Bilinga 27:1-44
27 Mubatulekele ngwabo tuye ku Itali na bwato, banene Paulu na mapanditi bakwabo mu maboko a kapitau ka maswalale wa lizina lya Juliasi, wa mu cibunga ca maswalale ca Agustu.
2 Mutwakobelele mu bwato buje bwatundile ku Adramiti, buje bwakele muyehi na kuya ku bikuma bya ku provinsi ya Asia, twasunukile na kuya. Co Alistakasi uje watundile ku Tesalonika mu provinsi ya Masedonia nendi wakele netu.
3 Lyamukwabo twetele ku Sidoni, co Juliasi wamwesele Paulu ngozi na kumutabesa ngwendi akamone babusamba bendi mangana bamukwase.
4 Twatundile kuje na bwato, co twashwangesele liñanda lya Saiprasi mangana litunyungilile ku lihunzi lije lyakele na kutundilila kulutwe lwetu.
5 Twetile ha kalunga-ndonga kuyehi na Silisha na Pamfilia, co twakatutikile ku cikuma ca Mira mu Lisha.
6 Co kuje, kapitau ka maswalale wawanene bwato buje bwatundile ku Alekizandriya bwakele na kuya ku Itali, co watukobeleselemo.
7 Mutwajabwile kamandondo-kamandondo oku tupinda na bwato ha matangwa amangi, twakwetele ku Kinidu. Co mwafwa ya lihunzi lije lyatwonowesele kuya lutwe, twongolokele Samone na kushwangesa liñanda lya Krete mangana litunyungilile ku lihunzi.
8 Mutwakele na kushwangesa liñanda oku tupinda, twakwetele ku mwela ubasana ngwabo Bikuma Byabibwa, uje wakele kuyehi na nganda ya Lasiya.
9 Ha kuwana ngwe kwetile simbu yailaha, co kwatewesele kwenda ha kalunga-ndonga na bwato, co lalo na kulibindika kulya kwa Litangwa lya Kukonekela Bubi te kuneti laja, ngeci Paulu wabanangwile
10 ngwendi: “Eni banalume, yange njinamono ngwange obu bungenzi butukobelesa mu bukalu, mwafwa keti lika bitenga na bwato bibihya na kunyonga, oloni na myonyo* yetu lalo.”
11 Nameme ngoco, uje kapitau ka maswalale watolililile muka-kwendesa bwato na babenya bwato kutubakana kutolilila ku byuma byakele na kwendeka Paulu.
12 Ha kuwana ngwe cije cikuma kucapwile cacibwa kukalamo ha cisika, babangi bendekele ngwabo basunuke mangana nga casiwa ha simbu ya cisika bacikakale tahi ku Fonikisi, cikuma ca ku Krete cije catala ku kunto-ngangela* na ku mbwela-ngangela.*
13 Lihunzi lya ku mbwela* mulyashangumukile kuhuwa kamandondo, basinganyekele ngwabo baketoni ku Fonikisi. Ngeci bakokele cimikiso ca bwato na kushangumuka kushwangesa liñanda lya Krete.
14 Oloni mukwetile lika simbu yaindondo, kwezile lihunzi lyakama libasana ngwabo Yulokwilo.*
15 Lije lihunzi mulyapupile ha bwato, ntongo ya bwato kuyasele kutalesa kuje kulyakele na kutunda lihunzi, ngeci twabwecelele, co twongumukile.
16 Co twakaliwanene ku kaliñanda kabasana ngwabo Kauda kaje katunyungililile ku lihunzi. Nameme ngoco, kwatukaluwilile kukoka kabwato* kaje kakele ku ntongo ya bwato ya kunima.
17 Mubamanesele kukakokela mu bwato, bashangumukile kushilwisa mikole ku bwato bwakama mangana babukute bukole. Ha kuwana ngwe batewele ngwabo bakakateya ha mushekesheke wa Sitisi,* bambwembwelesele mikole, ngeci bongumukile.
18 Ha kuwana ngwe lihunzi lyakama lyakele na kutunakozwela noku-noku, lyamukwabo bashangumukile kumbangela bitenga mu mema mangana bwato bwehuke.
19 Co ha litangwa lyamucitatu, bambatele byuma bya ku bwato na kubyumbila mu mema na maboko abo.
20 Omwo kutwamwene litangwa nambe bingongonosi ha matangwa amangi, oku lalo lihunzi lyakama lili na kutunakozola, kutwasinganyekele ngwetu tuyoya.
21 Mubakele simbu yailaha kwa kujeneka kulya, Paulu wemanene mukati kabo, co wendekele ngwendi: “Eni banalume, ngwe munatolililile binjinamilekele na kujeneka kutunda mu Krete na bwato, ngwe ebi byuma kubyabihile ngacije na kunyonga.
22 Nameme ngoco, njimishongangeya ngwange musimpe, mwafwa naumo wahi hali yeni atsa,* kubanga bwato lika bubihya.
23 Mwafwa butsiki, kangelo ka Njambi, Njambi uje kunjinakundama, uje injikapangela cipangi ca kujela, kangelo kendi nakwimanene kuli yange
24 na kwendeka ngwendi: ‘Keti uzibe lyoba Paulu. Unapande kukemana ku mesho a Sezale. Co tala! Njambi akwobola hamolika na boshe bauli na kwenda nabo mu bwato.’
25 Ngeci, simpeni eni banalume, mwafwa njakulahela Njambi ngwange byuma bibananjileke bilingiwa bene ngoco.
26 Oloni mankimba atunakwila ha liñanda limo.”
27 Co butsiki bwa bu 14 mubwetele, lihunzi mulyakele na kutupekumwina noku-noku ha kalunga-ndonga wa Adriya, mukati ka butsiki baka-kujabula bwato bashangumukile kunanguka ngwabo tuli na kushwena kuyehi na nunda.
28 Bapimine kuloba kwa mema, co bawanene mamita 36, ngeci bashweneneko nawa kamandondo, co belukilile lalo kupima, bawanene mamita 27.
29 Ha kuwana ngwe twakele na kutewa ngwetu tukakateya ha mamanya, basoselele mu mema bimikiso bya bwato biwana bya ku ntongo ya kunima, co bashungwiiye ngwabo kukye bwasi.
30 Oloni baka-kujabula mubakele na kushaka kutewa mu bwato, nomu mubakele na kushulwisa kabwato mu kalunga-ndonga, kulikwisa ngwe baje baka bimikiso bya bwato bya ku ntongo ya kulutwe mu kalunga-ndonga,
31 Paulu walekele kapitau ka maswalale na maswalale ngwendi: “Kubanga aba banalume bakale mu bwato, keti ngoconi kumwoboka.”
32 Ngeci maswalale babatwile mikole ya ku kabwato na kukecela kawe.
33 Co mukwaile na kukya, Paulu washongangeyeye boshe ngwendi balyeko byakulya. Wendekele ngwendi: “Lelo linapu litangwa lya bu 14 limunatumama na bishoti kubandamena kumona mubifwa byuma, co munatumama kwa kujeneka kulya byakulya.
34 Ngeci njimishongangeya ngwange mulyeko byakulya mangana mukale bwino, mwafwa kukwesi nambe cinkambu ca ku mutwe wa munu umo hali yeni cinyonga.”
35 Mwamanesele kwendeka ngoco, wambatele likende, walombelele kuli Njambi ha mesho abo boshe, co walimungwile na kushangumuka kulya.
36 Ngeci boshe basimpile, co nabo bashangumukile kulya.
37 Tubaboshe twakele mu bwato twapwile tu ba 276.
38 Mubalile na kukuta, bombilile tiliku mu kalunga-ndonga mangana bwato bwehuke.
39 Mukwakile, kubakele na kumona ha nunda, oloni bamwene linema* lije lyakele na mushekesheke, co bayongwele ngwabo nga basa, bakasulikeko bwato.
40 Ngeci babatwile mikole ya ku bimikiso bya bwato, na kubyecela biwile mu kalunga-ndonga, co lalo bambwembwelesele mikole ya ku bilapo bya kwendesa bwato. Mubamanesele kukokela mwilu nanga ya kulutwe, ije ikakwasa bwato bwende, baile kuje ku mushekesheke.
41 Mubetele ha mwaba, bwato bwakwatele hasi, co litusi lya kulutwe lyakakateyeye, ngeci bwato kubwasele kushwena. Co mankimba ashangumukile kutabozola manene ntongo ya kunima.
42 Maswalale mubamwene ngoco, bayongwele ngwabo batsiye mapanditi mangana keti kukale nambe umo alapa na kutewa.
43 Oloni kapitau ka maswalale washakele kwobola Paulu, ngeci wababindikile kulinga byuma bibashakele kulinga. Washikile ngwendi baje boshe basa kulapa bajombokele mu kalunga-ndonga mangana balibange kweta ha nunda.
44 Co baje basala asina bakaba munima, bamo ha mabaya, bakwabo ha bimbazubwila bya bwato. Co boshe betele mwamubwa ha nunda.
Majwi a kwinikila
^ Nambe “kuyoya.”
^ Nambe “ku north-east.”
^ Nambe “ku south-east.”
^ Nambe “ku south.”
^ Nambe “lihunzi lya kunto-ngangela.”
^ Kabwato kabakapangesa mu kwobola banu.
^ Taleni Majwi Abanalumbununa.
^ Nambe “mwafwa kukwesi mwonyo utsa.”
^ Nambe “mwakulikondobeka.”
