yehova byamukomokesele manene.
13 Co Paulu na bakwabo bajabukile na bwato kutunda ku Pafosi, baketele ku Pega mu Pamfilia. Oloni Iwano wabasezele, welukile ku Jelusalema.
14 Bakebo batwaleleleleho na bungenzi bwabo, batundile ku Pega bezile ku Antioke mu Pisidia. Bakobelele mu sinagogi ha litangwa lya Sabata, co batumamene.
15 Munima ya kutandela ku mbunga Lishiko na Bisoneka bya Tupolofweto, baka-kutwamenena mu sinagogi babatuminine lijwi ngwabo: “Eni banalume, bandolome, nga muli na majwi a kutakamesa banu, endekeni.”
16 Ngeci, Paulu wemanene, wabashobweyeye na liboko lyendi mangana boloke, co wendekele ngwendi:
“Eni banalume, eni Baisalele, neni bakwetu muli na kuzibila Njambi lyoba, tolililleni.
17 Njambi yaba banu Baisalele, wangwile bakukulwila betu, co wabajundwile ha simbu ibapwile baka-kwija mu Ijipiti na kubatundisamo na liboko lya nzili.
18 Ha myaka ya kweta ku 40, Njambi wabecelelele balinge mwoshe mubashakelele mu mambo.
19 Munima ya kunyongesa miyati 7 mu lifuti lya Kanana, wabanenelyo kupwa buswana bwabo.
20 Ebi byuma byoshe byalingiwile mu myaka ya kweta ku 450.
“Munima yebi, Njambi wabanene mako kwa kweta na kuli kapolofweto Samwele.
21 Oloni kukapwa muje, balilombelele mwene, co Njambi wabanene Saulu muna Kishi, munalume wa ku muyati wa Benjamini uje wabayulile ha myaka 40.
22 Mwamutundisileho, wabangwilile Devidi kupwa mwene uje yanene bukaleho hali ikeye ngwendi: ‘Njinawana Devidi muna Jesi, munalume uje nanjii ku mbunge. Ou ikeye akalinga byuma byoshe binjashaka.’
23 Kwesekesa na cikulaheso cendi, Njambi nana Isalele mwobole, Yesu, uje natundu ku bana* bou munalume.
24 Simbu kanda ou mwobole aije, Iwano wambulwile ku mbunga ya banu ba Isalele boshe bya cimbwitiko cije cinapu cimweso ca kutenguluka.
25 Oloni Iwano mwakele na kumanesa cipangi cendi wakele na kwendeka ngwendi: ‘Musinganyeka ngweni yange iya? Keti yange imuli na kubandamena. Oloni taleni! Kuli umo ali na kwija munima yange uje kunjafwililile kuzitula miba ya masanda a ku mendi endi.’
26 “Eni banalume, bandolome, eni batekulwila ba mu naanga ya Abrahamu na baje bali mukati keni, baje bali na kuzibila Njambi lyoba, lijwi lyoku kwoboka banalitumu kuli yetu.
27 Mwafwa banu baje batungile mu Jelusalema na baka-kubayula kubamuzibukile, oloni mubamusompele, bashulisilile byuma bibendekele mu Bisoneka bya Tupolofweto, bije bibakatanda mu kutambeka ha sabata na sabata.
28 Nameme kubawanene mulonga wa kumutsiila, oloni basindiiye Pilato ngwabo amutsiye.
29 Mubashulisilile byuma byoshe bibasonekele hali ikeye, bamutundisile ha citi, co bamwakele mu mbumbo.
30 Oloni Njambi wamusangwile ku batsi.
31 Co ha matangwa amangi, washolokele kuli baje batundile nendi ku Galileya na kuya nendi ku Jelusalema. Aba bakebo banapwoni bakaleho bendi ku banu.
32 “Ngeci, tuli na kumyambulwila muzimbu waubwa wa cikulaheso cakulahesele Njambi kuli bakukulwila betu.
33 Njambi nashulisilila mwamubwa eci cikulaheso kuli yetu bana babo ha kusangula Yesu, ngwe mubanasoneka mu samu yamucibali ngwabo: ‘Yobe u munange, lelo njinapu nji isho.’
34 Eci kumusangula ku batsi mangana keti abole, Njambi wacendekele ngwendi: ‘Njikamyana majwi a cizemo cije kucesi kutenguluka anjakulahesele Devidi, majwi aje anapu a kulongwa.’*
35 Mu samu ikwabo lalo banendeka ngwabo: ‘Kuukecela ngamba yobe uje akamwesa kulongwa cije kucesi kutenguluka abole.’
36 Oloni Devidi wapangelele Njambi mu simbu yendi, co walalele tulo twa kutsa. Ngeci bamwakele hamo na bakukulwila bendi, co wabolele.
37 Oloni uje yasangwile Njambi* kabolele.
38 “Ngeci bandolome zibukeni ngweni, kwitila muli ou, tuli na kumyambulwila bya kukonekela kwa bubi.
39 Kwesekesa na Lishiko lya Mosesa kumwasele kupwa ba kujeneka mulonga mu byuma byoshe. Oloni kwitila muli ou, woshe ataba apwa wa kujeneka mulonga.
40 Ngeci, nyanyameni mangana bibanendeka mu Bisoneka bya Tupolofweto keti bije hali yeni, bibanendeka ngwabo:
41 ‘Taleni eni baka-kushendumuna, kasameni, co nyongeni, mwafwa njili na kupanga cipangi mu matangwa eni, cipangi cije kumwasa kutaba nambe munu amilumbunwineco bati mu kushula.’”
42 Co mubakele na kutuhuka, banu babalambelele ngwabo bakwendeke ebi biñanda na ha Sabata inatako.
43 Ciwano ca mu sinagogi mucahwile, Bajuda babangi na baproselite baje balemesele Njambi, bakabangeyeye Paulu na Banabasi. Co Paulu na Banabasi mubakele na kwendeka naba banu, babashongangeyeye ngwabo batwaleleleho kukala mu ngozi yakama ya Njambi.
44 Co ha Sabata yateleko, kwasalele lika banu babandondo mu nganda, banu boshe balikungulwile hamo mangana batolilile ku lijwi lya Yehova.
45 Bajuda mubamwene mbunga ya banu, bazibile manene cipululu, co bashangumukile kubyana na likamba byuma byakele na kwendeka Paulu.
46 Co Paulu na Banabasi babalekele mu kusimpa ngwabo: “Kwapandelemo lijwi lya Njambi balibange kulyendeka kuli yeni. Oloni ha kuwana ngwe muli na kulibyana, co lalo yeni babenya munalimono ngweni kuyoya kwa myaka yoshe kukwamifwililile, mukemwo tutengulukila kuli baka-mafuti.
47 Mwafwa Yehova natushiki na majwi awa ngwendi: ‘Njakwangula upwe ceke ca baka-mafuti, mangana wambulule bya kwoboka kweta na kushongo ya lifuti-libu.’”
48 Baje baka-mafuti mubazibile ngoco, bashangumukile kubwahelela na kwana bumpau lijwi lya Yehova, co boshe ba bimbunge byabibwa bya kushaka kuyoya myaka yoshe batengulukile na kupwa baka-kutaba.
49 Kutundaho lalo, lijwi lya Yehova lyakele na kujalakana mu lifuti lyoshe.
50 Oloni Bajuda bashongangeyeye banakazi ba kutsimana baje bazibilile Njambi lyoba na banalume ba bulemu ba muje mu nganda, co bashangumukile kuyandesa Paulu na Banabasi na kubashekela hanja ya binginga byabo.
51 Ngeci, Paulu na Banabasi babatotomwenene likungu lya ku mendi abo, co baile ku Ikoniamu.
52 Co bandongesi batwaleleleleho kubwahelela manene na kushula na sipilitu ya kujela.
Majwi a kwinikila
^ Lijwi na lijwi “Naiga.”
^ Nambe “kubakwasa.”
^ Ngubulu wa Kaloma uje wakele na kutwamenena provinsi.
^ Lijwi na lijwi “mbuto.”
^ Nambe “a busunga; abasa kukulahela.”
^ Nambe “uje walingile cizango ca Njambi.”
