Bisamu 119:1-176
-
Kukandelela ku Lijwi lya Njambi lya seho
-
‘Bakwenje basa kunyunga bati ngila yabo ipwe ya kujela?’ (9)
-
“Njazema byanukiso byobe” (24)
-
“Njazema manene lishiko lyobe” (97)
-
“Kuzibisisa manene kutubakana balongesi bange boshe” (99)
-
“Lijwi lyobe lyapwa ndeya ku mendi ange” (105)
-
“Lijwi lyobe lyoshe lyapwa busunga” (160)
-
Baje bazema lishiko lya Njambi bali mu kwoloka (165)
-
א [Alefu]
119 Banabwahelela baje kubesi naha hakubapayela* mu kuyoya kwabo.Baje benda mu lishiko lya Yehova.
2 Banabwahelela baje banyunga byanukiso byendi,Baje bamutonda na bimbunge byabo byoshe.
3 Kubesi kulinga byuma bya kujeneka kusungama.Bakende mu bingila byendi.
4 Unashiki ngwobeMashiko obe bawanyunge mwamubwa.
5 Njashaka kwimana mbe*Mangana njinyunge mashiko obe.
6 Kunjizibi shwamwaNga njisinganyekesesa mashiko obe oshe.
7 Njikushangazala na mbunge ya kusungamaNga njililongesa mashiko obe a kusungama.
8 Njinyunga mashiko obe
Keti unjumbile kuti.
ב [Bethi]
9 Mukwenje asa kunyunga bati ngila yendi ipwe ya kujela?
Nga atwalelelaho kulinyunga kwesekesa na lijwi lyobe.
10 Njili na kukushakezeka na mbunge yange yoshe.
Keti unjecelele njitunde ku mashiko obe.
11 Njitulika majwi obe mu mbunge yangeMangana keti njilinge bubi ku mesho obe.
12 Bakushangazale, Obe Yehova.Njilongese mashiko obe.
13 Njambulula na kanwa kangeMashiko obe oshe aunendeka
14 Byanukiso byobe bikanjizibisa kubwahaKutubakana byuma byoshe bya seho.
15 Njisinganyekesesa* mashiko obeNa kutalesa mesho ange ha bingila byobe.
16 Njazema mashiko obe.
Kunjikebala lijwi lyobe.
ג [Gimeu]
17 Linga mwamubwa ngamba yobeMangana njiyoye, na kunyunga lijwi lyobe.
18 Tonesa mesho ange mangana njimone mwamubwaByuma bya kukomokesa bili mu lishiko lyobe.
19 Nji munu wa kutunda ku lifuti lyeka muno mu lifuti.
Keti unjishwekele mashiko obe.
20 Simbu yoshe njili na cishota mbungeCa kushaka kuzibuka mashiko obe.
21 Utenukila banu ba kulyalesa,Banu ba kusingiwa baje batunda ku mashiko obe.
22 Balingise balikele kunjishendumuna na kunjishaulaMwafwa njinanyungu byanukiso byobe.
23 Nameme bimyata batumama hamo na kunjendeka mwamubi,Ngamba yobe asinganyekesesa* mashiko obe.
24 Njazema byanukiso byobeBikanjinangula.
ד [Dalethi]
25 Njibulumana mu likungu.
Njinyunge kwesekesa na lijwi lyobe.
26 Njakulekele bingila byange, co wanjikumbulwile.Njilongese mashiko obe.
27 Njikwase njizibisise biwalumbununa* mashiko obeMangana njisinganyekesese ha* bipangi byobe bya kukomokesa.
28 Kunjesi na kumona tulo mwafwa ya busiwa.
Njikanyamese kwesekesa na lijwi lyobe.
29 Njikwase mangana keti njipwe muka-makuli,Co njizibile ngozi mangana njizibuke lishiko lyobe.
30 Njinangula ngila ya kulongwa.
Njizibuka ngwange mashiko obe a kusungama.
31 Njakakateya ku byanukiso byobe.
Obe Yehova, keti unjecelele banjizibise shwamwa.
32 Njikabangeya manene* ngila ya mashiko obeMwafwa waibwahesela mutamba mu mbunge yange.*
ה [He]
33 Obe Yehova, njilongese ngila ya mashiko obe,Co njiikabangeya kweta na kushongo.
34 Njikwase njipwe muka-kuzibisisaMangana njikabe lishiko lyobeNa kulinyunga na mbunge yange yoshe.
35 Njitwamenene* mu ngila ya mashiko obeMwafwa njaishaka.
36 Talesa mbunge yange ku byanukiso byobe,Keti ku kuwana byuma binjishaka lika yange.*
37 Tundisa mesho ange ku byuma byangoco.Njinyungilile mu ngila yobe.
38 Shulisilila cikulaheso cobe* kuli ngamba yobeMangana banu bakuzibile lyoba.*
39 Njitundise shwamwa ije ili na kunjizibisa lyobaMwafwa mashiko obe apwa amabwa.
40 Tala munjashungwiiya mashiko obe.
Njinyungilile kwesekesa na kusungama kwobe.
ו [Wau]
41 Njimwese cizemo cobe cije kucesi kutenguluka, Obe Yehova.Njobole kwesekesa na cikulaheso cobe,*
42 Co njikumbulula uje ali na kunjishendumunaMwafwa njakulahela lijwi lyobe.
43 Keti utundisilile lijwi lya busunga mu kanwa kangeMwafwa njalabelela* kusompa kwobe.
44 Njitwalelelaho kunyunga lishiko lyobeMyaka yoshe.
45 Co njenda mu mwela wa kujeneka bushondeMwafwa njishakezeka mashiko obe.
46 Njendeka bya byanukiso byobe ku mesho a bimyene,Co kunjizibi shwamwa.
47 Njazema mashiko obe,Eyo njawazema.
48 Njilombela kuli yobe oku njajundula maboko ange mwafwa ya mashiko obe aje anjazema,Co njisinganyekesesa mashiko obe.
ז [Zayini]
49 Anuka lijwi* lyobe liwendekele kuli ngamba yobeLije liukapangesa mu kunjana lilabelelo.*
50 Ebi bikebyo bikanjizembeleka mu kayando kangeMwafwa biukendeka binanyungilila mwonyo wange.
51 Munu wa kulyalesa ali na kunjishendumuna manene,Oloni yange kunjitundu ku lishiko lyobe.
52 Njanuka kusompa cobe ca kusañulu, Obe Yehova,Co cinjizembeleka.
53 Njinalubala manene mwafwa ya banu bababiBaje bakombila lishiko lyobe.
54 Mashiko obe apwa myaso kuli yangeKwoshe-kwoshe kunjikala.*
55 Ku butsiki njanuka lizina lyobe, Obe Yehova,Mangana njinyunge lishiko lyobe.
56 Omu mukemwo munjikalingiMwafwa njinanyungu mashiko obe.
ח [Hethi]
57 Yehova ikeye mutamba wange.Njinakulahesa kunyunga majwi obe.
58 Njikulambelela* na mbunge yange yoshe.Njizibile ngozi kwesekesa na cikulaheso cobe.*
59 Njinelula bingila byangeMangana njilwise lalo mendi ange ku byanukiso byobe.
60 Njizambula kunyunga mashiko obe,Kunjishwala.
61 Mikole ya banu bababi inanjizengazenga,Oloni kunjibala lishiko lyobe
62 Mukati ka butsiki njinduka na kukukandelelaMwafwa ya kusompa kwobe kwa kusungama.
63 Nji kabusamba ka baje boshe bakakuzibila lyobaNa baje bakanyungu mashiko obe.
64 Obe Yehova, cizemo cobe cije kucesi kutenguluka cashulu ha lifuti-libu.Njilongese mashiko obe.
ט [Tethi]
65 Obe Yehova, unalingi mwamubwa ngamba yobe,Kwesekesa na lijwi lyobe.
66 Njilongese mana na manganaMwafwa njinakulahela mashiko obe.
67 Simbu kanda njiyande, njakele na kungumuka.*Oloni hano njili na kunyunga lijwi lyobe.
68 Uwamubwa na bipangi byobe byabibwa.
Njilongese mashiko obe.
69 Banu ba kulyalesa bali na kunjikutiiya biñanda bya makuli,Oloni yange njinyunga mashiko obe na mbunge yange yoshe.
70 Bimbunge byabo binambumbula,Oloni yange njazema lishiko lyobe.
71 Cabwaha munjinayandaMangana njililongese mashiko obe.
72 Lishiko liunendeka lyalibwa kuli yangeKutubakana makulukazi a goldi na siuva.
י [Yodi]
73 Maboko obe anjimungile na kunjitanga.
Njikwase njipwe muka-kuzibisisaMangana njililongese mashiko obe.
74 Baje bakakuzibila lyoba mubanjimona babwahelela,Mwafwa lijwi lyobe likelyo lilabelelo lyange.*
75 Obe Yehova, njizibuka ngwange kusompa kwobe kwapwa kwa kusungama,Co unanjiyandesa mwafwa ya kulongwa kwobe.
76 Shukulu-kambu, cizemo cobe cije kucesi kutenguluka cinjizembelekeKwesekesa na cikulaheso* ciwakulahesele ngamba yobe.
77 Njitetele mangana njitwaleleleho kuyoyaMwafwa njazema lishiko lyobe.
78 Banu ba kulyalesa bazibe shwamwaMwafwa bakanjibulumuna kwa kujeneka binjinabalingi.
Oloni yange njisinganyekesesa* mashiko obe.
79 Baje bakakuzibila lyoba beluke kuli yange,Baje bazibuka byanukiso byobe.
80 Mbunge yange keti ikale naha hakuipayela munjikabangeya mashiko obeMangana keti banjizibise shwamwa.
כ [Kafu]
81 Njashungwiya kwobola kwobeMwafwa lijwi lyobe likelyo lilabelelo lyange.*
82 Mesho ange anashungwiya biwendekaOku njendeka ngwange: “Unjizembeleka tangwa lika?”
83 Mwafwa njinafu ngwe ngonga ya cilambu ibanomisila mu bwisi,Oloni kunjibala mashiko obe.
84 Ngamba yobe abandamena matangwa angahi?
Tangwa lika usompa baje bali na kunjiyandesa?
85 Banu ba kulyalesa bali na kunjindila mena,Baje kubesi kwononoka lishiko lyobe.
86 Mashiko obe oshe apwa a busunga.
Banu bali na kunjiyandesa kwa kujeneka binjinabalingi. Njikwase!
87 Hahandende banjinyongese ha lifuti-libu,Oloni kunjasezele mashiko obe.
88 Njinyungilile mwafwa ya cizemo cobe cije kucesi kutengulukaMangana njinyunge byanukiso byobe biunendeka.
ל [Lamedi]
89 Obe Yehova, lijwi lyobeLitwalelelaho kukala mwilu myaka yoshe.
90 Kulongwa kwobe kukalako ku bisemwa byoshe.
Unazameka lifuti-libu mangana litwaleleleho kukalako.
91 Mwafwa ya kushika kwobe binatwalelelaho* kukalako kwa kweta na lelo linoMwafwa byoshe byapwa bangamba bobe.
92 Ngwe kunjazemene lishiko lyobe, ngwe njinanyongo lajaMwafwa ya kayando kange.
93 Kunjikebala mashiko obeMwafwa akewo aunapangesa mu kunjinyungilila.
94 Njinakundama kuli yobe,Njobole mwafwa njinashakezeka mashiko obe.
95 Banu bababi banabandamena kunjinyongesa,Oloni njaka mbunge ku byanukiso byobe.
96 Njalimwena ngwange byuma byoshe bya kulumbunuka byakala naha habyasikisila,Oloni lishiko lyobe kulyakele naha halyasikisila.*
מ [Memu]
97 Njazema manene lishiko lyobe,
Njikalisinganyekesesa* litangwa lyoshe lyamutunu.
98 Lishiko lyobe lili na kunjilingisa njipwe wa kunyanyama kutubakana bitozi bangeMwafwa lili nange myaka yoshe.
99 Nji munu wa kuzibisisa manene kutubakana balongesi bange bosheMwafwa njikasinganyekesesa* ha byanukiso byobe.
100 Njikalingi byuma mu kuzibisisa kutubakana bakulunuMwafwa njikanyungu mashiko obe.
101 Njikabyana kwenda mu ngila yoshe-yoshe yaibiMangana njinyunge lijwi lyobe.
102 Kunjesi kutunda ku mashiko obeMwafwa unanjilongesa.
103 Majwi obe atobala mu ndakwilo yange,Atobala kutubakana buki mu kanwa kange.
104 Mwafwa ya mashiko obe njikalingi byuma mu kuzibisisa.
Mukemwo njazinda ngila yoshe ya makuli.
נ [Nuni]
105 Lijwi lyobe lyapwa ndeya ku mendi angeNa ceke mu ngila yange.
106 Njinalisingi ngwange njinyunga mashiko obe a kusungama,Co njilinga bene ngoco.
107 Bananjiyandesa manene.
Obe Yehova, njinyungilile kwesekesa na lijwi lyobe.
108 Shukulu-kambu, milambu yange ya kukushangazala ya kutundilila kwisi ya mbunge*ikuzibise kubwaha, Obe Yehova,Co njilongese mashiko obe.
109 Mwonyo wange uli mu bushonde simbu yoshe,*Oloni kunjebalele lishiko lyobe.
110 Banu bababi bananjitela muhetoOloni kunjatundile ku mashiko obe.
111 Njamona byanukiso byobe kupwa bufuko* bwange bwa myaka yosheMwafwa bikalingisa mbunge yange ibwahelele.
112 Njinalyangwila* kwononoka mashiko obeSimbu yoshe kweta na ku mamaneselelo a kuyoya kwange.
ס [Sameki]
113 Njazinda banu ba bimbunge bibali,Oloni njazema lishiko lyobe.
114 Yobe mwela wange wa kubanda na ntelo yangeMwafwa lijwi lyobe likelyo lilabelelo lyange.*
115 Njishondolokeni eni banu bababiMangana njononoke mashiko a Njambi yange.
116 Njikwase ngwe muwanjikulahesele*Mangana njitwaleleleho kuyoya.Keti utabese lilabelelo lyange litenguluke kupwa shwamwa.
117 Njikwase mangana njoboke,Co simbu yoshe njaka mbunge ku mashiko obe.
118 Ubyana boshe baje batunda ku mashiko obe,Mwafwa bapwa baka-makuli na kukwisa.
119 Umbila banu bababi boshe ba ha lifuti-libu ngwe uje ombila mazilo.
Mukemwo njazema byanukiso byobe.
120 Kukuzibila lyoba kulingisa mubila* wange ujaje,Njili mu lyoba mwafwa ya kusompa kwobe
ע [Ayini]
121 Njalingi byuma byabibwa na byuma bya kusungama.
Keti unjecelele mu maboko a baje bali na kunjilyatelela.
122 Kulahesa ngwobe ngamba yobe akala mwamubwa.Banu ba kulyalesa keti banjilyatelele.
123 Mesho ange anajuka kubandamena kwobola kwobeNa cikulaheso* cobe ca kusungama.
124 Mwesa ngamba yobe cizemo cobe cije kucesi kutengulukaNa kunjilongesa mashiko obe.
125 Nji ngamba yobe. Njikwase njipwe nji munu wa kuzibisisa,Mangana njizibuke byanukiso byobe.
126 Simbu ya Yehova ya kulingako bimo ineteMwafwa banapokola lishiko lyobe.
127 Mukemwo njazema mashiko obeKutubakana goldi, nameme bene goldi yaibwa manene.*
128 Ngeci, njamona bilongesa* byoshe bya kutunda kuli yobe kupwa byabibwa.Njazinda ngila yoshe ya makuli.
פ [Pe]
129 Byanukiso byobe byapwa byabibwa.
Mukemwo njinabinyungu.
130 Kujombolola majwi obe kunena ceke.Kulingisa baka-kujeneka mana bapwe baka-kuzibisisa.
131 Njashama manene mu kanwa kange na kututumwisa,*Mwafwa ya kushungwiya mashiko obe.
132 Tengulukila kuli yange na kunjizibila ngoziKwesekesa nomu muukasompela baje bazema lizina lyobe.
133 Njitwamenene na lijwi lyobe mangana njende mu ngila ya kujeneka bushonde.Keti kukale cuma cacibi cinjendesa.
134 Njamene* ku baka-kulyatelela,Co njinyunga mashiko obe.
135 Lingisa cihanga cobe cibyakwile* ngamba yobeNa kunjilongesa mashiko obe.
136 Misozi ili na kunjululuka mu mesho angeMwafwa banu kubesi na kunyunga lishiko lyobe.
צ [Sade]
137 Uwakusungama, Obe Yehova,Co kusompa kwobe kwakubwa.
138 Byanukiso biukaka bya kusungama,Co banu basa kubikulahela manene.
139 Ntwima yange injilyaMwafwa bitozi bange banebala majwi obe.
140 Lijwi lyobe linajele manene,Co ngamba yobe walizema.
141 Nji wamundondo, co bananjombwanesa.Oloni kunjebalele mashiko obe.
142 Kusungama kwobe kwapwa kusungama kwa myaka yoshe,Co lishiko lyobe lyapwa busunga.
143 Nameme kayando na bukalu binjizila,Njitwalelelaho kuzema mashiko obe.
144 Kusungama kwa byanukiso byobe kwapwa kwa myaka yoshe.
Njikwase njipwe nji munu wa kuzibisisa mangana njitwaleleleho kuyoya.
ק [Kofu]
145 Njitambeka kuli yobe na mbunge yange yoshe. Njikumbulule, Obe Yehova.
Njinyunga mashiko obe.
146 Njitambeka kuli yobe. Njobole!
Njinyunga byanukiso byobe.
147 Njinenduka simbu kanda kukye* mangana njitambeke na kulomba bukwasiMwafwa majwi obe apwa lilabelelo lyange.*
148 Njinyangumuka mukati ka butsikiMangana njisinganyekesese* lijwi lyobe.
149 Tolilila ku lijwi lyange mwafwa ya cizemo cobe cije kucesi kutenguluka.
Obe Yehova, njinyungilile kwesekesa nomu muukakwila mu kusungama.
150 Baje bakalingi byuma bya shwamwa bashwena muyehi.Bali kulako na lishiko lyobe.
151 Obe Yehova, wakala muyehi,Co mashiko obe oshe apwa busunga.
152 Kusañulu, njalilongesele bya byanukiso byobe.Njalilongesele ngwange wabizameka mangana bikaleko myaka yoshe.
ר [Reshi]
153 Tala kayando kange na kunjamenaMwafwa kunjebalele lishiko lyobe.
154 Njilwile na kunjamena.Njinyungilile kwesekesa na cikulaheso cobe.*
155 Kwoboka kuli kulako na banu bababiMwafwa kubashakezekele mashiko obe.
156 Kutetela kwobe kwapwa kwakama, Obe Yehova.
Njinyungilile kwesekesa nomu muukakwila mu kusungama.
157 Bakakunjiyandesa na bitozi bange babangi,Oloni kunjangunukile ku byanukiso byobe.
158 Njikazibi bunyengwe munjikatala baka-kukwisaMwafwa kubesi kunyunga lijwi lyobe.
159 Tala munjazemena mashiko obe!
Obe Yehova, njinyungilile mwafwa ya cizemo cobe cije kucesi kutenguluka.
160 Lijwi lyobe lyoshe lyapwa busungaCo mashiko obe oshe a kusungama akalako myaka yoshe.
ש [Sini] nambe [Shini]
161 Bimyata bali na kunjiyandesa kwa kujeneka binjinabalingiOloni mbunge yange izibila majwi obe lyoba.
162 Njibwahelela mwafwa ya lijwi lyobeNgwe munu uje napukula byuma byabingi.
163 Njazinda makuli. Njawazinda manene.Njazema lishiko lyobe.
164 Njikushangazala bisimbu 7 ha litangwaMwafwa ya kusompa kwobe kwa kusungama.
165 Baje bazema lishiko lyobe bali mu kwoloka kwakama.Nacimo cahi casa kubatanwisa.
166 Njilabelela bilinga byobe bya kwobola, Obe Yehova,Na kunyunga mashiko obe.
167 Njikanyungu byanukiso byobe,Co njabizema manene.
168 Njikanyungu mashiko obe na byanukiso byobeMwafwa uzibuka byoshe binjikalingi.
ת [Tau]
169 Kulila kwange kwa kulomba bukwasi kwete kuli yobe, Obe Yehova.
Njikwase njipwe nji munu wa kuzibisisa kwesekesa na lijwi lyobe.
170 Kulomba kwange kwa kunjizibila ngozi kwete ku mesho obe.
Njobole ngwe muunakulahesela.*
171 Tunwa twange tukushangazale maneneMwafwa ukanjilongesa mashiko obe.
172 Ndaka yange imbe bya lijwi lyobeMwafwa mashiko obe oshe apwa a kusungama.
173 Liboko lyobe lilibwahesele kunjikwasaMwafwa njinalyangwila kwononoka mashiko obe.
174 Njashungwiya kwobola kwobe, Obe Yehova,Co njazema lishiko lyobe.
175 Njitabese njitwaleleleho kuyoya mangana njikushangazale.Mashiko obe anjikwase.
176 Njili na kuyebangela ngwe manga wa kuzimbala.Shakezeka ngamba yobe mwafwa kunjebalele mashiko obe.
Majwi a kwinikila
^ Nambe “bakulongwa.”
^ Lijwi na lijwi “Bingila byange bikanyame.”
^ Nambe “Njililongesa.”
^ Nambe “alilongesa.”
^ Lijwi na lijwi “bingila bya.”
^ Nambe “njililongese.”
^ Lijwi na lijwi “Njishatuka mu.”
^ Nambe hamo “walingisa mbunge yange isimpe.”
^ Nambe ”Njilingise njende.”
^ Nambe ”ku profiti .”
^ Nambe “byuma biunendeka.”
^ Nambe hamo “Cibanabwahesela baje bakuzibila lyoba.”
^ Nambe “byuma biunendeka.”
^ Nambe “njabandamena.”
^ Nambe “cikulaheso.”
^ Nambe “Lije liwanjilingisile njibandamene.”
^ Nambe “Mu njibo munjikala ngwe munu wa ku lifuti lyeka.”
^ Nambe “Njibotsiisa cihanga cobe.”
^ Nambe “byuma biunendeka.”
^ Nambe “kulinga bubi kwa kujeneka kuzibuka.”
^ Nambe “Njibandamena lijwi lyobe.”
^ Nambe “byuma biunendeka.”
^ Nambe “njililongesa.”
^ Nambe “Njibandamena lijwi lyobe.”
^ Kulumbununa byakutanga byoshe.
^ Lijwi na lijwi “lyajangumuka manene.”
^ Nambe “Njikalilongesalyo.”
^ Nambe “njikalilongesa.”
^ Lijwi na lijwi “milambu ya mu kanwa kange ya kutundilila kwisi ya mbunge.”
^ Nambe “Mwonyo wange uli mu liboko lyange simbu yoshe.”
^ Nambe “buswana.”
^ Lijwi na lijwi “Njinaka mbunge yange ku.”
^ Nambe “Njibandamena lijwi lyobe.”
^ Nambe “Njikwase kwesekesa na byuma biwendekele.”
^ Lijwi na lijwi “situ.”
^ Nambe “byendeka.”
^ Nambe “ibanajelesa.”
^ Nambe “mashiko.”
^ Lijwi na lijwi “kuhwimasana.”
^ Lijwi na lijwi “Njipatule.”
^ Nambe “cimweswile.”
^ Nambe “muje njwa.”
^ Nambe “Njibandamena majwi obe.”
^ Nambe “njililongese.”
^ Nambe “byuma biunendeka.”
^ Nambe “Njobole kwesekesa na byuma biunendeka.”