Efeso 4:1-32
4 Ngeci, yange lipanditi mwafwa ya Mwata, njimilomba ngwange mwende mwamubwa kwesekesa na kusana kubamisanene,
2 na kulikehesa kwoshe,* na kuwa mbunge, na mbunge ya kubandamena, na kwecelela tupenga twa bakweni mu cizemo
3 oku mulinga mwoshe mumwasela kunyungilila likwatasano lya sipilitu mu kwoloka kuje kunamikutila hamo.
4 Kuli mubila umolika na sipilitu imolika, ngwe mubamisanenene ku lilabelelo limolika lije libanamisanena.
5 Kuli Mwata umolika na likulahelo limolika na cimbwitiko cimolika.
6 Kuli Njambi umolika, Ishe ya boshe, uje ali helu ya byoshe, uje akapangesa boshe na kupanga muli boshe.
7 Co umo na umo wetu watambwile ngozi yakama ya kutunda kuli Njambi, co Kristu ikeye wasetekelele umo na umo wetu obu bwana.
8 Mwafwa Bisoneka ngwabyo: “Mwakandukile, waile na bafunge. Wanene banalume kupwa bwana.”
9 Co lijwi lya kwendeka ngwalyo “mwakandukile” lilumbununa bika? Lilumbununa ngwalyo wasikumukile lalo mu mitambela ya mwisi, kulumbununa hasi.
10 Uje bene wasikumukile ikeye lalo wakandukile na kutubakana melu oshe mangana alingise byuma byoshe bipwe bya kushula.
11 Co wanene bamo kupwa tupositolo, bamo tupolofweto, bamo baka-kwambulula,* bamo tunyungi na balongesi,
12 mangana base kwolola* bakujela na kupanga bipangi bya cikungulukilo na kutunga mubila wa Kristu,
13 kweta noho hatukalikwatasanena mu likulahelo tubaboshe, na mu mangana a busunga a kuzibuka Muna Njambi na kupwa banu ba kukola, na kweta ha seteko ya citalamo ca kushula ceteleho Kristu.
14 Ngeci, keti tupwe lalo banike, na kungumuka ngwe baje bongumuka na mankimba, na kupekumukila noku-noku na lihunzi lyoshe lya bilongesa kwitila mu makuli a banu na linyanyamena lije lyungumuna.
15 Oloni omwo twendeka busunga, tukoleni mu cizemo mu byuma byoshe muli Kristu uje napu mutwe.
16 Mwafwa kuli ikeye kukekwo kubananungila bilyo bya mubila byoshe, co uli na kupangela hamo kwitila mu linunga na linunga lije lili na kwana bije binapande. Nga cilyo na cilyo cipanga mwamubwa, co oku kulingisa mubila ukole omwo ulitunga ukewo babenya mu cizemo.
17 Ngeci, ebi bikebyo binjendeka na kwana bukaleho muli Mwata ngwange keti mutwaleleleho lalo kwenda ngwe baka-mafuti mu bisinganyeka byabo byangoco.
18 Bisinganyeka byabo bili mu lisusulungu, co banangunuka ku kuyoya kuje kwakundama kuli Njambi mwafwa bali kunzimba, co lalo mwafwa ya kushilitila* kwa bimbunge byabo.
19 Ha kuwana ngwe shwamwa inabahu, banalyecelela bakebo babenya mu kulinga byuma byabibi kwa kujeneka shwamwa* mangana balinge na nuna miyati yoshe ya mazilo.
20 Oloni kumwalilongesele ngweni Kristu wafwa ngacije.
21 Cili bene mwazibile byendi, co bamilongesele kwitila muli ikeye, ngecilika omwo busunga buli muli Yesu.
22 Bamilongesele ngwabo mushulule bunu bweni bwa laja buje bwendelela na futisi yeni ya kunima buje lalo buli na kubola kwesekesa na mashungu abwo aje ongumuna.
23 Co munapande kutwalelelaho kupwa babaha mu bisinganyeka byeni bije bili na kumitwamenena,*
24 na kuzala bunu bwabuha buje bubatangele kwesekesa na cizango ca Njambi mu kulitombola na kusungama kwa busunga na kulongwa cije kucesi kutenguluka.
25 Ngeci, ha kuwana ngwe munombila kuti makuli, umo na umo weni endeke busunga kuli umo na mukwabo mwafwa tu bilyo bya mubila umolika.
26 Nga mulubala, keti mulinge bubi, keti mutokese litangwa oku mucinalubala.
27 Keti musezele Liyabolo bukobelelo.
28 Uje akebi keti ebe lalo, oloni apange na nzili, apange bipangi byabibwa na maboko endi mangana ase kuwana bya kulipangela na uje ali mu bujene.
29 Mu kanwa keni keti mutunde lijwi lya kubola, oloni mutunde lika byabibwa bije bitunga kwesekesa na bujene buliko, mangana bikwase baje bali na kutolilila.
30 Co lalo keti muzibise busiwa sipilitu ya kujela ya Njambi ije ibamyakele kupwa ciganto mangana bakamipatule na ndando ya kupatula ha litangwa lya kwobola.
31 Umbileni kuti byuma byoshe byabibi bya kulula, butenu, kulubala, kuyalumuka, na majwi amabi na byuma byoshe byabibi.
32 Oloni lizibileni ngozi umo na mukwabo, lizibileni mema ku mbunge, likonekeleni umo na mukwabo na mbunge imo ngwe Njambi nendi mwamikonekelele na mbunge imo kwitila muli Kristu.
Majwi a kwinikila
^ Nambe “bisinganyeka bya kwisi.”
^ Nambe “baka-kwambulula muzimbu waubwa.”
^ Nambe “kulongesa.”
^ Lijwi na lijwi “kujeneka kuzibisisa.”
^ Mu Cigriki a·sel′gei·a. Taleni Majwi Abanalumbununa.
^ Lijwi na lijwi “sipilitu ya bisinganyeka byeni.”
