Bisamu 90:1-17
Lilombelo lya Mosesa, munu wa Njambi wa busunga.
90 Obe Yehova, yobe unapu butewelo bwetu* ku bisemwa byoshe.
2 Simbu kanda minkinda ikalekoNambe simbu kanda utange lifuti-libu na kaye,Kushwa okwo kwa kujeneka mashangumukilo kuya kwa kujeneka mamaneselelo,* yobe wapwa Njambi.
3 Ukalingisa banu beluke ku likungu.
Ukendeka ngwobe: “Eni bana ba banu, ilukeni ku likungu.”
4 Myaka 1,000 mu mesho obe inapu ngwe izau,Inapu lika ngwe cilo cimolika ca butsiki.
5 Ubakomba. Bafwa ngwe tulo.
Ku mutondo bafwa ngwe mwila uje umena.
6 Ku mutondo ukajobelela na kusholoka mwamubwa,Oloni ku mangwezi ukajujwama na kuma cau.
7 Tuli na kuhwa na butenu bwobeNa kuziba lyoba mwafwa ya bukalu bwobe.
8 Waka milonga yetu halutwe lwobe.*
Ujombolola byuma byetu bya kushwekesa na ceke ca cihanga cobe.
9 Matangwa etu* ali na kuhwa mwafwa ya butenu bwobe,Co myaka yetu ili na kuhwa bwasi ngwe kututumwisa.
10 Myaka yetu ya kuyoya inapu 70Nambe 80, maneneni nga munu nakanyama.
Oloni yashulu na bukalu na busiwa.
Ihwa bwasi-bwasi, co tunyonga.
11 Iya asa kuzibisisisa nzili ya butenu bwobe?
Butenu bwobe bwakama, co na lyoba litunapande kukuzibila linapande kupwa lyakama.
12 Tulongese mwakutandela matangwa etuMangana tukale na mbunge ya mana.
13 Iluka, obe Yehova! Butenu bwobe bwambata simbu ya kupwa hali?
Zibila bangamba bobe ngozi.
14 Ku mutondo, tumwese cizemo cobe cije kucesi kutengulukaMangana tutambeke mu kubwahelela na kulisamba ha matangwa etu oshe.
15 Tulingise tupwe ba kubwahelela kwesekesa na matangwa aunatuyandesa,Kupwisa hamo na myaka yaingi itunakala mu bukalu.
16 Bangamba bobe bamone bipangi byobe,Co bana babo ba banalume bamone bulemu bwobe.
17 Ngozi ya Yehova Njambi yetu ikale hali yetu.
Bezikisa bipangi bya maboko etu,Eyo, bezikisa bipangi bya maboko etu.
Majwi a kwinikila
^ Nambe hamo “mwela wetu wa kukala.”
^ Nambe “Kushwa ku myaka yoshe kuya ku myaka yoshe.”
^ Nambe “Uzibuka milonga yetu.”
^ Nambe “Kuyoya kwetu.”
