Bilinga 28:1-31
28 Mutwaketele mwamubwa ha nunda, twazibile ngwabo lije liñanda bakalisana ngwabo Mauta.
2 Co banu ba kuje baje bakele na kwendeka ndaka yeka batumwesele ngozi yakama manene. Babwekele tuhya na kututambula mwamubwa tubaboshe mwafwa kwakele na kunyoka nyonzi, co lalo kwakele lisika.
3 Paulu mwambatele mukuta wa bibanzi na kuwaka mu tuhya, hacapulukile linyoka wa bushungu mwafwa ya kushaluka, co wamushumine na kukakateya ku liboko lyendi.
4 Baje bakele na kwendeka ndaka yeka mubamwene uje linyoka wa bushungu ali na kunyengela ku liboko lya Paulu, bashangumukile kwendeka kuli umo na mukwabo ngwabo: “Cili bene ou munalume wapwa muka-kutsiya banu, nameme noboka mu kalunga-ndonga, oloni Kusungama* kucamutabesele atwaleleleho kuyoya.”
5 Paulu wamyangwilile uje linyoka mu tuhya, oloni kabulumukile.
6 Nameme ngoco, bakele na kubandamena ngwabo azimba, nambe andumukila hasi na kutsa. Co mubabandamenene simbu yailaha na kumona ngwabo byahi binalingiwa kuli ikeye, batengulwile bisinganyeka byabo, co bashangumukile kwendeka ngwabo napu njambi.
7 Kuyehi na uje mutambela, kwakwele mahya a munalume umo wa bulemu wa haje ha liñanda ibasana ngwabo Pabuliya. Ou munalume watutambwile mwamubwa, co watujumbwile ha matangwa atatu.
8 Ishe ya Pabuliya walalele ha mwela, wakele na kubinja lisika-sika na mushongo wa kwitisa maninga. Co Paulu wakobelele muje mwakele, walombelele, wamukambekele maboka na kumukangwisa.
9 Munima yebi, banu boshe ba haje ha liñanda baje bakele na kubinja, nabo bashangumukile kwija kuli Paulu, co wabakangwisile.
10 Co lalo batusingimikile ha kutwana bwana bwabwingi, co mutwakele na kusunuka na bwato, batulongekeyeye byuma byoshe bitwatondele.
11 Twakele bingonde bitatu haje ha liñanda, co twasunukile na bwato buje bwakele na cizibukiso ca “Bana ba Zeusi.” Buje bwato bwatundile ku Alekizandriya, co bwakele haje ha liñanda kubandamena hacihwila cisika.
12 Ngeci twakatutikile ku cikuma ca Silakusi, co twakeleko matangwa atatu.
13 Mutwatundile kuje, twatwaleleleleho na bungenzi bwetu, co twaketele ku Legiamu. Mukwetile litangwa limo, kwezile lihunzi lya ku mbwela,* co twaketele ku Puteoli ha litangwa lyamucibali.
14 Kuje twakawaneneko bandolome, co batulambelelele ngwabo tukale nabo matangwa 7. Kutundaho twaile ku Loma.
15 Bandolome ba ku Loma mubazibile byetu, batusheshele, bakwetele na ku maliketi ya Apiyasi na ku Binjibo bya Bangenzi Bitatu. Paulu mwabamwene, wakandelelele kuli Njambi, co wasimpile.
16 Mutwetele oni mu Loma, Paulu bamutabesele kukala likalyendi na liswalale uje wakele na kumunyunga.
17 Mukwetile matangwa atatu, Paulu wasanene banalume ba bulemu ba Bajuda. Mubalikungulwile hamo, wabalekele ngwendi: “Eni banalume, bandolome, nameme kunjalingile cuma ca kulwisa banu, nambe bisemwa bya bakukulwila betu, oloni banjambatele mu Jelusalema na kunjana ngwe lipanditi mu maboko a Baloma.
18 Mubamanesele kunjihozola, bashakele kunjipatula, mwafwa kubawanene mulonga wakunjitsiila.
19 Oloni Bajuda mubabyanene ngwabo keti banjipatule, eci canjilingisile njilombe kutwala ñanda yange kuli Sezale. Kunjalingile ngoco mangana njiwanene baka-muyati wange mulonga embwe.
20 Mukemwo njinalombele ngwange njimimone na kwendeka neni. Bananjikutu eli lilyenge mwafwa ya cuma cibanalabelela Baisalele.”
21 Bendekele kuli ikeye ngwabo: “Kutwatambwile mikanda ya kutunda ku Judeya ije yendeka byobe. Co lalo ku bandolome banatunduko, naumo wahi nambulula nambe kwendeka cuma cacibi hali yobe.
22 Oloni twamono ngwetu kwakubwa tuzibe biyongola byobe, mwafwa cili bene tuzibuka ngwetu aka kacibunga ka kulimanena bali na kukendeka mwamubi mu mitambela yoshe.”
23 Ngeci balizibasanene litangwa lya kuliwana nendi, co bezile mu bwingi kuli ikeye ku njibo kwakele na kukala. Co kutunda cimene kweta mangwezi, wakele na kubalumbunwina ñanda yendi oku abana bukaleho bwa kushula bwa Bumwene bwa Njambi, mangana abakokweye batabe bya Yesu, bije bili mu Lishiko lya Mosesa na mu Bisoneka bya Tupolofweto.
24 Bamo bashangumukile kutaba byuma byendekele, bakwaboco kubabitabele.
25 Ha kuwana ngwe kubalitabasanene mukati kabo, bashangumukile kuya, co Paulu wendekele awa majwi ngwendi:
“Sipilitu ya kujela yendekele mwamubwa kuli bakukulwila beni kwitila muli kapolofweto Isaya,
26 ngwayo, ‘Ya kuli aba banu ukabaleke ngwobe: “Kuzibani mukaziba, oloni kumukazibisisa. Kutalani mukatala, oloni kumukamono.
27 Mwafwa bimbunge byaba banu binominina, kuziba bali na kuziba na matwi abo, oloni bali na kaliu, co banafwiki mesho abo mangana keti bamone na mesho abo, banaziki lalo matwi abo mangana keti bazibe na matwi abo, na kuzibisisa na bimbunge byabo, co batenguluke mangana njibakangwise.”’
28 Ngeci, zibukeni ngweni ou muzimbu wa kwoboka wa kutunda kuli Njambi, banautumu kuli baka-mafuti. Co cili bene bautolilila.”
29 ——
30 Ngeci, Paulu wakele kuje myaka ibali ya mutunu mu njibo yendi ya kufwetela, co wakele na kutambula mwamubwa boshe baje bakele na kwija kuli ikeye,
31 oku abambulwila Bumwene bwa Njambi na kubalongesa bya Mwata Yesu Kristu mu kuzituka manene, kwa kujeneka cuma ca kumwonowesa.
Majwi a kwinikila
^ Mu Cigriki Di′ke, eli lijwi hamo limbununa njambi wa munakazi uje wakele na kulinga banu shambandinga, nambe linasa kulumbununa kwakula mu kusungama.
^ Nambe “ku south.”
