Bisamu 34:1-22
Mwaso wa Devidi wembile mwalikwisile kuzaluka ku mesho a Abimeleki. Co wamushekele, ngeci waile.
א [Alefu]
34 Njishangazala Yehova simbu yoshe.Njimushangazala na kanwa kange kushwa kumo.
ב [Bethi]
2 Njilishasha mwafwa ya Yehova.Banu bababotsi bakaziba, co bakabwahelela.
ג [Gimeu]
3 Tubaboshe twameseni Yehova,Twameseni lizina lyendi.
ד [Dalethi]
4 Njalombelele kuli Yehova, co wanjikumbulwile.
Wanjamenene ku byuma byoshe bije byanjizibisile lyoba.
ה [He]
5 Baje batalele kuli ikeye babwahelelele,Kubazibile shwamwa.
ז [Zayini]
6 Ou munu wa kwisi wasanene, co Yehova wamuzibile.
Wamwobwele ku bukalu bwendi bwoshe.
ח [Hethi]
7 Kangelo ka Yehova nazengeleka baje bazibila Njambi lyoba,Co abamena.
ט [Tethi]
8 Makeleni mangana mumone ngweni Yehova wapwa wamubwa.Nabwahelela munu uje atewela kuli ikeye.
י [Yodi]
9 Zibileni Yehova lyoba yeni banu boshe ba kujela,Mwafwa baje bamuzibila lyoba, nacimo cibakajeneka cahi.
כ [Kafu]
10 Nameme bana ba bindumba* ba nzili bali na njala,Oloni baje bashakezeka Yehova, nacimo cuma cacibwa cibakajeneka cahi.
ל [Lamedi]
11 Ijeni bana bange mwakunjitolilile.Njakumilongesa mwakuzibila Yehova lyoba.
מ [Memu]
12 Iya washaka kuyoya hakati keniUje ashaka kumona matangwa amangi amabwa?
נ [Nuni]
13 Nga ngoconi, co nyunga ndaka yobe ku byuma byabibi,Na kanwa kobe ku kwendeka makuli.
ס [Sameki]
14 Tunda ku byuma byabibi, co linga byuma byabibwa.Shakezeka kwoloka na kucikabangeya.
ע [Ayini]
15 Mesho a Yehova anatala banu ba kusungama,Co matwi endi ali na kutolilila ku kulila kwabo kwa kulomba bukwasi.
פ [Pe]
16 Oloni cihanga ca Yehova cinalubalela baje bali na kulinga byuma byabibi,Mangana keti bakabanuke lalo ha lifuti-libu.
צ [Sade]
17 Batambekele, co Yehova wabazibile.Wabamenene ku bukalu bwabo bwoshe.
ק [Kofu]
18 Yehova ali muyehi na baje banapokoka bimbunge.Akobola baje banombwa.*
ר [Reshi]
19 Tuyando* twa munu wa kusungama twatwingi.Oloni Yehova amwamena ku tuyando twoshe otu.
ש [Shini]
20 Ali na kunyungilila bitsiya byendi byoshe,Nacimo cibanapokola cahi.
ת [Tau]
21 Bukalu bukatsiya banu bababi.Baje bazinda munu wa kusungama bakabawana na mulonga.
22 Yehova ali na kupatula myonyo* ya bangamba bendi.Naumo wahi atewela kuli ikeye ibakawana na mulonga.
Majwi a kwinikila
^ Nambe “bana ba bindumba ba kukola.”
^ Nambe “banazeye.”
^ Nambe “Bukalu.”
^ Nambe “kuyoya.”