Bisamu 40:1-17
Kuli muka-kutwamenena. Mwaso wa Devidi.
40 Njalabelelele kuli Yehova na mbunge yange yoshe,*Co wajendekelele litwi lyendi* kuli yange na kuziba kulila kwange kwa kulomba bukwasi.
2 Wanjitundisile mu bwina muje mwakele na kucuma mema.
Wanjitundisile mu mandobaNa kunjimika ha limanya.
Wakanyamesele mendi ange.
3 Co naka mwaso wauha mu kanwa kange.
Bashangazale Njambi yetu.
Babangi bakatala byanalingi Njambi mu kukomoka,Co bakakulahela Yehova.
4 Nabwahelela munu uje akulahela Yehova,Co kesi kukulahela banu ba kujeneka kwononoka nambe baka-makuli.*
5 Byuma biunalingi byabingi,Obe Yehova Njambi yange,Kulumbununa bipangi byobe bya kukomokesa na biyongola biuli nabyo hali yetu.
Naumo wahi alyesekesa kuli yobe.
Nga njeseka kubilumbununa na kubyendeka,Kunjibyasa mwafwa byabingi manene.
6 Kuwashungwiiye* mulambu na bwana,Oloni washokolwele matwi ange mangana njizibe.
Kuwalombele bwana bwa kwenyeka na bwana bwa kufwika bubi.
7 Co njendekele ngwange: “Tala, njinaija.
Banasoneka byange mu libulu lya kuzenga.
8 Kulinga cizango cobe, obe Njambi yange, cikeco cuma cinjashaka.
Mashiko obe ali mu mbunge yange.
9 Njili na kwambulula muzimbu waubwa wa kusungama mu cikungulukilo cakama.
Tala! Kunjoloka kulu,Obe Yehova, ngwe muuzibukila.
10 Kunjishweke kusungama kwobe mu mbunge yange.
Njambulula kulongwa kwobe na kwobola kwobe.
Kunjishweke cizemo cobe cije kucesi kutenguluka na busunga bwobe mu cikungulukilo cakama.”
11 Obe Yehova, keti unjumine kutetela kwobe.
Cizemo cobe cije kucesi kutenguluka na busunga bwobe binjinyungilile simbu yoshe.
12 Bukalu bunanjizengeleka bwabwingi manene, kunjasa kubutanda.
Co bubi bwange bunanjilemena, kunjasa kumona na ngila yange.
Bwabwingi kutubakana na binkambu bya ku mutwe wange,Co njinombwa.
13 Shukulu-kambu, lyane obe Yehova, mangana unjobole.
Obe Yehova, zambula mangana wakunjikwase.
14 Boshe baje bashakezeka mwonyo wangeBazibise shwamwa na kubashaula.
Baje babwahelela mwafwa ya bukalu bwangeBeluke munima oku banashauka.
15 Baje bendeka kuli yange ngwabo: “Ewa! Ewa!”
Bakasame mwafwa ya kuziba shwamwa.
16 Oloni baje bakushakezekaBalisambe na kubwahelela mwafwa yobe.
Baje bazema bilinga byobe bya kwobola, simbu yoshe bendeke ngwabo:
“Yehova bamwamese.”
17 Oloni yange kunjesi nou wa kunjikwasa, co nji kahutu.
Obe Yehova, njake mbunge.
Yobe mukwasi wange na muka-kunjamena.
Obe Njambi yange, keti wishwale.
Majwi a kwinikila
^ Nambe “njabandamenene kuli Yehova na mbunge imolika.”
^ Nambe “wakulamene na kutolilila.”
^ Nambe “baka-kukwisa.”
^ Nambe “kuwazibilile kubwaha.”
