Bilinga 14:1-28
14 Paulu na Banabasi mubetele mu Ikoniamu, bakobelele hamo mu sinagogi ya Bajuda, co bendekele mu ngila ije yalingisile mbunga yakama ya Bajuda nei ya Bagriki batenguluke na kupwa baka-kutaba.
2 Oloni Bajuda baje kubatabele, bashongangeyeye banu* ba ku mafuti na kubalingisa balwise bandolome.
3 Ngeci, Paulu na Banabasi bambatele simbu yailaha oku bendeka mu kusimpa mu nzili ya Yehova uje wabapangesele balinge bizibukiso na bikomokeso* mu kumwesa bukaleho bwa majwi a ngozi yendi yakama.
4 Nameme ngoco, mbunga ya banu ba muje mu nganda balyangunwine. Bamo bakele ku mutamba wa Bajuda, bakwabo bakele ku mutamba wa tupositolo.
5 Banu ba ku mafuti na Bajuda na baka-kubayula, mubashakele kushaula Paulu na Banabasi, na kubasha mamanya,
6 banu babanangwile, ngeci batewelele ku binganda bya Likoniya, Listra na Debe na ku membo ateleko.
7 Co batwaleleleleho kwambulula muzimbu waubwa kuje.
8 Mu Listra mwakele munalume umo uje wapwile ciyanga ca mendi uje watumamene lika. Ou munalume wasemukile ciyanga, co kendeleho.
9 Ou munalume wakele na kutolilila Paulu mwakele na kwendeka. Paulu watalele ou munalume shwii. Co mwamwene ngwendi ali na likulahelo lya kwasa kukanguka,
10 wendekele na lijwi lya kutaluka ngwendi: “Katuka wimane.” Uje munalume watumbukile na kushangumuka kwenda.
11 Mbunga ya banu mubamwene cuma calingile Paulu, batambekele mu ndaka ya Likoniya ngwabo: “Binjambi banapu ngwe banu, co banaija kuli yetu!”
12 Co bashangumukile kusana Banabasi ngwabo Zeusi, oloni Paulu ngwabo Hemesi, mwafwa ikeye wakele na kwendeka manene.
13 Co kapilistu ka Zeusi, uje tempele yendi yakele ku bukobelelo bwa nganda, wanenele bingombe ba nkomba na bintemo ku bikolo, co washakele ngwendi ikeye na ije mbunga ya banu benyeke milambu.
14 Oloni kapositolo Banabasi na kapositolo Paulu mubazibile ngoco, batabwile bizalo byabo na kushatukila mu mbunga, co batambekele ngwabo:
15 “Eni banalume, bika bimuli na kulingila ebi byuma? Netu tu banu bali na buzeye ngeci mweni. Co tuli na kumyambulwila muzimbu waubwa mangana mwecele ebi byuma byabibi, mutengulukile kuli Njambi wa kuyoya uje watangele lilu na lifuti-libu na kalunga-ndonga na byuma byoshe byakalamo.
16 Mu bisemwa bya kunima, watabesele baka-mafuti boshe balyendele mu bingila byabo.
17 Nameme ngoco, wanene bukaleho mu byuma byabibwa byalingile. Wamyanene nyonzi kutunda mwilu, na bisimbu bya kwima bushuka, na kumikutisa na byakulya, na kushulisa bimbunge byeni na kubwahelela.”
18 Nameme bakele na kwendeka ebi byuma, oloni kwasalele lika kamandondo ngwabo mbunga ya banu babenyekele milambu.
19 Oloni Bajuda bezile kutunda ku Antioke na ku Ikoniamu. Co bakokweyeye mbunga ya banu, ngeci bashele Paulu mamanya na kumukokela hanja ya nganda, mwafwa basinganyekele ngwabo natsi.
20 Oloni bandongesi mubamuzengelekele, wendukile na kwiluka lalo mu nganda. Lyamukwabo, waile na Banabasi ku Debe.
21 Mubamanesele kwambulula muzimbu waubwa muje mu nganda, na kupwisa banu babangi bandongesi, belukile ku Listra na ku Ikoniamu na ku Antioke.
22 Co kuje, batakamesele bandongesi,* babashongangeyeye bakolese mu likulahelo na kubaleka ngwabo: “Tunapande kwita mu tuyando twatwingi simbu kanda tukobele mu Bumwene bwa Njambi.”
23 Co lalo babangwilile bakulunu mu cikungulukilo na cikungulukilo, balombelele na kulibindika kulya, co babakundikile kuli Yehova uje ibakulahelele.
24 Co betile mu Pisidia na kwija mu Pamfilia.
25 Mubamanesele kwambulula lijwi mu Pega, baile ku Ataliya.
26 Mubatundile kuje, baile ku Antioke na bwato, kuje Njambi wabamwesele ngozi yendi yakama mwafwa ya cipangi cije cibamanesele oni.
27 Mubetele ku Antioke, bakungulwile hamo cikungulukilo, co babalekele byuma byabingi byalingile Njambi kwitila muli bakebo, nomu mwashokolwelelemo baka-mafuti cikolo ca likulahelo.
28 Ngeci, bakele na baje bandongesi simbu yailaha.
