Bisamu 145:1-21
Mwaso wa Devidi wa kushangazala.
א [Alefu]
145 Njikwamesa, Obe Mwene Njambi yange,Njishangazala lizina lyobe myaka yoshe.
ב [Bethi]
2 Njikushangazala litangwa lyoshe lyamutunu,Njishangazala lizina lyobe myaka yoshe.
ג [Gimeu]
3 Yehova wapwa wakama, co ikeye ibanapande kushangazala manene.Bukama bwendi naumo wahi asa kubuzibisisa.
ד [Dalethi]
4 Cisemwa ciliko ha simbu ino na bisemwa bija kulutwe bishangazala bipangi byobe.Bakendeka bya bipangi byobe bya nzili.
ה [He]
5 Bakendeka bya bumpau bwobe na bukama bwobe,Co njisinganyekesesa ha bipangi byobe bya kukomokesa.
ו [Wau]
6 Bakendeka bya bilinga byobe bya kutewesa,*Co njambulula bukama bwobe.
ז [Zayini]
7 Bakendeka na ntwima mubakanuka bubwa bwobe bwakama,Co bakatambeka mu kubwahelela mwafwa ya kusungama kwobe.
ח [Hethi]
8 Yehova wakala na mema ku mbunge,* wapwa muka-kutetela,Kesi kulubala bwasi, co wakala na cizemo cakama cije kucesi kutenguluka.
ט [Tethi]
9 Yehova wapwa wamubwa ku banu boshe,Co kutetela kwendi kukasholoka mu bipangi byendi byoshe.
י [Yodi]
10 Obe Yehova, bipangi byobe byoshe bikwana bumpau,Co bakulongwa bobe bakushangazala.
כ [Kafu]
11 Bambulula bya bumpau bwa bumwene bwobeNa kwendeka bya nzili yobe,
ל [Lamedi]
12 Mangana bambulwile banu bilinga bya nzili yobeNa bumpau bwa bumwene bwobe.
מ [Memu]
13 Bumwene bwobe bwapwa bumwene bwa myaka yoshe,Co kuyula kwobe kukalako ku bisemwa byoshe.
ס [Sameki]
14 Yehova akakwasa boshe baje bali na kuwaNa kwandula baje banakulama.
ע [Ayini]
15 Mesho oshe anatala na lilabelelo kuli yobe.Ukabana byakulya byabo ha simbu inapande.
פ [Pe]
16 Ujangumuna liboko lyobeNa kwana byuma byoshe bya kuyoya byuma bibishungwiya.
צ [Sade]
17 Yehova wapwa wa kusungama mu bingila byendi byoshe,Wa kulongwa mu byuma byoshe byakalingi.
ק [Kofu]
18 Yehova ali muyehi na baje boshe bali na kutambeka kuli ikeye,Baje bali na kutambeka kuli ikeye mu busunga.*
ר [Reshi]
19 Baje bakamuzibila lyoba akabana byuma bibashungwiya.Akazibi kulila kwabo kwa kulomba bukwasi na kubamena.
ש [Shini]
20 Yehova akanyungu boshe baje bamuzema,Oloni banu bababi boshe akabanyongesa.
ת [Tau]
21 Kanwa kange kashangazala Yehova.Cuma coshe ca kuyoya cishangazale lizina lyendi lya kujela myaka yoshe.
