Bisamu 59:1-17
Kuli muka-kutwamenena. Cilumo ca mwaso cibasana ngwabo: “Keti Unyongese.” Mikitamu.* Mwaso wembile Devidi, Saulu mwatumine banu bakabandamene ku njibo ya Devidi mangana bamutsiye.
59 Njamene ku bitozi bange, Obe Njambi.Njinyungilile kuli baje bashaka kunjilwisa.
2 Njamene kuli banu baka-kulinga byabibi,Na kunjobola ku banu baka-lwozi.
3 Tala! Bananjibandelela.Banalume ba nzili bashaka kunjilwisa,Oloni keti ngwabo njinapokola mashiko nambe kulinga bubi, Obe Yehova.
4 Nameme kunjabiisile, oloni bali na kulibwahesela bwasi kunjilwisa.
Katuka omwo njikusana mangana umone.
5 Mwafwa yobe, Obe Yehova Njambi wa maswalale, yobe Njambi ya Isalele.
Katuka mangana wilule bibali na kulinga baka-mafuti.
Keti utetele muka-bungungu wa kukenyuka woshe-woshe. (Sela)
6 Mangwezi na mangwezi beluka,Bonena* ngwe tutali na kulizenga mu nganda oku balibemba.
7 Tala bili na kutuhuka* mu tunwa twabo.Tunwa twabo tunafu ngwe bimoko bya mukwale,Mwafwa bali na kwendeka ngwabo: “Iyajo azibuka ngwendi yetu tunendekamo?”
8 Oloni yobe, Obe Yehova, ubajola.Ushendumuna baka-mafuti boshe.
9 Obe nzili yange, njitwalelelaho kutalelela kuli yobe,Mwafwa Njambi ikeye butewelo bwange bwa kukola.
10 Njambi uje akanjimwesa cizemo cije kucesi kutenguluka anjikwasa.Njambi anjilingisa njilisambe munjitala bitozi bange.
11 Keti ubatsiye mangana banu bange keti bebale.
Mwafwa ya nzili yobe balingise bayebangele,Balingise bawe, Obe Yehova ntelo yetu.
12 Bubi bwa mu tunwa twabo na lijwi lya mu tunwa twabo,Na kusinga na makuli abali na kwendeka,Bibakwate mwafwa ya kulyalesa kwabo.
13 Bamanese na kulubala kwobe.Bamanese mangana keti bakaleko.Balingise bazibuke ngwabo Njambi ali na kuyula batekulwila ba Jakobu kweta na ku mamaneselelo a lifuti-libu. (Sela)
14 Beluke ku mangwezi.Bonene* ngwe tutali na kulizenga mu nganda oku balibemba.
15 Bayebangele kutonda bibalya.Keti ubatabese bakute nambe kuwana mwakulala.
16 Oloni ngeci mwange, njikemba bya nzili yobe.Mutondo njambulula mu kubwahelela bya cizemo cobe cije kucesi kutenguluka.
Mwafwa yobe butewelo bwange bwa kukolaNa mwela unjitewela mu simbu ya bukalu.
17 Obe nzili yange, njikwimbila myaso ya kukushangazala,Mwafwa Njambi ikeye butewelo bwange bwa kukola, Njambi uje akanjimwesa cizemo cije kucesi kutenguluka.
Majwi a kwinikila
^ Taleni Majwi Abanalumbununa.
^ Nambe “Babwoza.”
^ Nambe “kumbwata.”
^ Nambe “Babwoze.”
