Bisamu 35:1-28
Mwaso wa Devidi.
35 Obe Yehova, njimanene mu ñanda yange injili nayo na baka-kunjilwisa.Lwisa baje bali na kunjilwisa.
2 Ambata ntelo yobe yaindondo* nei yakama,Co katuka unjilwile.
3 Ambata likunga lyobe na mutaka* wobe mangana ulwise baje bali na kunjisheka.
Njileke ngwobe: “Yange kwoboka kwobe.”
4 Baje bali na kuyomba mwonyo* wange bazibe shwamwa, co bashauke.
Baje bali na kuyongola kunjinyongesa beluke busetanima na shwamwa.
5 Bafwe ngwe lijungu lije lili na kupekumuka na lihunzi.Kangelo ka Yehova abashekele kulako.
6 Kangelo ka Yehova mwabasheka,Mu ngila yabo mukale lisusulungu, co lalo musenete.
7 Mwafwa bananjitela bwanda okuni nebi binjinabalingi byahi.Bananjindila* bwina kwa kujeneka binjinabalingi.
8 Bukalu bubawane mu kukasumuna.Bwanda bubanashweke bubakwate,Batsemo na kunyonga.
9 Oloni yange* njibwahelela mwafwa ya Yehova.Njibwahelela mwafwa ya bilinga byendi bya kwobola.
10 Bitsiya byange byoshe bikendeka ngwabyo:
“Obe Yehova, iya alifwa nobe?
Baje kubesi nou wa kubakwasa, ukabamena kuli baje bali na nzili kubatubakana,Na kwamena baje kubesi nou wa kubakwasa na tuhutu kuli baje bakabebila.
11 Bakaleho ba makuli baija kuli yangeNa kunjibangeya byuma bije kunjizibuka.
12 Bakanjilingi mwamubi ha byuma byabibwa binjikabalingilaNa kunjilingisa* njizibe busiwa.
13 Oloni mubabinjile, njazalele cikeleya.Njayandesele mwonyo wange ha kulibindika kulya.Co lilombelo lyange mulyelukile kuli yange kwa kujeneka kulikumbulula,
14 Njakele na kwendangana oku njilila, ngwe njilila kabusamba kange nambe ndolome yange.Njakulamene mu busiwa ngwe uje alila baina.
15 Oloni yange munjatanukile, babwahelelele na kulikungulula hamolika.Balikungulwile hamolika na kunjibandelela mangana banjindyange hasi.Banjisanyozwele bisanyu-bisanyu, co kubolokele kulu.
16 Banu baje kubazibila Njambi lyoba bali na kunjishendumuna.*Bali na kulishuma ku mayo mu kunjilwisa.
17 Obe Yehova, wambata simbu ya kupwa hali oku unatalelela lika?
Njamene* mubali na kunjilwisa,Amena kuyoya kwange ku bana ba bindumba.*
18 Co njikakukandelela mu cikungulukilo cakama.Njikakushangazala mukati ka mbunga ya banu.
19 Keti wecelele baje bapwa bitozi bange kwa kujeneka bimo binjinabalingi babwahelele ha bukalu bwange.Keti wecelele baje banjizinda kwa kujeneka mulonga balinyateye na mesho mu kushaka kunjilinga mwamubi.
20 Mwafwa kubesi kwendeka majwi a kwoloka,Oloni bakatumbu butumbe mu busebuse bwa kulwisa banu ba kwoloka bali mu lifuti.
21 Bashama mu tunwa twabo hululu, na kunjibangeya ngwabo:“Ewa! Ewa! Mesho etu analimwena.”
22 Unalimwena ebi byuma, Obe Yehova. Keti woloke kulu.
Obe Yehova, keti ukale kulako nange.
23 Induka na kukatuka mangana unjamene,Yehova Njambi yange, njamene mu ñanda yange.
24 Njisompe kwesekesa na kusungama kwobe, Obe Yehova Njambi yange.Keti ubatabese babwahelele ha bukalu bwange.
25 Keti balyendekese ngwabo: “Ewa! Tunawana bitunatondele.”
Keti balyendekese ngwabo: “Tunamulehula.”
26 Boshe bazibise shwamwa na kubashaula.Boshe baje bakabwahelela ha bukalu bwange.
Lingisa boshe bakalyalesa hali yange babazike shwamwa na kushauka.
27 Oloni lingisa baje bakabwahelela ha kusungama kwange batambeke mu kubwahelela.Batwaleleleho kwendeka ngwabo:
“Yehova bamwamese, uje akabwahelela ha kukala mu kwoloka kwa ngamba yendi.”
28 Co ndaka yange ikendeka* bya kusungama kwobeNa kukushangazala litangwa lyoshe lyamutunu.
Majwi a kwinikila
^ Kulumbununa bintelo byabindondo bibakele na kwambata baka-kwasha na mata a lusipa.
^ Kulumbununa kangimbu kabakapangesa mu nzita.
^ Nambe “kuyoya.”
^ Nambe “Banendila mwonyo wange.”
^ Nambe “mwonyo wange.”
^ Nambe “kulingisa mwonyo wange.”
^ Nambe hamo “bali na kunjishendumuna mwafwa ya tubyakulya twatundondo.”
^ Nambe “Amena mwonyo wange.”
^ Nambe “bana ba bindumba ba kukola.”
^ Nambe “ikanuka.”
