Bilinga 19:1-41
19 Mubyakele na kulingiwa ebi byuma, omwo Apolo wacikele mu Korinte, Paulu wetile mu mitambela ije yakele kulako na kalunga-ndonga, co wezile mu Efeso. Wawanenemo bandongesi bamo,
2 co wabehwile ngwendi: “Kuma mwatambwile sipilitu ya kujela mumwatengulukile na kupwa baka-kutaba ndi?” Bamukumbulwile ngwabo: “Yetu kanda tuzibeho ngwabo kwakala sipilitu ya kujela.”
3 Ngeci, wabehwile ngwendi: “Indi bamimbwitikile na cimbwitiko muka?” Bamukumbulwile ngwabo: “Na cimbwitiko ca Iwano.”
4 Paulu wendekele ngwendi: “Iwano wambwitikile na cimbwitiko cije cinapu cimweso ca kutenguluka, na kuleka banu ngwendi batabe muli uje aija munima yendi, kulumbununa muli Yesu.”
5 Mubazibile ngoco, babambwitikile mu lizina lya Mwata Yesu.
6 Co Paulu mwabakambekele maboko, sipilitu ya kujela yezile hali bakebo, co bashangumukile kwendeka mu bindaka byeka na kupolofweta.
7 Boshe bapwile banalume ba kweta ku 12.
8 Co ha bingonde bitatu, Paulu wakele na kukobela mu sinagogi na kwendeka mu kusimpa, na kwendeka biñanda na kusimutwiya bya Bumwene bwa Njambi mu ngila ya kubakokweya.
9 Oloni bamo babyanene kutaba mwafwa bakaluwisile bimbunge byabo, na kwendeka mwamubi Ngila ya Mwata hakati ka mbunga. Ngeci, Paulu wabasezele na kwangununa bandongesi kuli bakebo. Co ha litangwa na litangwa wendekele biñanda mu mutungo wa kukungulukila wa ha sikola ya Tilanu.
10 Eci calingiwile ha myaka ibali, ngeci Bajuda na Bagriki boshe baje bakele mu provinsi ya Asia bazibile lijwi lya Mwata.
11 Njambi watwaleleleleho kupanga bipangi bya nzili kwitila muli Paulu.
12 Ngeci, nameme binanga na maaproni bije byapangesele Paulu mubabitwalele kuli baka-kubinja, bakangukile ku mishongo yabo, co na basipilitu bababi batundile.
13 Oloni Bajuda bamo baje bakele na kwendangana oku batundisa badimona, nabo besekele kupangesa lizina lya Mwata Yesu kuli baje bakele na basipilitu bababi. Bakele na kwendeka ngwabo: “Njikushika mu lizina lya Yesu uje yali na kwambulula Paulu.”
14 Co kwakele bana ba banalume 7 ba kapilistu wakama wa Kajuda wa lizina lya Skeva, nabo bakele na kulinga ngoco.
15 Oloni sipilitu wamubi wabalekele ngwendi: “Yesu njimuzibuka, co na Paulu lalo njimutanekeya. Indi yeni yeni beya?”
16 Co uje munalume wakele na sipilitu wamubi, wabajombokelele. Boshe wabahyanene, watundile hali ou kuya hali ou, ngeci batewele muje mu njibo mutotototo oku banabulumuka.
17 Bajuda na Bagriki baje bakele mu Efeso boshe bazibile ebi byuma, co boshe bazibile lyoba. Ngeci, lizina lya Mwata Yesu batwaleleleleho kulizumbangeya.
18 Co banu babangi baje batengulukile na kupwa baka-kutaba, bakele na kwija na kulitabela bilinga byabo na kubyendeka kwa kujeneka kushweka.
19 Co banu babangi baje bakele na kulinga manseno banenele mabulu abo, bawalundikile hamo na kuwenyekela ku mesho a banu boshe. Batotalesele ndando yawa mabulu, co bawanene ngwabo yapwile bimbongo bya siuva bya kupwa 50,000.
20 Ngeci, lijwi lya Yehova lyatwaleleleleho kukala na nzili.
21 Mubyahwileko ebi byuma, Paulu wayongwele ngwendi nga neti mu Masedonia na mu Akaya, co aya ku Jelusalema. Wendekele ngwendi: “Nga njinete kuje, njinapande kuya lalo na ku Loma.”
22 Ngeci, hali baje bakele na kumupangela, watumineho babali ku Masedonia. Watumine Timothi na Elastasi, oloni ikeye wasalele mu provinsi ya Asia ha simbu yailahako.
23 Ha simbu ije, kwakatukile mpindangano yakama ya kulwisa Ngila ya Mwata.
24 Mwafwa munalume umo wa lizina lya Dimetriya, muka-kufula byuma bya siuva, uje wakele na kufula tubitempele twa siuva twa Atemisi, wakele na kufukisa manene baka-kupanga bipangi bya maboko ba batongwe.
25 Dimetriya wakungulwile aba banu, hamolika na beka baje bakele na kupanga cipangi ca kufwa ngwe eci, co wabaleka ngwendi: “Eni banalume, muzibuka mwamubwa ngweni, bufuko bwetu buli na kutunda aha bene ha cipangi.
26 Co munalimwena na kulizibila ou Paulu mwali na kungumuna mbunga ya banu, keti ba muno lika mu Efeso, oloni na ba mu provinsi yoshe ya Asia kunasala lika babandondo ngwe boshe nabongumuna, co banataba mwali na kwendeka ngwendi binjambi bakupanga na maboko keti binjambi bene embwe.”
27 Co lalo tukobela mu bukalu, banu kubombwanesa lika mingoso yetu, oloni na tempele ya njambi wakama wa munakazi Atemisi baimona ngwabo yangoco. Co ou njambi ibali na kulemesa mu provinsi yoshe ya Asia na hasi hoshe, kubakazumbangeya lalo bukama bwendi.
28 Mubazibile ngoco, balubalele manene, co bashangumukile kutambeka ngwabo: “Atemisi wa baka-Efeso wapwa wakama!”
29 Ngeci, mu nganda mwoshe mwakele mpindangano, co boshe bashatukilile mu mutungo wa kwehela oku bakokangeya Gayasi na Alistakasi ba ku Masedonia, babusamba ba Paulu baje bakele na kwenda nendi.
30 Paulu washakele kukobela mukati mangana akendeke na banu, oloni bandongesi kubamutabesele.
31 Co na banu bamo baje bakele na kutwamenena bilika na bweho, baje bapwile babusamba bendi batumine lijwi lya kumulambelela ngwabo keti akobele mu mutungo wa kwehela kutewa alikobelesa mu bushonde.
32 Mbunga ya banu boshe baje bakungulukile bakele mu liwayanga. Bamo bakele na kutambeka ebi, bakwabo batambeka bije, co bwingi bwabo kubazibukile nebi bibalikungulwilile hamo.
33 Ngeci, batundisile Alekizanda mu mbunga, Bajuda bamunakwilile halutwe, co Alekizanda wabashobweyeye na liboko lyendi ngwendi boloke mangana endeke ku banu.
34 Oloni mubanangukile ngwabo wapwile Kajuda, boshe bashangumukile kutambeka ha simbu imolika ha maola a kweta ku abali ngwabo: “Atemisi wa baka-Efeso wapwa wakama!”
35 Co muka-kutwamenena nganda mwamanesele kwolwesa banu, wendekele ngwendi: “Eni banu ba mu Efeso, iya kazibuka ngwendi banu ba mu nganda ya Efeso bakebo bakanyungu tempele ya Atemisi wakama na kamponya uje wawile mwilu?
36 Ha kuwana ngwe naumo wahi asa kubyana ebi byuma, munapande kuwa bimbunge, keti kulinga byuma mu kulusozoka.
37 Mwafwa aba banalume bamunanene kuno, keti mapwepwe ba bitempele nambe baka-kushaula njambi yetu wa munakazi.
38 Ngeci, nga Dimetriya na baka-kupanga bipangi bya maboko ba batongwe bali na ñanda na munu, matangwa a kusompa kuwali, na bangubulu kubali. Beceleni banene milonga ibanalibulumwina.
39 Oloni nga kuli byuma byeka bimutonda byatubakana ebi, co munapande kubinena ku ciwano mangana babitale kwesekesa na lishiko.
40 Mwafwa tuli mu bukalu, batwana mulonga wa kutengulukila fulumende ha byuma ebi binalingiwa litangwa lya lelo. Mwafwa kutwesi na bukaleho butwasa kwendeka buje bunalingisa ei mbulunda ya banu inene mpindangano.”
41 Mwamanesele kwendeka ebi byuma, wasuwile ije mbunga ya banu.
