Bisamu 22:1-31
Kuli muka-kutwamenena; Cilumo ca mwaso cibasana ngwabo “Mbambi wa Lwabo wa Mutondo.”* Mwaso wa Devidi.
22 Njambi yange, Njambi yange, bika biunanjisezela?
Bika biunemanena kulako kwa kujeneka kunjobola,Kulako kuje kuwasa kuziba miteto yange?
2 Njambi yange, njili na kutwalelelaho kutambeka ku mutanya, oloni kuwesi na kukumbulula.
Co ku butsiki kunjesi na kwoloka.
3 Oloni yobe u wa kujela,Majwi a Isalele a kukushangazala anakuzengeleka.
4 Yobe ibakulahelele batatetu.
Bakukulahelele, co watwaleleleleho kubamena.
5 Balililile kuli yobe, co wabobwele.
Bakukulahelele, co kuwabazibisile shwamwa.
6 Yange nji libuno, keti nji munu.
Banu bali na kunjishendumuna* na kunjombwanesa.
7 Boshe banjimona banjishendumuna,Banjombwanesa na kulipika ku mitwe oku banjishendumuna ngwabo:
8 “Nalyanene kuli Yehova. Amwamene!
Amwobole, mwafwa Njambi wamuzema manene.”
9 Yobe wanjitundisile mwimo lya banana,Yobe wanjilingisile njilizibe ngwange bananjinyungilila munjakele na kujamwa ku mabele a banana.
10 Bananjaka mu maboko obe* kutunda hanjasemukilile,Unapu Njambi yange kutunda hanjatundilile mwimo lya banana.
11 Keti ukale kulako nange mwafwa bukalu buli hayehi.
Kunjesi na mukwasi weka lalo kubanga yobe.
12 Bingombe babangi bananjizengeleka,Bingombe ba nzili ba ku Bashani bananjaka mukati.
13 Bananjashamena tunwa twaboNgwe ndumba uje ali na kubuluma, uje ali na kupapozola kasitu.
14 Bananjitila ngwe mema,Bitsiya byange byoshe binatundu mu ngangu yabyo.
Mbunge yange inapu ngwe sela,Ili na kusangunuka mukati kange.
15 Nzili yange inominina ngwe mbazubwila ya ndeho ya buma,Ndaka yange inakakateya mu ndakwilo yange,Unjinena mu cina njakutse.
16 Tutali bananjizengeleka,Bananjishetula ngwe cibunga ca baka-kulinga byuma byabibi,Bali na kunjishuma ku maboko na ku mendi ngwe ndumba.
17 Njasa kutanda bitsiya byange byoshe.
Bali na kunjitala na kunjiyongola.
18 Balipangela bizalo byange mukati kabo,Co batela biñela cizalo cange.
19 Oloni yobe, obe Yehova, keti ukale kulako.
Yobe nzili yange, zambula mangana wakunjikwase.
20 Njobole* ku mukwale,Obola mwonyo wange ku byala* bya tutali.
21 Njobole ku kanwa ka ndumba na ku mambinga a bingombe ba mu shwata,Njikumbulule na kunjobola.
22 Njambulula lizina lyobe ku bandolome bange,Njikushangazala mukati ka cikungulukilo.
23 Yeni mukazibila Yehova lyoba, mushangazaleni!
Yeni bana* boshe ba Jakobu, mwaneni bumpau!
Yeni bana* boshe ba Isalele, muzibileni lyoba.
24 Mwafwa kombwanesele nambe kuyengula kayando ka munu ibali na kulyatelela,Co kamushwekelele cihanga cendi.
Mwanatambekele kuli ikeye kulomba bukwasi, namuzibile.
25 Njikushangazala mu cikungulukilo cakama.
Njilinga binjinalikumiiya ku mesho a baje bamuzibila lyoba.
26 Banu bababwa bakali na kukuta.
Baje bashakezeka Yehova bakamushangazala.
Likuweni kuyoya* myaka yoshe.
27 Banu boshe ba hasi bakanuka Yehova na kwiluka kuli ikeye.
Binaanga byoshe bya baka-mafuti bikatsikama halutwe lwobe.
28 Mwafwa bumwene bwapwa bwa Yehova,Ayula baka-mafuti boshe.
29 Baka-kufuka ba hasi boshe bakalya na kutsikama,Boshe baje bali na kuya ku likungu bakatsikama halutwe lwendi,Naumo wahi asa kunyungilila mwonyo* wendi.
30 Batekulwila* babo bakamupangela.
Bisemwa bija kulutwe bakabileka bya Yehova.
31 Bakambulula bya kusungama kwendi.
Bakaleka banu baje bakasemuka byanalingi.
Majwi a kwinikila
^ Hamo muyati umo wa cilumo nambe imbisi.
^ Nambe “kunjishaula.”
^ Lijwi na lijwi “Bananjumbila hali yobe.”
^ Nambe “Obola mwonyo wange.”
^ Lijwi na lijwi “maboko.”
^ Lijwi na lijwi “mbuto.”
^ Lijwi na lijwi “mbuto.”
^ Lijwi na lijwi “Mbunge yeni iyoye.”
^ Nambe “kuyoya.”
^ Lijwi na lijwi “Mbuto.”
