Bisamu 17:1-15
Lilombelo lya Devidi.
17 Obe Yehova, tolilila kulambelela kwange kwa kulomba kunjakwila mu kusungama,Tolilila mwamubwa ku kulila kwange kwa kulomba bukwasi,Tolilila lilombelo lyange lya kujeneka makuli.
2 Njakwile mu kusungama,Mesho obe amone byabibwa.
3 Unelula mbunge yange, unanjilula ku butsiki,Unanjijelesa,Muunjilula, uwana ngwobe nabumo butumbe bwabubi bunjinatumbu bwahi,Co kanwa kange kukapokwele lishiko.
4 Kutalesa ku bipangi bya banu,Njinabyana bingila bya lipwepwe,* kwesekesa na majwi a kutunda mu kanwa kobe.
5 Njikwase njitwaleleleho kwenda mu bingila byobeMangana mendi ange keti atanuke.
6 Obe Njambi, njikusana, mwafwa unjikumbulula.
Jendekela litwi lyobe* kuli yange. Ziba majwi ange.
7 Obe Mwobole wa baje batewela ku liboko lyobe lya cilyoKutewa baje banakutengulukila,Mwesa cizemo cobe cije kucesi kutenguluka mu ngila ya kukomokesa.
8 Njinyungilile ngwe muñandi wa lisho lyobe,Njishweke mu munzinze wa mambaba obe.
9 Njinyungilile ku banu bababi baje bali na kunjilwisa,Ku bitozi bange* baje bananjizengeleka.
10 Bimbunge byabo binashiliwa,Bali na kulijundula mu byendeka byabo,
11 Co banatushetula,Banabandamena kuwana ngila ya kutwandumwinamo.*
12 Umo na umo wabo nafu ngwe ndumba uje ashaka kusanyozola kasitu,Nafu ngwe muna ndumba uje ayomba* tusitu.
13 Katuka, Obe Yehova, ubalwise na kubawisila hasi,Njamene* ku banu bababi na mukwale wobe.
14 Obe Yehova, njamene na liboko lyobe,Ku banu ba muno mu kaye,* baje banaka mbunge ku kuyoya kwa matangwa ano,Baje baukutisa na byuma byabibwa biukanaBaje basezela bana babo babangi buswana.
15 Oloni ngeci mwangeni, mwafwa ya kuyoya mu kusungama, njimona cihanga cobe,Co njinajauka kwindukila ku mesho obe.*
Majwi a kwinikila
^ Nambe “mwizi.”
^ Nambe “Kulama na kutolilila.”
^ Nambe “bitozi ba mwonyo wange.”
^ Nambe “kutundamwina hasi.”
^ Nambe “amwengelela.”
^ Nambe “Amena mwonyo wange.”
^ Nambe “ba mu katumameno ka myaka ino.”
^ Nambe “kumona cifwa cobe.”
