Bilinga 22:1-30
22 “Eni banalume, bandolome, neni batate, njitolilileni omwo njilyamena ku mesho eni.”
2 Mubazibile ngwabo ali na kwendeka nabo mu ndaka ya Cihebelu, bolokele oni manene, co wendekele ngwendi:
3 “Yange nji Kajuda, njasemukilile mu Tasasi mu Silisha, oloni banjilongeselele muno mu nganda kuli Gamaliele. Banjilongesele mwoshe mwaya Lishiko lya bakukulwila betu, co njili na ntwima ya kupanga cipangi ca Njambi ngwe imuli nayo mubaboshe lelo.
4 Njayandesele ei Ngila ya Mwata kutwala na ku kutsa. Njakutile banalume na banakazi na kubaka mu tumenga.
5 Kapilistu wahakamwa na cibunga coshe ca bakulunu basa kupwa bakaleho bange ha ñanda ei. Njambatele mikanda kuli bakebo ya kuya nayo kuli bandolome ba ku Damasika. Njakutile bungenzi ngwange njikambate baje bakele kuje na kubanena ku Jelusalema oku njinabakutu mangana bakubane kashitiko.
6 “Oloni munjakele mu ngila, munjakele na kweta kuyehi na Damasika, litangwa mulyakele hakati ka mutwe, njikakasumuke ceke cakama ca kutunda mwilu cinanjitwila.
7 Ngeci njawililile hasi, co njazibile lijwi lyendeka kuli yange ngwalyo: ‘Saulu, Saulu, bika biuli na kunjiyandesela?’
8 Njakumbulwile ngwange: ‘Mwata, yobe iya?’ Wanjikumbulwile ngwendi: ‘Yange Yesu muka-Nazaleta iuli na kuyandesa.’
9 Banalume banjakele nabo bamwene ceke, oloni kubazibile lijwi lya uje wakele na kwendeka nange.
10 Co njamwihwile ngwange: ‘Mwata, bika binjinapande kulinga?’ Mwata wanjilekele ngwendi: ‘Katuka, ya mu Damasika, co bakakuleka byuma byoshe bibanakwangwila ngwabo ulinge.’
11 Oloni ha kuwana ngwe kunjasele kumona cuma nambe cimo mwafwa ya bumpau bwa cije ceke, njaketele mu Damasika oku bananjikwatelela ku liboko baje banjakele na kwenda nabo.
12 “Co munalume wa lizina lya Ananiyasi, uje wakolesele mu bulombelo kwesekesa na Lishiko, ibazibukile Bajuda boshe baje bakele kuje ngwabo wapwile munu wamubwa,
13 wezile kuli yange. Wakwimanene kuyehi nange, co wendekele ngwendi: ‘Saulu, ndolome yange, mesho obe atone lalo!’ Haje bene njatonene, co njamumwene.
14 Wendekele ngwendi: ‘Njambi ya bakukulwila betu nakwangula mangana uzibuke cizango cendi, umone muka-kusungama na kuziba lijwi lya mu kanwa kendi.
15 Mwafwa upwa mukaleho wendi ku banu boshe ha byuma biunamono nebi biunazibi.
16 Co bika biukwata-kwatela ku masinde? Katuka bakumbwitike, co kusha bubi bwobe ha kusana ha lizina lyendi.’
17 “Oloni munjelukile ku Jelusalema, munjakele na kulombela mu tempele, njalezukilile mu tulo.
18 Co njamwene Mwata anjileka ngwendi: ‘Zambula, tunda muno mu Jelusalema bwasi-bwasi, mwafwa kubatambula bukaleho buwendeka hali yange.’
19 Co njendekele ngwange: ‘Mwata, bazibuka bwino ngwabo njakele na kwaka mu kamenga baje banataba muli yobe na kubapupa makote mu sinagogi na sinagogi.
20 Co mubakele na kwitila maninga a mukaleho wobe Setefano, njemanene kumukulo na kulikwatasana nabo mu mbunge yange na kunyunga bizalo bya baje bakele na kumutsiya.’
21 Nameme ngoco, Mwata wanjilekele ngwendi: ‘Ya, mwafwa njikutuma kuli baka-mafuti baje bali ku myela ya kulako.’”
22 Co batwaleleleleho kumutolilila kweta naha hendekelele awa majwi, co batambekele ngwabo: “Munu wa cifweci mutundiseni hano hasi, mwafwa kapandele kuyoya!”
23 Ha kuwana ngwe bakele na kutambeka na kwashanga bizalo byabo na kushawila libu mu lihunzi,
24 mukulunu wa maswalale washikile ngwendi banene Paulu mu binjibo bya maswalale, co wendekele ngwendi bamwihozole oku bamupupa makote mangana azibuke bwino binalingisa banu batambeke ngoco hali Paulu.
25 Oloni mubakutile Paulu ngwabo bamupupe makote, Paulu walekele kapitau ka maswalale uje wemanene kuje ngwendi: “Kuma lishiko limitabesa kupupa Kaloma* simbu kanda bamuwane na mulonga* ndi?”
26 Kapitau ka maswalale mwazibile ngoco, waile kuli mukulunu wa maswalale na kumuleka ngwendi: “Bika biushaka kulinga? Ou munalume napu Kaloma.”
27 Ngeci, mukulunu wa maswalale washwenene Paulu na kumwihula ngwendi: “Njileke, kuma u Kaloma ndi?” Paulu wamukumbulwile ngwendi: “Eyo.”
28 Uje mukulunu wa maswalale wakumbulwile ngwendi: “Yange njalandele lisesa lya kukala muno mu lifuti na bimbongo byabingi.” Paulu wendekele ngwendi: “Oloni yange lya kusemuka nalyo.”
29 Haje bene, baje banu bashakele kumwihozola na kumupupa, bamusezele. Co mukulunu wa maswalale wazibile lyoba mwanangukile ngwendi wakutile Paulu malyenge nameme wapwile Kaloma.
30 Lyamukwabo, ha kuwana ngwe washakele kuzibuka bwino byalingisile Bajuda bane Paulu mulonga, wazitwile Paulu mu malyenge, co washikile tupilistu bakama na baka-nkuta ya Sanihedrini boshe ngwendi balikungulule. Kutundaho, wanenele Paulu na kumwimika mukati kabo.
