Bilinga 3:1-26
3 Pita na Iwano bakele na kuya ku tempele ha simbu ya kulombela. Ei simbu yapwile kuma 15:00.*
2 Co kwakele munalume umo ibajundwile uje wasemukile ciyanga. Ha litangwa na litangwa, bakele na kumwaka kuyehi na cikolo cibasanene ngwabo Cikolo Cacibwa mangana alombe bwana bwa kutetela kuli baje bakobela mu tempele.
3 Mwamwene Pita na Iwano bashaka kukobela mu tempele, washangumukile kubalomba bwana bwa kutetela.
4 Oloni Pita na Iwano bamutalele shwii na kumuleka ngwabo: “Tutale.”
5 Co wabatalele shwii, wasinganyekele ngwendi bamwanako bimo.
6 Oloni Pita wendekele ngwendi: “Kunjesi na siuva na goldi, oloni cinjili naco cikeco cinjikwana. Mu lizina lya Yesu Kristu muka-Nazaleta, enda!”
7 Mwamanesele kwendeka ngoco, wamukwatele ku liboko lyendi lya cilyo na kumwimika. Haje bene bilyato byendi na tusendengele twendi byakanyamene,
8 co watumbukile na mendi endi, washangumukile kwenda, wakobelele hamo nabo mu tempele oku ali na kwenda na kutumbozoka na kushangazala Njambi.
9 Banu boshe bamumwene ali na kwenda na kushangazala Njambi.
10 Bamuzibukile ngwabo ikeye uje munalume wakele na kutumama ku Cikolo Cacibwa ca tempele na kubandamena bwana bwa kutetela. Co boshe bakomokele manene na kubwahelela mwafwa ya byuma byalingiwile kuli ikeye.
11 Simbu uje munalume wacikwatelelele Pita na Iwano, banu boshe bashatukilile kuli bakebo ku mwela ubasanene ngwabo Cimbimbi ca Solomoni oku banalikomokela manene.
12 Pita mwamwene ngoco, walekele baje banu ngwendi: “Eni banu ba Isalele, bika bimunalikomokela ngacije ha cuma eci? Bika bimunatutalela ngacije shwii ngwe ngwabo mu nzili yetu nambe mu kulyana kupangela Njambi mukemwo tunalingisa ou munalume ende?
13 Njambi ya Abrahamu na Isaki na Jakobu, Njambi ya bakukulwila betu nana bumpau ngamba yendi Yesu, uje imwanene mu maboko a banu na kumubyana ku mesho a Pilato nameme washakele kumupatula.
14 Mwabyanene uje wakujela, wa kusungama, na kulomba ngweni amipatwile munalume uje wapwile muka-kutsiya banu.
15 Co mwatsiile Muka-kwimanena Wakama wa mwonyo, oloni Njambi wamusangwile ku batsi, co yetu tunapu tu bakaleho bei ñanda.
16 Ngeci, kwitila mu lizina lyendi na likulahelo lituli nalyo mu lizina lyendi, mukemwo ou munalume imuli na kumona uje imuzibuka, nakanyama. Eli likulahelo lituli nalyo muli Yesu likelyo linakangwisa ou munalume ha mesho eni mubaboshe.
17 Bandolome, njizibuka ngwange kumwazibukile bimwakele na kulinga, ngwe mwa baka-kumiyula.
18 Oloni mu ngila ei, Njambi nashulisilila byuma byabangele kwendeka kwitila mu tunwa twa tupolofweto boshe ngwendi Kristu wendi akayanda.
19 “Ngeci tengulukeni na kwiluka kuli Njambi mangana bubi bweni babuzimangane, mangana bisimbu bya kuhwima bitunde kuli Yehova babenya,
20 co lalo amitumine Kristu yanamyangwila, ikeye Yesu.
21 Lilu linapande kunyunga ou munu kweta na ha bisimbu bya kwilwisa byuma byoshe ngwe mubyakelelele hakulibanga, bije byendekele Njambi kwitila mu tunwa twa tupolofweto bendi ba kusañulu.
22 Mosesa nendi wendekele ngwendi: ‘Yehova Njambi yeni akamyangwila kapolofweto wa kulifwa nange mukati ka bandolome beni. Munapande kukatolilila byoshe byakamileka.
23 Cili bene, woshe kakatolilila ou Kapolofweto, Njambi akamunyongesa mangana atunde mukati ka banu bendi.’
24 Co tupolofweto boshe, kushangumukila bene kuli Samwele, boshe banendeka na kwambulula ha kujela bya awa matangwa.
25 Yeni munapu mu bana ba tupolofweto na ba cikumiiyo calikumiiye Njambi na bakukulwila beni omwo walekele Abrahamu ngwendi: ‘Co binaanga byoshe bya hasi bakabibezikisa kwitila muli munobe.’*
26 Njambi mwasangwile Ngamba yendi, wabangele kumutuma kuli yeni mangana amibezikise na kutengulula umo na umo weni ku bilinga byendi byabibi.”
