Bilinga 18:1-28
18 Munima yebi, Paulu watundile mu Atena, co wezile mu Korinte.
2 Co wawanene Kajuda wa lizina lya Akwila, uje wasemukilile mu Pontasi. Ou Kajuda te mu kwija kutunda ku Itali na munakazi wendi Prisila, mwafwa Kulodiasi washikile ngwendi Bajuda boshe batunde mu Loma. Ngeci, Paulu waile kuli bakebo.
3 Ha kuwana ngwe wakele na kupanga cipangi ca kulifwa neci cabo, Paulu waile ku njibo yabo, co wakapangele hamo nabo, mwafwa nabo bapwile baka-kupanga bitenti.
4 Ha sabata na sabata, wakele na kwendeka ñanda* mu sinagogi, co wakele na kukokweya Bajuda na Bagriki.
5 Silasi na Timothi mubetele kutunda ku Masedonia, Paulu washangumukile kwambulula manene lijwi, wakele na kwana bukaleho ku Bajuda na kusholola ngwendi Yesu ikeye Kristu.
6 Oloni mubatwaleleleleho kumulwisa na kumwendeka mwamubi, watotomwene bizalo byendi, co wabalekele ngwendi: “Maninga eni akale ha mitwe yeni. Yange njinajele. Kutunda hano, njiya ku banu ba ku mafuti.”
7 Co watundile kuje,* waile mu njibo ya munalume wa lizina lya Tishasi Justasi, uje wapwile muka-kulemesa Njambi, njibo yendi yalyatele na sinagogi.
8 Nameme ngoco, Krispasi uje wakele na kutwamenena mu sinagogi, watabele muli Mwata, hamolika na bakunjibo yendi boshe. Co baka-Korinte babangi baje bazibile muzimbu waubwa bashangumukile kutaba, co babambwitikile.
9 Co lalo Mwata walekele Paulu mu cimona ku butsiki ngwendi: “Keti uzibe lyoba, oloni twalelelaho kwendeka, co keti woloke,
10 mwafwa njili nobe, co naumo wahi akubulumuna. Mwafwa njili na banu babangi omu mu nganda.”
11 Ngeci, Paulu wakele kuje mwaka umo na bingonde 6 oku alongesa lijwi lya Njambi mukati kabo.
12 Galio mwapwile ngubulu* wa Akaya, Bajuda balikungulwile hamo na kulwisa Paulu, co bamutwalele ku citwamo ca kusompela.
13 Bendekele ngwabo: “Ou munalume ali na kukokweya banu balemese Njambi mu ngila ije ililwisa na lishiko.”
14 Oloni Paulu mwashakele kwendeka, Galio walekele Bajuda ngwendi: “Eni Bajuda, ngwe cili bene ou munalume nalingile bubi nambe mulonga wakama ngwe njinamitolilila mwamubwa.
15 Oloni nga muli na kulinga bimata ha majwi na ha mazina na ha lishiko lyeni, co bitaleni yeni babenya. Yange kunjishaka kupwa lyako webi byuma.”
16 Ngeci wabashekele ku citwamo ca kusompela.
17 Co boshe bakwatele Sosteni, muka-kutwamenena mu sinagogi, bashangumukile kumupupila halutwe lwa citwamo ca kusompela, oloni Galio kalikobelesele omu mu byuma nambe kamandondo.
18 Paulu mwakele kuje ha matangwa amangi, wasalesele bandolome, co waile na bwato ku Siria, waile na Prisila na Akwila. Co mwakele mu Senkeliya wakambele binkambu byendi, mwafwa walingile cikumiiyo.
19 Ngeci betele ku Efeso, co wabasezele kuje. Oloni ikeye wakobelele mu sinagogi na kusimutwiya na Bajuda.
20 Nameme batwaleleleleho kumulomba ngwabo akale nabo simbu yailaha, ikeye katabele,
21 oloni wabasalesele na kubaleka ngwendi: “Nga Yehova ashaka, njikeluka lalo kuli yeni.” Co watundile ku Efeso na bwato
22 na kwija ku Sezaliya. Co waile* na kukameneka cikungulukilo, kutundaho, waile ku Antioke.
23 Paulu wakele kuje simbu yailahako, co watundileko, waile ku mitambela ya kuliseza-seza mu lifuti lya Galatiya na Filigiya mu kutakamesa bandongesi boshe.
24 Co Kajuda wa lizina lya Apolo, uje wasemukilile mu Alekizandriya, wezile mu Efeso. Wapwile muka-kwendeka wamubwa, co wazibukile manene Bisoneka.
25 Ou munalume bamulongesele* ngila ya Yehova, co wakele na ntwima ya sipilitu, wakele na kwendeka na kulongesa bya Yesu mu kusungama, oloni wazibukile lika bya cimbwitiko ca Iwano.
26 Co washangumukile kwendeka mu kusimpa mu sinagogi, co Prisila na Akwila mubamuzibile, bamwambatele na kuya nendi, bakamulumbunwinine mu kusungama ngila ya Njambi.
27 Ha kuwana ngwe Apolo washakele kuya musambwa lya Akaya, bandolome basonekelele bandongesi, babashongangeyeye ngwabo bamutambule mwamubwa. Mwetele kuje, wakwasele manene baje batengulukile na kupwa baka-kutaba kwitila mu ngozi ya Njambi,
28 mwafwa wakele na kusholola bene ku mbunga ngwendi Bajuda banalimbenje, oku abamwesa mu Bisoneka ngwendi Yesu ikeye Kristu.
Majwi a kwinikila
^ Nambe “kusimutwiya nabo.”
^ Kulumbununa, ku sinagogi.
^ Ngubulu wa Kaloma uje wakele na kutwamenena provinsi.
^ Hamo ku Jelusalema.
^ Nambe “bamulongesele na kanwa.”
