Bisamu 78:1-72
Masikiu.* Mwaso wa Asafu.
78 Eni banu bange, tolilileni ku lishiko* lyange.
Jendekeleni litwi lyeni ku majwi a mu kanwa kange.
2 Njashama mu kanwa kange na kuta cisimo.
Njilumbununa tusau twa kusañulu.
3 Byuma bitunazibi nebi bituzibuka,Bibanatuleke batatetu,
4 Kutubishwekela batekulwila babo.
Tuleka bisemwa bili na kwija kulutweBilinga bya Yehova bibanapande kushangazala, na nzili yendi,Byuma bya kukomokesa byanalingi.
5 Wanene bana ba Jakobu byanukiso.
Watungile lishiko mu Isalele.
Washikile bakukulwila betuBaleke bana babo ebi byuma
6 Mangana cisemwa cinatako,Kulumbununa bana baje bacisemuka, babizibuke,Mangana nabo babileke bana babo.
7 Co bakulahele Njambi.
Kubebala bipangi bya Njambi,Oloni banyunga mashiko endi.
8 Co kubalifu na bakukulwila babo,Baje bapwile cisemwa ca baka-kutengulukila, ba kutindibala,Cisemwa cije bimbunge byabo byongumukile,*Co bimbunge byabo kubyapwile bya kulongwa kuli Njambi.
9 BaEfremu bakele na buta bwa lusipa,Oloni batewele na kwiluka munima ha litangwa lya nzita.
10 Kubanyungile cikumiiyo cabo kuli Njambi,Co kubononokele mashiko endi.
11 Bebalele lalo byuma byalingile,Bipangi byendi bya kukomokesa byabamwesele.
12 Walingile byuma bya kukomokesa ha mesho a bakukulwila baboMu lifuti lya Ijipiti, mu mutambela wa Zoani.
13 Wangunwine kalunga-ndonga mangana base kwita,Co walingisile mema emane hwo ngwe cibumbe.
14 Wabatwamenenene kupangesa lishelwa mutanya,Co butsiki bwoshe wabatwamenenene kupangesa ceke ca tuhya.
15 Watabwile mamanya mu mambo,Wabanene mema amangi, co banwile ngwe baje banwa mema a ha nzinga.
16 Walingisile bana ba bindonga batunde mu limanya,Co walingisile mema amangi angongomoke ngwe bindonga.
17 Oloni batwaleleleleho kulinga bubi ku mesho endiBatengulukilile Wahakamwa Manene mu mambo.
18 Besekele Njambi mu bimbunge byaboMubamutatokesele ngwabo abane byakulya bibashungwiiye.
19 Ngeci bashawile Njambi mubendekele ngwabo:
“Kuma Njambi asa kubwahesa mesa mu mambo ndi?”
20 Taleni! Wapupile ha limanya,Co mema angongomokele na bana ba bindonga bashulile.
“Kuma asa kutwana byakulya*Nambe kwana banu bendi situ ndi?”
21 Yehova mwabazibile, walubalele manene.
Watuminine Jakobu tuhya.
Co butenu bwendi bwepukilile Isalele
22 Mwafwa kubakulahelele Njambi.
Kubakulahelele ngwabo asa kubobola.
23 Ngeci washikile mashelwaNa kushokolola bikolo bya mwilu.
24 Watwaleleleleho kubanyokesela manna mangana balye.
Wabanene binona bya mwilu.
25 Banu balile byakulya* bya banu ba nzili.*
Wabanene byakulya byabingi mangana bakute.
26 Wakatwile lihunzi lya ku butuhukilo bwa litangwa mwilu,Co mu nzili yendi walingisile lihunzi lya ku mbwela* lihuwe.
27 Co wabanyokeselele situ ngwe likungu.
Wabanyokeselele tuzila ngwe mushekesheke wa ku ngenge ya kalunga-ndonga.
28 Wabalingisile bawile mukati ka cilombo cendi,Ku bitenti byendi kwoshe.
29 Co balile na kukutilila.
Wabanene bibashungwiiye.
30 Oloni simbu lishungu lyabo kanda licibahwe,Simbu byakulya byacikele mu tunwa twabo,
31 Butenu bwa Njambi bwabepukilile.
Watsiile banalume ba nzili manene.
Wandumwine bakwenje ba mu Isalele.
32 Nameme ngoco, batwaleleleleho kulinga bubi,Co kubakulahelele bipangi byendi bya kukomokesa.
33 Ngeci wamanesele matangwa abo a kuyoya ngwe muku.
Co myaka yabo waimanesele na bukalu bwa kukasumuna.
34 Oloni simbu yoshe mwakele na kutsiyako bamo, bakele na kumutonda-tonda.
Bakele na kwiluka na kutonda Njambi.
35 Bakele na kwanuka ngwabo Njambi ikeye Limanya lyaboNa kwanuka ngwabo Njambi Wahakamwa Manene ikeye Muka-kubapatula.*
36 Oloni bamukwisile na tunwa twaboNa kwendeka makuli kuli ikeye na bindaka byabo.
37 Bimbunge byabo kubyakakateyeye kuli ikeye,Co kubanyungile cikumiiyo cendi.
38 Oloni wakele na kubatetela.
Wakele na kukonekela* milonga yabo, co kakele na kubanyongesa.
Kakangi wakele na kukwata mbungeKutubakana kubajukwila butenu bwendi bwoshe.
39 Mwafwa wanukile ngwendi bapwile banu bangoco.*
Bapwile ngwe lihunzi lije likahuwu, co kulyesi kwiluka.*
40 Bamutengulukilile kushwa kumo mu mamboNa kumuzibisa kubabala ku mbunge.
41 Belukilile-ilukilile kweseka Njambi.
Balubalesele* Wakujela wa Isalele.
42 Kubanukile nzili yendi,*Bebalele litangwa lyabamenene* ku citozi,
43 Mwasholwelele bizibukiso byendi mu IjipitiNa bikomokeso byendi mu mutambela wa Zoani,
44 Nomu mwatengulwilile mema a mu tupila twa Nailo kupwa maninga,Co kubasele kunwa mema a mu bana ba bindonga byabo.
45 Watumine binjame bya mazimbe mangana babalyeNa mambotwe mangana babanyongese.
46 Wanene bimbuto byabo ku bimbimba baje batsile manene njala,Wanene byuma bibondanganene ku binjame bya bimbimba.
47 Wabiisile miti yabo ya binyuNa miti yabo ya sikamole na nyonzi ya mamanya.
48 Watsiile tusitu babo ba kwambatela bitele na nyonzi ya mamanya,Co watsiile bimuna babo na mihyato.*
49 Wabamwesele butenu bwendi bwakama,Kulubala, matoto na bukalu.
Bibunga bya tungelo banenele bukalu.
50 Wamwesele kulubala kwendi.
Kabatetelele, oloni wabatsiileNa kubanenela mushongo wa kulitambwisa.
51 Mamaneselelo watsiile bantwatwa boshe ba mu Ijipiti,Mashangumukilo a nzili yabo ya kukita mu bitenti bya Hamu.
52 Watuwisile banu bendi mu Ijipiti ngwe bimangaNa kubatwamenena mu mambo ngwe butanga.
53 Wabatwamenenene na kubanyungilila,Co kubazibile lyoba.
Kalunga-ndonga wangumbwile bitozi babo.
54 Co wabanenele mu mwela wendi wa kujela,Mu mutambela wa minkinda wafungulwile na liboko lyendi lya cilyo.
55 Washekele baka-mafuti ku mesho abo.
Wabapangezelele buswana kupangesa mukole wa kusetekesa.
Walingisile miyati ya Isalele itunge membo ayo.
56 Oloni batwaleleleleho kweseka Njambi Wahakamwa Manene na kumutengulukila.
Kubakele mbunge ku byanukiso byendi.
57 Batundile mu ngila, co bapwile baka-kukwisa ngwe bakukulwila babo.
Kubabakulahelele ngwe buta bwa lusipa bwa kumbwembwela.
58 Batwaleleleleho kumulubalesa na myela yabo ya kulunduka,Co bakatwile butenu bwendi na tumponya babo ba kushonga.
59 Njambi wazibile, co walubalele manene.
Ngeci wabyanene Isalele, kumubyanenena.
60 Mamaneselelo wombilile kuti tabanakele ya mu Shilo,Tenti muje mwakele na kukala hakati ka banu.
61 Watabesele cimweso ca nzili yendi ciye mu bufunge.
Wanene bulemu bwendi mu liboko lya citozi.
62 Watabesele banu bendi babatsiye na mukwale,Co walubalelele manene buswana bwendi.
63 Tuhya twanyongesele bakwenje bendi,Co bambanda bendi kubabembilile myaso ha bilika bya bulo.*
64 Tupilistu bendi babatsiile na mukwale,Co bifwile babo kubalilile.
65 Co Yehova wendukile ngwe uje atunda ha tuloNgwe munalume wa nzili uje atunda ha tulo mwafwa ya kunwa manene bwala.
66 Co wanyongesele bitozi bendi.
Wabashawile myaka yoshe.
67 Wabyanene tenti ya Jozefu.
Kangwile muyati wa Efremu.
68 Oloni wangwile muyati wa Juda,Munkinda wa Siyone uje wazema.
69 Walingisile mwela wendi wa kujela ukaleko myaka yoshe ngwe melu,Ngwe lifuti-libu lije lyakalako myaka yoshe.
70 Wangwile ngamba yendi Devidi,Co wamutundisile ku limba lya bimanga.
71 Wamutundisile ku kunyunga bimanga baje bajamwesaNa kumupwisa kanyungi wa Jakobu, kulumbununa banu bendi,Na kanyungi wa Isalele, buswana bwendi.
72 Wabanyungile na mbunge ya kulongwaNa kubatwamenena na maboko a butongwe.
Majwi a kwinikila
^ Taleni Majwi Abanalumbununa.
^ Nambe “bilongesa.”
^ Lijwi na lijwi “kubyalibwaheselele.”
^ Lijwi na lijwi “likende.”
^ Lijwi na lijwi “likende.”
^ Nambe “bya tungelo.”
^ Nambe “ku south.”
^ Nambe “Muka-kubalingilako shambandinga.”
^ Nambe “kufwika.”
^ Lijwi na lijwi “situ.”
^ Nambe hamo “Bapwile ngwe sipilitu ije ikai, co kuyesi kwiluka.”
^ Nambe “Bazibisile kubabala ku mbunge.”
^ Lijwi na lijwi “liboko lyendi.”
^ Lijwi na lijwi “lyabapatwile.”
^ Nambe hamo “lisika-sika.”
^ Lijwi na lijwi “Co bambanda bendi kubabashangazalele.”
