Bilinga 26:1-32
26 Agripa walekele Paulu ngwendi: “Wasa kwendeka mu kulyamena yobe babenya.” Paulu wolwele liboko lyendi na kushangumuka kulyamena ngwendi:
2 “Mwene Agripa, njinabwahelela litangwa lya lelo, mwafwa njili na kulyamena ku mesho obe mu byuma byoshe bibali na kunjanena milonga Bajuda,
3 maneneni mwafwa uzibuka mwamubwa bisemwa byoshe bya Bajuda na bimata byakala mukati kabo. Ngeci, njikulomba ngwange unjitolilile mwamubwa.
4 “Cili bene, buyoye bunjinayoyo kushwa ku bwanike mukati ka banu bange* na mu Jelusalema babuzibuka mwamubwa Bajuda boshe
5 baje banjizibukile laja. Nga bashaka, basa kwana bukaleho ngwabo njayoyele ngwe Kafalisi mu kacibunga ketu ka kulimanena kaje kakabangeyeye manene mwoshe mwaya bulombelo bwetu.
6 Oloni njinemana hano na kunjisompesa, mwafwa ya kulabelela cikulaheso cakulahesele Njambi bakukulwila betu.
7 Eci bene cikulaheso ca kulifwa, cikeco ciinalabelela miyati yetu 12 kumona mucilishulisilila, mukemwo ili na kupangela manene Njambi cipangi ca kujela butsiki na mutanya. Mwene yange, eli bene lilabelelo likelyo libali na kunjanena mulonga Bajuda.
8 “Bika bilingisa bamo mukati keni bajeneke kutaba* ngwabo Njambi asa kusangula batsi?
9 Nange bene njamwene ngwange njinapande kulinga byuma byabingi bya kulwisa lizina lya Yesu muka-Nazaleta.
10 Ebi bikebyo bene binjalingile mu Jelusalema, njakele bakujela babangi mu tumenga mwafwa banjanene moko ku tupilistu bakama. Co mubakele na kutsiya bakujela, nange njabakundwiiye.
11 Njabayandesele kushwa kumo mu masinagogi abo oshe mangana njibasindiye kubyana likulahelo lyabo. Ha kuwana ngwe njabalubalelele manene, njaile na ku binganda bya kulako mangana njikayandese baje bakeleko.
12 “Munjakele na kulinga ebi byuma, ha simbu injakele na kuya ku Damasika oku njili na moko na mashiko a kutunda ku tupilistu bakama,
13 litangwa mulyakele hakati ka mutwe, munjakele mu ngila, obe Mwene yange, njamwene ceke ca kutunda mwilu cakubyakula manene kutubakana kubyakula kwa ceke ca litangwa, canjitwililile na kutwila baje banjakele na kwenda nabo.
14 Co tubaboshe mutwawililile hasi, njazibile lijwi linjendekesa mu Cihebelu ngwalyo: ‘Saulu, Saulu, bika biuli na kunjiyandesela? Ulibulumuna lika yobe babenya nga utwalelelaho kulaha ku citi ca kushongomoka.’*
15 Oloni njehwile ngwange: ‘Mwata, yobe iya?’ Mwata wanjikumbulwile ngwendi: ‘Yange Yesu iuli na kuyandesa.
16 Oloni katuka wimane. Bikebyo binjinasholokela kuli yobe mangana njikwangule, upwe ngamba na mukaleho wa byuma biunamono na byuma binjikumwesa bije binatalesa kuli yange.
17 Co njikwobola kuli aba banu na ku baka-mafuti, kuje kunjikutuma,
18 mangana utonese mesho abo, ubatundise ku lisusulungu na kubanena ku ceke, ubatundise ku moko ya Satana na kubanena kuli Njambi, mangana babakonekele bubi bwabo na kuswana buswana mukati ka baje babanajelesa mwafwa ya likulahelo lyabo muli yange.’
19 “Ngeci, Mwene Agripa, kunjabyanene kwononoka cije cimona ca kutunda mwilu,
20 oloni njaile, njabangele kuya kuli baje ba mu Damasika, co njaya kuli baje ba mu Jelusalema. Kutundaho njaya mu lifuti lyoshe lya Judeya, co njaya lalo na ku baka-mafuti. Njakele na kubambulwila ngwange banapande kutenguluka na kwiluka kuli Njambi ha kupanga bipangi bije bimwesa ngwabyo banatenguluka.
21 Ebi bikebyo byalingisile Bajuda banjikwate mu tempele na kushaka kunjitsiya.
22 Oloni mwafwa Njambi nanjikwasa, yange uno na lelo lino njicili na kutwalelelelaho kwambulwila babandondo naba bakama. Kukwesi byeka binjili na kwendeka, kubanga lika bije bibanendeka mu Bisoneka bya Tupolofweto na mu bisoneka bya Mosesa ngwabo bikalingiwa,
23 ngwabo Kristu akayanda, co lalo ngwabo ha kupwa ikeye wakulibanga kumusangula ku batsi, akambulula ceke kuli aba banu na kuli baka-mafuti.”
24 Paulu mwakele na kwendeka ebi byuma mu kulyamena, Festasi wendekele na lijwi lya kutaluka ngwendi: “Obe Paulu, unazaluka! Kulilongesa manene kuli na kukuzalwisa!”
25 Oloni Paulu wamukumbulwile ngwendi: “Kunjazalukile obe Festasi munu wa bulemu, oloni njili na kwendeka majwi a busunga nawa a mana.
26 Cili bene, ou mwene injinazituka kwendeka nendi azibuka mwamubwa ebi byuma. Njatanekeya mwamubwa ngwange ha byuma ebi, nacimo cahi cinamwiti, mwafwa kukwesi cimo calingiwile mu kushwekesa.
27 Mwene Agripa, kuma wataba Bisoneka bya Tupolofweto ndi? Njizibuka ngwange wabitaba.”
28 Oloni Agripa walekele Paulu ngwendi: “Mu kasimbu kakandondo lika ushaka kunjikokweya kupwa muka-Kristu.”
29 Paulu mwazibile ngoco, wendekele ngwendi: “Njilomba kuli Njambi ngwange, ipwe mu simbu yaindondo nambe mu simbu yailaha, keti lika yobe, oloni na boshe aba bali na kunjitolilila lelo, bapwe ngwe yange, oloni kwa kujeneka kukala mu malyenge.”
30 Co mwene wakatukile, na ngubulu nendi wakatukile, na Benisi, na baje batumamene hamo nabo, nabo bakatukile.
31 Oloni mubakele na kuya, bashangumukile kwendeka mukati kabo ngwabo: “Byuma byali na kulinga ou munalume, keti byuma byanapande kutsila nambe byanapande kukela mu malyenge embwe.”
32 Co Agripa walekele Festasi ngwendi: “Ngwe ou munalume katwalele ñanda yendi kuli Sezale ngwe napatuka.”
Majwi a kwinikila
^ Nambe “muyati wange.”
^ Lijwi na lijwi “kwakula.”
^ Citi ca kushongomoka cibanendeka aha bakacipangesa mu kulingisa cimuna azambule.
