Bisamu 138:1-8
Mwaso wa Devidi.
138 Njikushangazala na mbunge yange yoshe.
Njikwimbila myaso ya kukushangazalaKu mesho a binjambi beka.*
2 Njitsikama oku njinatala ku tempele yobe ya kujela*Na kushangazala lizina lyobeMwafwa ya cizemo cobe cije kucesi kutenguluka na kulongwa kwobe.
Mwafwa unamesa lijwi lyobe na lizina lyobe kutubakana byuma byoshe.*
3 Ha litangwa linjasanene, wanjikumbulwile.
Wanjisimpisile na kunjikanyamesa.
4 Bimyene ba ha lifuti-libu boshe bakakushangazala, obe Yehova,Mwafwa bakaziba bikulaheso biunakulahesa.
5 Bakaimba bya bingila bya YehovaMwafwa bumpau bwa Yehova bwakama.
6 Nameme Yehova wakala hakamwa, akananguka munu wa kulikehesa,Oloni munu wa kulyalesa amuzibukila lika halako.
7 Nameme njenda mukati ka bushonde, unjinyungilila.
Wolwela liboko lyobe ku butenu bwa bitozi bange,Liboko lyobe lya cilyo linjobola.
8 Yehova anjilingila byuma byoshe.
Obe Yehova, cizemo cobe cije kucesi kutenguluka cakalako myaka yoshe.
Keti umbile kuti bipangi bya maboko obe.
Majwi a kwinikila
^ Nambe hamo “Njikwimbila myaso mangana njishaule binjambi beka.”
^ Nambe “mwela wobe wa kujela.”
^ Nambe hamo “unamesa lijwi lyobe kutubakana lizina lyobe.”
