Bilinga 20:1-38
20 Ije mpindangano muyatepulukile, Paulu watumine banu bakasane bandongesi. Co mwamanesele kubashongangeya na kubasalesa, washangumukile bungenzi bwendi bwa kuya ku Masedonia.
2 Mwetile muje mu mitambela yoshe na kutakamesa baje bakelemo na majwi amangi, wetele mu Grisi.
3 Wakele kuje bingonde bitatu, oloni mwafwa Bajuda batumbile butumbe bwa kumulinga mwamubi mwakele muyehi na kuya na bwato ku Siria, wetengulwile biyongola byendi, co welukile na ngila ya kwita mu Masedonia.
4 Waile na Sopata muna Pilasi wa ku Beleya, na Alistakasi na Sekunda ba ku Tesalonika, na Gayasi wa ku Debe, na Timothi na Tikikasi na Trofima ba ku provinsi ya Asia.
5 Aba banalume batwamene kulutwe, co bakatubandamenene mu Troasi.
6 Oloni yetu twakatukile na bwato mu Filipu munima ya matangwa a Cilika ca Makende a Kujeneka Musima.* Co mu matangwa atanu, twetele kuli bakebo mu Troasi, co twakele kuje matangwa 7.
7 Ha litangwa lyakulibanga mu calumingo, mutwalikungulwile mangana tulye, Paulu washangumukile kwendeka kuli bakebo, mwafwa lyamukwabo wapandele kuya. Co wendekele kuketa na mukati ka butsiki.
8 Mu mulili wa helu mutwalikungulwilile mwakele bindeya byabingi.
9 Mukwenje umo wa lizina lya Yutikasi watumamene ha njanena ya njibo, co waile mu tulo ha simbu yakele na kwendeka Paulu, co mwafwa ya tulo wandumukilile hasi kutunda ha njibo yamucitatu ya kulilundakana, co mubakumunonele bamuwanene natsi.
10 Co Paulu wasikumukile hasi, walyumbilile hali ikeye na kumubumbateya, wendekele ngwendi “Keti muliuye, mwafwa ali na kuyoya.”*
11 Paulu wakandukile ku njibo ya kwilu, co washangumukile kulya byakulya.* Watwaleleleleho kwendeka ha simbu yailaha kweta noho halyakililile litangwa, co waile.
12 Ngeci bambatele uje mukwenje oku ayoya, co eci cabazembelekele manene.
13 Twakalondele mu bwato, co twasunukile na kuya ku Asosi, kuje kutwayongwele ngwetu kukekwo kutuketwila Paulu na bwato, mwafwa mwamanesele kutushika, ikeye wayongwele kuya kuje na mendi.
14 Ngeci, mwatuwanene mu Asosi, twamwambatele mu bwato, co twaile ku Mitilena.
15 Co lyamukwabo twatundile kuje na bwato, twetele ku mutambela uje walitalele na Kiyosi. Oloni lyamukwabo twakukele kamandondo mu Samosi, co litangwa lyateleko, twetele mu Miletasi.
16 Paulu kashakele kwita mu Efeso mangana keti abiisile simbu mu provinsi ya Asia, mwafwa wakele na kuzambwila ku Jelusalema mangana akakale mu Jelusalema ha litangwa lya Cilika ca Pentekosti nga citaba.
17 Oloni mwakele mu Miletasi, watumine lijwi ku Efeso lya kusana bakulunu ba cikungulukilo.
18 Mubezile kuli ikeye, wabalekele ngwendi: “Muzibuka mwamubwa munjayoyelele neni kutunda bene ha litangwa lyakulibanga linjalyatele lindi lyange mu provinsi ya Asia,
19 oku njipangela Mwata na kulikehesa manene* na misozi na byeseko binjaliwanene nabyo mwafwa ya matumbe a Bajuda a kushaka kunjilinga mwamubi.
20 Co kunjalikelele kumileka byuma bije bimikwasa nambe kulikela kumilongesela ha mbunga na ha njibo na njibo.
21 Oloni njanene bukaleho bwa kushula kuli Bajuda na kuli Bagriki, mangana batenguluke na kwija kuli Njambi na kukala na likulahelo muli Mwata wetu Yesu.
22 Co hano tolilileni, sipilitu inanjitwamenena* mangana njiye ku Jelusalema nameme kunjizibuka bikalingiwa kuli yange kuje.
23 Njizibuka lika ngwange mu nganda na nganda, sipilitu ya kujela yanjilekele kushwa kumo ngwayo kamenga na tuyando binanjibandamena.
24 Nameme ngoco, kunjimono kuyoya cange* kupwa ca seho, cakama lika kunjinamanesa bungenzi bwange na kumanesa cipangi cinjatambwile kuli Mwata Yesu ca kwana bukaleho bwa kushula bwa muzimbu wa ngozi yakama ya Njambi.
25 “Co hano tolilileni, njizibuka ngwange hakati keni banjinambulwila Bumwene, naumo wahi akamona cihanga cange lalo.
26 Ngeci njinamisana mupwe bakaleho ha litangwa lya lelo ngwange yange njinajele ku maninga a banu boshe.
27 Mwafwa kunjalikelele kumileka cizango* ca Njambi coshe.
28 Linyungeni yeni babenya na kunyunga butanga bwoshe, buje sipilitu ya kujela inamyangula kupwa tunyungi babwo, mangana munyunge cikungulukilo ca Njambi cije calandele na maninga a Munendi.
29 Njizibuka ngwange nga njinai, tungunga ba bukalu bakakobela mukati keni, co kubakatetela butanga.
30 Mukati keni bene mukakala banalume baje bakendeka byuma bya kuhenga, mangana bakongumune bandongesi bakabakabangeye.
31 “Ngeci, twaleleleniho kutona, co anukeni ngweni ha myaka itatu, butsiki na mutanya, kunjalikelele kunangula umo na umo weni na misozi.
32 Co hano njimyaka mu maboko a Njambi na mu lijwi lya ngozi yendi yakama. Lijwi lije lyasa kumitunga na kumyana buswana mukati ka baje babanajelesa.
33 Kunjashungwiiye siuva ya munu, nambe goldi ya munu, nambe bizalo bya munu.
34 Neni mulizibukila bwino ngweni njinapanga na maboko ange awa mangana njiwane byakulikwasa nabyo mu buyoye bwange na kukwasa baje banjinakala nabo.
35 Njinamimwesa mu byuma byoshe ngwange ha kupanga na nzili mu ngila ei, munapande kukwasa baje banazeye, co munapande kwanuka majwi a Mwata Yesu omwo wendekele babenya ngwendi: ‘Mu kwana muli kubwahelela kwakama kutubakana mu kutambula.’”
36 Mwamanesele kwendeka ebi byuma, watsikamene hamo nabo na kulombela.
37 Co boshe balilile manene, babumbateyeye Paulu* na kumutsemba.
38 Mwafwa bazibile manene kubabala ku mbunge, maneneni mwendekele ngwendi kubakamono lalo cihanga cendi. Co bamusindikiiye ku bwato.
Majwi a kwinikila
^ Nambe “Cimela.”
^ Nambe “mwonyo wendi muuli.”
^ Lijwi na lijwi “kumungula likende.”
^ Nambe “na bisinganyeka bya kulyaka kwisi.”
^ Nambe “inanjisindiya.”
^ Nambe “mwonyo wange.”
^ Nambe “biyongola.”
^ Lijwi na lijwi “bawililile mu nsingo ya Paulu.”
