Bilinga 15:1-41
15 Banalume bamo bezile kutunda ku Judeya bashangumukile kulongesa bandolome ngwabo: “Kubanga muye ku mukanda kwesekesa na lishiko lya Mosesa, keti ngoconi kumwoboka.”
2 Oloni Paulu na Banabasi mubalingile nabo bimata na kulipyakana nabo, bandolome bangwile Paulu na Banabasi na bamo babo batwale ei ñanda* ku tupositolo na bakulunu mu Jelusalema.
3 Co cikungulukilo mucabasindikiiyeko kabungenzi, aba banalume batwaleleleleho na bungenzi bwabo. Betile mu Fonisha na mu Samaliya oku balumbununa mu kushula mubatengulukililemo banu ba ku mafuti, co bazibisile manene kubwaha bandolome boshe.
4 Mubetele mu Jelusalema, cikungulukilo na tupositolo na bakulunu babatambwile mwamubwa, co babalumbunwinine byuma byabingi byalingile Njambi kwitila muli bakebo.
5 Oloni bamo ba mu kacibunga ka kulimanena ka Bafalisi baje bapwile oni baka-kutaba, bakatukile mu bitwamo byabo na kwendeka ngwabo: “Kunapande kubatwala ku mukanda na kubashika banyunge Lishiko lya Mosesa.”
6 Ngeci, tupositolo na bakulunu balikungulwile hamo mangana batale ei ñanda.
7 Mubasimutwiiye manene* ha ñanda* ei, Pita wakatukile na kubaleka ngwendi: “Eni banalume, bandolome, muzibuka mwamubwa ngweni kutunda ku matangwa a kunima, Njambi wanjangwile mukati keni mangana kwitila mu kanwa kange banu ba ku mafuti bazibe lijwi lya muzimbu waubwa, co batabe.
8 Njambi uje azibuka mbunge, wanene bukaleho ha kubana sipilitu ya kujela ngwe mwayanene kuli yetu.
9 Co kamwesele kuliseza mukati ketu nabo, oloni wajelesele bimbunge byabo mwafwa ya likulahelo lyabo.
10 Mwafwa bikajo muli na kwesekela Njambi ha kukulika joko ha binsingo bya bandongesi, joko ije kubasele kwambata bakukulwila betu nambe yetu?
11 Oloni yetu tunakulahela ngwetu batwobola kwitila mu ngozi yakama ya Mwata Yesu, ngwe mubanakulahela na bakebo ngwabo boboka.”
12 Ngeci cije cibunga coshe colokele kulu, co bashangumukile kutolilila Banabasi na Paulu mubakele na kwendeka bizibukiso byabingi na bikomokeso* byalingile Njambi kuli baka-mafuti kwitila muli bakebo.
13 Mubamanesele kwendeka, Jemusi wakumbulwile ngwendi: “Eni banalume, bandolome, njitolilileni.
14 Simyoni* natulumbunwina mwamubwa omwo Njambi watengulukililemo kuli baka-mafuti lwakulibanga, na kwambatako banu babasanesa lizina lyendi.
15 Co ebi binalitombola na majwi a mu Bisoneka bya Tupolofweto ngwe mubanasoneka ngwabo:
16 ‘Munima yebi byuma, njikeluka na kwindula lalo tenti* ya Devidi ije inau. Njikatungulula bije binabihya na kuilwisa ngwe muje muyafwile,
17 mangana banu baje basalako batonde manene Yehova, hamolika na banu ba ku mafuti oshe, banu baje babasanesa lizina lyange, ngwendi Yehova uje ali na kulinga ebi byuma,
18 byuma bije bibazibuka kushwa kusañulu.’
19 Ngeci, yange njinamono* ngwange keti tupakese baka-mafuti baje bali na kutengulukila kuli Njambi.
20 Oloni tubasonekeleni ngwetu bajenjuke ku byuma bije binajwala na tumponya na ku bupangala* na ku byuma bya kutikinya* na ku maninga.
21 Mwafwa kushwa kusañulu, bisoneka bya Mosesa banabyambulula mu nganda na nganda, mwafwa bali na kubitanda mu kutambeka mu sinagogi ha sabata na sabata.”
22 Ngeci, tupositolo na bakulunu hamolika na cikungulukilo coshe, bayongwele kutuma banalume bamo babangwile mukati kabo baye ku Antioke na Paulu na Banabasi. Batumine Judasi uje ibasanene ngwabo Basabasi, na Silasi, banalume baje bakele na kutwamenena mukati ka bandolome.
23 Babasonekelele ou mukanda na kuutuma hamo nabo ngwabo:
“Yetu bandolome beni, tupositolo hamolika na bakulunu. Tuli na kusonekela yeni bandolome ba ku mafuti yeni muli mu Antioke, mu Siria na mu Silisha ngwetu: Twamimeneka!
24 Tunazibi ngwabo banu bamo mukati ketu banaija na kumipakesa na byuma bibanendeka mu kushaka kumyungumuna,* nameme yetu nacimo cahi citunabashiki.
25 Ngeci, tubaboshe tunalizibasana ngwetu twangule banalume na kubatuma kuli yeni hamolika na banalume batwazema, ba Banabasi na Paulu,
26 banalume baje banana myonyo yabo,* mwafwa ya lizina lya Mwata wetu Yesu Kristu.
27 Ngeci, tuli na kutuma Judasi na Silasi mangana nabo bakumileke byuma bya kulifwa mu tunwa twabo.
28 Mwafwa sipilitu ya kujela hamolika netu, tunamono ngwetu kutwapandele kumibwezelela ku citele, kubanga lika ebi byuma binapande:
29 mutwaleleleho kujenjuka ku byuma bibanana ku tumponya na ku maninga na ku byuma bya kutikinya* na ku bupangala.* Nga munyunga mwamubwa ebi byuma, co byuma bimyendela bwino. Mukale mwamubwa!”*
30 Ngeci, aba banalume mubabasuwile, baile ku Antioke, co bakakungulwile hamo cibunga coshe na kubana mukanda.
31 Mubamanesele kuutanda, babwahelelele mwafwa ya majwi aje a kutakamesa.
32 Ha kuwana ngwe Judasi na Silasi nabo bapwile tupolofweto, bashongangeyeye bandolome na biñanda byabingi na kubatakamesa.
33 Munima ya kutumama kasimbu kakandondo kuje, bandolome babasuwile mu kwoloka beluke kuli baje babatumine.
34 ——
35 Oloni Paulu na Banabasi basalele mu Antioke oku bali na kulongesa banu na kwambulula muzimbu waubwa wa lijwi lya Yehova, hamolika na bakwabo babangi.
36 Mukwetile matangwa amo, Paulu walekele Banabasi ngwendi: “Twiluke oni* twendele bandolome mu nganda na nganda muje mutwambulwile lijwi lya Yehova tukamone mubali na kuyoyela.”
37 Banabasi washakele kuya na Iwano ibasanene ngwabo Maki.
38 Oloni Paulu kashakele ngwendi Iwano aye nabo, mwafwa wabasezele mu Pamfilia, co kaile nabo mu cipangi.
39 Co balingile manene bimata, ngeci balitepele. Banabasi wambatele Maki na kuya nendi ku Saiprasi.
40 Paulu wangwile Silasi, co bandolome mubamanesele kukundika Paulu mu maboko a Yehova mangana amusholwele ngozi yendi yakama, wakatukile na kuya.
41 Wetile mu Siria na mu Silisha oku atakamesa bikungulukilo.
Majwi a kwinikila
^ Nambe “ñanda ibakele na kulibyanangana.”
^ Nambe “mubalingile manene bimata.”
^ Nambe “ñanda ibakele na kulibyanangana.”
^ Nambe “bimweso.”
^ Ei inapu ngila ikwabo yakusonekelamo lizina lya Simoni (Pita).
^ Nambe “lipapela; njibo.”
^ Nambe “njinayongola.”
^ Mu Cigriki por·nei’a. Taleni Majwi Abanalumbununa.
^ Nambe “bibanatsii kwa kujeneka kwitila maninga abyo.”
^ Nambe “kungumuna myonyo yeni.”
^ Nambe “kuyoya kwabo.”
^ Nambe “bibanatsii kwa kujeneka kwitila maninga abyo.”
^ Mu Cigriki por·nei’a. Taleni Majwi Abanalumbununa.
^ Nambe “Mitende yeni.”
^ Nambe hamo “Tulinge mwoshe mutwasela.”
