Bisamu 105:1-45
-
Bilinga bya Yehova bya kulongwa ku banu bendi
105 Kandeleleni Yehova, saneni ha lizina lyendi,Ambululeni bilinga byendi ku miyati ya banu.
2 Mwimbileni, mwimbileni myaso ya kumushangazala.
Singanyekeseseni ha* bipangi byendi byoshe bya kukomokesa.
3 Lishasheni mwafwa ya lizina lyendi lya kujela.
Bimbunge bya baje batonda Yehova bibwahelele.
4 Shakezekeni Yehova na nzili yendi.
Tondeni cihanga cendi simbu yoshe.
5 Anukeni bipangi byendi bya kukomokesa byanapanga,Anukeni bikomokeso byendi na kusompa mu kusungama kwendi,
6 Eni batekulwila* ba Abrahamu ngamba yendi,Eni bana ba Jakobu baje banangula.
7 Ikeye Yehova Njambi Yetu.
Majwi endi a kusompa anajalakana ha lifuti-libu hoshe.
8 Anuka cikumiiyo cendi myaka yoshe,Kebala cikulaheso cakulahesele* banu bendi,
9 Cikumiiyo calikumiiye na Abrahamu,Na kulisinga kwalisingile kuli Isaki,
10 Kuje kwazamekele ngwe lishiko kuli Jakobu,Ngwe cikumiiyo ca myaka yoshe kuli Isalele.
11 Ngwendi, “Njikwana lifuti lya KananaKupwa buswana bwobe.”
12 Ha simbu ije bapwile babandondo,Eyo, babandondo manene, co bapwile baka-kwija.
13 Bakele na kuyebangela kutunda mu lifuti limo kuya mu lifuti likwaboNa kutunda mu bumwene obu kuya mu bumwene bukwabo.
14 Katabesele munu woshe-woshe abalyatelele,Oloni wendekelele bimyene mwafwa yabo,
15 Ngwendi, “Keti mukwate bakubwabesa bange,Co keti mulinge cuma cacibi ku tupolofweto bange.”
16 Wanenele njala yakama mu lifuti.
Wakehesele byakulya byabo.
17 Watumine munalume kulutwe lwabo,Jozefu uje ibalandesele ngwabo akapwe ndungo.
18 Mendi endi bawakutile* na malyenge.
Singo yendi bayakele mu bikubo.
19 Majwi a Yehova amujeleseleKweta noho hawalishulisilile majwi endi.
20 Mwene washikile ngwendi bamusokole,Muka-kuyula miyati ya banu wamupatwile.
21 Wamupwisile shukulu ya bakunjibo yendi,Muka-kutala bufuko bwendi bwoshe
22 Mangana endese* bamyata bendi mwoshe mwashakelaNa kulongesa bakulunu bendi mana.
23 Ngeci, Isalele wezile mu Ijipiti,Co Jakobu wayoyele ngwe munu wa ku lifuti lyeka mu lifuti lya Hamu.
24 Njambi walingisile banu bendi basemunwine manene.
Wabalingisile bakale manene na nzili kutubakana bitozi babo.
25 Watabesele bitozi babo batengulule bimbunge byabo na kuzinda banu bendiNa kuyongola bya kulwisa bangamba bendi.
26 Watumine ngamba yendi MosesaNa Aloni uje yangwile.
27 Balingile bikomokeso byendi mukati kabo,Bizibukiso byendi mu lifuti lya Hamu.
28 Wanenele lisusulungu, co mu lifuti mwazibalele.
Kubalwisile majwi endi.
29 Watengulwile mema abo kupwa maningaNa kutsiya bisi babo.
30 Mu lifuti lyabo mwashulile mambotwe,Na mu mapela abo mwoshe.
31 Washikile mazimbe bakobele mu lifutiNa tumbulumbulu bashule mu mitambela yabo yoshe.
32 Watengulwile nyozi yabo kupwa nyozi ya mamanyaNa kutuma mihyato* mu lifuti lyabo.
33 Wabiisile miti yabo ya binyu na mikuyu yaboNa kubiisa miti yoshe ya mu lifuti lyabo.
34 Washikile ngwendi bimbimba bakobele mu lifuti,Bana ba bimbimba babangi manene.
35 Balile bimena byoshe bya mu lifuti,Co balile byuma byoshe bije byamenene hasi.
36 Co watsiile bantwatwa boshe ba mu lifuti lyabo,Mashangumukilo a nzili yabo ya kukita.
37 Watuhwisile banu bendi mu lifuti na siuva na goldi.
Co naumo wahi hakati kabo watanukile.
38 Banu ba mu Ijipiti babwahelelele, baIsalele mubatuhukileMwafwa babazibilile manene lyoba.
39 Wajangumwine lishelwa mangana libazikinineNa kushwameka tuhya mangana tubatetekele butsiki.
40 Balombele, co wabanenelele makokwa.
Watwaleleleleho kubashuka na byakulya bya mwilu.
41 Watabwile limanya, co mema angongomokele.
Etile mu mambo ngwe ndonga.
42 Mwafwa wanukile cikulaheso ca kujela cakulahesele ngamba yendi Abrahamu.
43 Ngeci watuhwisile banu bendi oku bali na kulisamba,Watuhwisile banu bendi bangwile oku bali na kulumwina bingunda.
44 Wabanene mitambela ya baka-mafuti.
Baswanene byuma bibondanganene bakwabo,
45 Mangana banyunge mashiko endiNa kwononoka mashiko endi.
Shangazaleni Jah!*
Majwi a kwinikila
^ Nambe hamo “Ambululeni.”
^ Lijwi na lijwi “mbuto.”
^ Lijwi na lijwi “Lijwi lyashikile.”
^ Lijwi na lijwi “bawayandesele.”
^ Lijwi na lijwi “akute.”
^ Nambe “milangi ya tuhya.”
^ Nambe “Haleluya!” “Jah” inapu kubatwila lizina lya Yehova.
