Bisamu 19:1-14
Kuli muka-kutwamenena. Mwaso wa Devidi.
19 Melu ali na kwambulula bumpau bwa Njambi,Bukambwila buli na kwambulula bipangi bya maboko endi.
2 Ha litangwa na litangwa bikendeka,Co butsiki na butsiki bikajombolola mangana endi.
3 Kubyesi kutuhula majwi, co kubyesi kutumbula majwi hawo,Majwi abyo kuwesi kuzibika.
4 Oloni cilumo cabyo cinazibika ha lifuti-libu hoshe,Co muzimbu wabyo unaketa na ku mamaneselelo a lifuti-libu.
Litangwa nalijangumwina tenti mwilu,
5 Linapu ngwe cambato uje atuhuka mu njibo,Lili na kubwahelela ngwe munalume wa nzili uje ashatuka mu ngila yanezilila.
6 Lituhuka kushongo imo ya lilu,Co lilizenga na kuya kushongo ikwabo ya lilu,Co nacimo cahi cibanda kushaluka kwalyo.
7 Mashiko a Yehova apwa a kulumbunuka, elwisila munu nzili.*
Byanukiso bya Yehova byapwa bya busunga, bilingisa munu uje kesi na lyezi akale na mana.
8 Mashiko a kutunda kuli Yehova apwa a kusungama, alingisa mbunge ibwahelele.
Mashiko a Yehova apwa a kujela, alingisa mesho atwe ceke.
9 Kuzibila Yehova lyoba kwapwa kwakubwa,* kwapwa kwa myaka yoshe.
Mashiko a Yehova apwa a busunga, oshe apwa a kusungama.
10 Azibisa kubwaha ku mbunge kutubakana goldi,Amabwa kutubakana goldi yaibwa manene,*Atobala kutubakana buki, kutubakana mwenga wa buki.
11 Unanangula ngamba yobe kupangesa awa mashiko,Mu kuwanyunga muli cikandelela cakama.
12 Iya asa kunanguka kusebuka kwendi?
Keti unjitandele milonga ya bubi buje kunjanangukile.
13 Nyungilila ngamba yobe ku bilinga bya kulyalesa,Keti ubyecelele binjihyane.
Co njipwa nji wa mutunu,Na kujeneka kulinga bubi bwakama.*
14 Majwi a mu kanwa kange na bisinganyeka bya mu mbunge yangeBikuzibise kubwaha, obe Yehova, Limanya lyange na Muka-kunjipatula.
Majwi a kwinikila
^ Nambe “mwonyo.”
^ Nambe “kwa kujela.”
^ Nambe “ibanajelesa.”
^ Nambe “Na kujeneka kulinga bubi kwa kujeneka kuziba shwamwa.”
