Bilinga 4:1-37
4 Pita na Iwano mubacikele na kwendeka ku banu, tupilistu na kapitau wa ku tempele na Basaduki bezile kuli bakebo.
2 Balubalele mwafwa aba tupositolo babali bakele na kulongesa banu na kwambulula hakutoka bya kusanguka kwa Yesu.
3 Ngeci, babakwatele* na kubaka mu kamenga kweta na lyamukwabo, mwafwa te kunatoko laja.
4 Oloni bwingi bwa baje batolililile ku majwi abo, batabele, co banalume betele ku 5,000.
5 Lyamukwabo, baka-kuyula babo na bakulunu na baka-kusoneka balikungulwilile mu Jelusalema,
6 hamolika na Anasi kapilistu wakama na Kayafasi na Iwano na Alekizanda na boshe baje bapwile babushoko bwa kapilistu wakama.
7 Bemikile Pita na Iwano mukati kabo, co bashangumukile kubehula ngwabo: “Eci cuma munacilingi mu nzili yeya, nambe mu lizina lyeya?”
8 Co Pita washulile na sipilitu ya kujela, wendekele ngwendi:
“Eni baka-kuyula ba banu na bakulunu,
9 nga muli na kutwihula lelo ha cuma cacibwa cinalingiwa kuli ou munalume wa ciyanga, na kushaka lalo kuzibuka ou nakangwisa ou munalume,
10 co yeni boshe, neni banu boshe ba Isalele, zibukeni ngweni ou munalume nemana halutwe lweni nalikangula kwitila mu lizina lya Yesu Kristu muka-Nazaleta uje imwatsiilile ha citi, uje yasangwile Njambi ku batsi.
11 Ou Yesu ikeye ‘limanya lije limwamwene yeni baka-kutunga ngweni lyangoco, lije linapu oni limanya lya seho lya mu mbango.’*
12 Co lalo, kwoboka kukwesi muli munu weka, mwafwa kukwesi lizina lyeka hano hasi libanana banu lije litwasa kwobokelamo.”
13 Co mubamwene Pita na Iwano bendeka mu kuzituka,* nomu mubanangukile lalo ngwabo kubalilongesele,* co lalo bapwile banu bangoco, balikomokelele manene, co bazibukile ngwabo bakele na Yesu.
14 Mubakele na kutala munalume uje wakangukile nemana na baje tupositolo, kubawanene byakukumbulula.
15 Ngeci babashikile ngwabo batuhuke mu mulili wa Sanihedrini, co bashangumukile kuliyongola mukati kabo
16 ngwabo: “Aba banalume tubalinga bati? Mwafwa cili bene banalingi cizibukiso ca kukomokesa, cije cibanalimwena banu boshe batunga mu Jelusalema, co kutwasa kucibyana.
17 Nga tushaka ngwetu ei ñanda keti itwaleleleho kujalakana ku banu, tuyeni tubajujwise na kubaleka ngwetu keti bendeke lalo byeli lizina ku munu nambe umo.”
18 Ngeci babasanene na kubashika ngwabo keti bendeke cuma nambe cimo mu lizina lya Yesu, nameme bene kulongesa mu lizina lyendi.
19 Oloni Pita na Iwano babakumbulwile ngwabo: “Akuleni yeni babenya, nga cacibwa ku mesho a Njambi kutolilila yeni kutubakana kutolilila Njambi.
20 Oloni yetuni, kutwasa kulikela kwendeka byuma bitunalimwena, nebi bitunalizibila.”
21 Munima ya kubajujwisa lalo, babapatwile, mwafwa kubawanene mulonga wa kubanena kashitiko, co lalo batewele banu, mwafwa boshe bakele na kwana Njambi bumpau ha byuma byalingiwile.
22 Uje munalume ibakangwisile mu kukomokesa wakele na myaka ya kutubakana 40.
23 Mubabapatwile, baile kuli bakwabo bandongesi, co bakambulwile bibabalekele tupilistu bakama na bakulunu.
24 Mubazibile ngoco, balikwatasanene mu kulombela kuli Njambi ngwabo:
“Mwata Wahakamwa ya Byoshe, yobe watangele lilu na lifuti-libu na kalunga-ndonga na byuma byoshe byakalamo,
25 co yobe wendekele kwitila mu sipilitu ya kujela, mu kanwa ka Devidi, kukulwila yetu, ngamba yobe, ngwobe: ‘Mwafwa bika baka-mafuti balubalele? Mwafwa bika banu ba mu mafuti a kuliseza-seza bakele na kusinganyekesesa ha byuma bya kujeneka seho?
26 Bimyene ba hasi bemanene, co baka-kuyula balikungulwile hamo mangana balwise Yehova na wakubwabesa wendi.’
27 Cili bene, Heloda na Pontiasi Pilato, hamolika na baka-mafuti na banu ba Isalele balikungulwilile hamo omu mu nganda mu kulwisa ngamba yobe wa kujela, Yesu, uje iwabwabesele,
28 mangana balinge byuma biwayongwelele cimweja mu nzili yobe* na cizango* cobe ngwobe bikasholoka.
29 Ngeci Yehova, tolilila mubali na kutujujwisa, co kwasa bindungo bobe batwaleleleho kwendeka lijwi lyobe mu kusimpa,
30 oku unolola liboko lyobe mu kukangwisa banu, na kulinga bizibukiso na bikomokeso* bije bisholoka kwitila mu lizina lya ngamba yobe wa kujela, Yesu.”
31 Co mubamanesele kulambelela Njambi, uje mwela ubalikungulwilile hamo waningangele, co boshe bashulile na sipilitu ya kujela, co bakele na kwendeka lijwi lya Njambi mu kusimpa.
32 Kutundaho, mbunga ya banu baje batabele, bakele na mbunge imo na mwonyo* umo, co naumo wahi mukati kabo wendekele ngwendi byuma byakele nabyo byapwile byendi lika, oloni balipangezelele byuma byabo byoshe.
33 Co tupositolo batwaleleleleho kwambulula na nzili yakama bukaleho bwa kusanguka kwa Mwata Yesu, co Njambi wamwesele boshe ngozi yendi yakama.
34 Co mukati kabo, naumo wahi wakele mu bujene, mwafwa boshe baje bakele na mahya nambe binjibo, babilandesele, co banenele bimbongo bibalandesele,
35 babyanene ku tupositolo, co tupositolo babipangezelele munu na munu kwesekesa na bujene bwendi.
36 Co Jozefu, Kalevi uje wasemukilile ku Saiprasi, uje ibasanene lalo tupositolo ngwabo Banabasi (kulumbununa “Muka-kuzembeleka”),
37 wakele na libu, walilandesele, co wanenele bije bimbongo na kubyana tupositolo.
Majwi a kwinikila
^ Nambe “babakutile.”
^ Lijwi na lijwi “mutwe wa mu mbango.”
^ Nambe “mu kusimpa.”
^ Kulumbununa, kubaile ku masikola a Barabi, keti ngwabo kubazibukile kutanda na kusoneka.
^ Nambe “na liboko lyobe.”
^ Nambe “kunangula.”
^ Nambe “bimweso.”
^ Taleni Majwi Abanalumbununa.
