Bilinga 25:1-27
25 Festasi mwetele muje mu provinsi ya Judeya na kushangumuka kuyula, kwetile matangwa atatu, co watundile mu Sezaliya na kukanduka ku Jelusalema.
2 Co tupilistu bakama na banalume ba bulemu ba Bajuda balekele Festasi mulonga ubanene Paulu. Co bashangumukile kulambelela Festasi
3 ngwabo abakwaseko mangana atume Paulu ku Jelusalema. Oloni batumbile butumbe bwa kubandelela Paulu mangana bamutsiile mu ngila.
4 Festasi wabakumbulwile ngwendi Paulu bamunyungila bene mu Sezaliya, co lalo nendi bene ololo elukamo.
5 Wabalekele ngwendi: “Baje bali na kutwamenena mukati keni, baye hamo nange mangana bakendeke mulonga wendi nga cili bene ou munalume nabiisako bimo.”
6 Festasi mwakele nabo mu Jelusalema matangwa a kweta ku 8 nambe 10, welukile ku Sezaliya. Co lyamukwabo, watumamene ha citwamo ca kusompela na kushika ngwendi banene Paulu.
7 Paulu mwakobelele, Bajuda baje basikumukile kutunda ku Jelusalema bamuzengelekele, co bakele na kumwana milonga yakama yaingi ije kubasele kumwesa bukaleho bwayo.
8 Oloni Paulu walyamenene ngwendi: “Kunjapokwele Lishiko lya Bajuda, nambe kulinga cuma cimo ku tempele, nambe kuli Sezale.”
9 Ha kuwana ngwe Festasi washakele kuzibisa Bajuda kubwaha, wehwile Paulu ngwendi: “Kuma ushaka kukanduka ku Jelusalema mangana bakakusompele ku mesho ange ha milonga ei ndi?”
10 Oloni Paulu wendekele ngwendi: “Njinemana ku citwamo ca kusompela ca Sezale, kuje kubanapande kunjisompela. Kunjalingile cuma cacibi kuli Bajuda, ngwe muuli na kunangukila.
11 Nga cili bene nji muka-bubi, co njinalingi cuma cinjinapande kutsila, kunjilombo ngwange keti banjitsiye embwe. Oloni nga byuma bibali na kunjanena milonga aba banu keti bya busunga, co naumo wahi ali na lisesa lya kunjana mu maboko abo mwafwa lika ya kushaka kubazibisa kubwaha. Njilomba ngwange ñanda yange bakaitale kuli Sezale!”
12 Co Festasi mwamanesele kusimutwiya na cibunga ca baka-kunangula, wakumbulwile ngwendi: “Unalombo ngwobe ñanda yobe bakaitale kuli Sezale, ngeci kuli Sezale bene kukekwo kuuya.”
13 Mukwetile matangwa amo, Mwene Agripa na Benisi bezile mu Sezaliya na kumeneka Festasi.
14 Ha kuwana ngwe bakele kuje matangwa amangi, Festasi wetesele ñanda ya Paulu kuli mwene ngwendi:
“Kuli lipanditi umo wa munalume yasezele Felikisi mu kamenga.
15 Co munjinakele mu Jelusalema, tupilistu bakama na bakulunu ba Bajuda bananjinenelele ñanda yendi na kunjilomba ngwabo njimuhise na kumwana kashitiko.
16 Oloni njinabakumbulwile ngwange kwesekesa na lishiko lya Baloma kucitaba kwana munu mu maboko a baka-kumwana mulonga mwafwa lika ya kushaka kubazibisa kubwaha simbu kanda alimone nabo mesho na mesho na kumwana simbu ya kulyamena ha mulonga ubanamwana.
17 Co mubanezile kuno, kunjeshwalele, oloni lyamukwabo njinatumamene ha citwamo ca kusompela na kushika ngwange banene ou munalume.
18 Baje baka-kumwana mulonga mubanemanene, kubendekele byuma byabibi binjinabandamenene kuziba hali ikeye.
19 Oloni kubalitabasanene lika nendi ha ñanda ya kulemesa binjambi babo,* nei ya munalume wa lizina lya Yesu uje watsile, oloni Paulu wakwatesele kwendeka ngwendi ali na kuyoya.
20 Ha kuwana ngwe kunjazibukile mwakwakwila ei ñanda, njinamwihwile indi ashaka kuya ku Jelusalema mangana bakamusompele kuje ebi biñanda.
21 Oloni Paulu mwanalombele ngwendi bamunyungile mu kamenga kweta noho hatalela ñanda yendi Agustu Wakulibanga, njinashikile ngwange bamunyunge kweta noho hanjimutumina kuli Sezale.”
22 Agripa walekele Festasi ngwendi: “Njishaka kulizibila ou munalume yange babenya.” Festasi wamukumbulwile ngwendi: “Wakulizibilaye imene.”
23 Lyamukwabo, Agripa na Benisi bezile oku bali na kulimwesa manene, co bakukobelele mu mulili wa kusompela biñanda, hamolika na bakulunu ba maswalale na banalume ba kutsimana ba mu nganda. Co Festasi mwashikile ngwendi banene Paulu, balingile ngoco.
24 Festasi wendekele ngwendi: “Mwene Agripa, neni boshe muli netu hano, ou munalume imuli na kumona ikeye ibananjilombele Bajuda boshe mu Jelusalema na kuno oku batambeka ngwabo kapandele kuyoya.
25 Oloni yange njinamwene ngwange nabimo byahi byanalingi byanapande kutsila. Co ou munalume mwanalombele ngwendi ñanda yendi bakaitale kuli Agustu Wakulibanga, njinendekele ngwange njimutumako.
26 Oloni yange kunjawanene binjisonekela Mwata wange hali ou munu, mukemwo njinamunene ku mesho eni mubaboshe, maneneni ku mesho obe Mwene Agripa mangana munima ya kumwihozola bihula, njase kuwana byakusoneka.
27 Mwafwa yange njinamono ngwange keti kwakubwa kutuma lipanditi kwa kujeneka kumwesa milonga ibanamwana.”
Majwi a kwinikila
^ Nambe “bulombelo bwabo.”
