Efeso 5:1-33
5 Ngeci, tembwinineni Njambi ha kupwa bana baje bazema,
2 co twaleleleniho kwenda mu cizemo ngwe Kristu mwatuzemene* na kulyana ikeye babenya mwafwa yetu* kupwa bwana na mulambu, ngwe lwengo lwalubwa kuli Njambi.
3 Bupangala* na mazilo oshe, nambe nuna keti mubyendeke na kubyendeka mukati keni, ngwe muje mukunapande kuli bakujela,
4 nambe bilinga bya shwamwa, nambe byendeka bya bulema, nambe sanda yaibi, ebi byuma kubyapandele, oloni kandeleleni Njambi.
5 Muzibuka eci cuma, muzibuka mwamubwa yeni babenya ngweni kukwesi muka-bupangala,* nambe muka-mazilo, nambe muka-nuna, kulumbununa muka-kulemesa tumponya, uje akakala na buswana mu Bumwene bwa Kristu na Njambi.
6 Keti kukale munu amikwisa na majwi a kujeneka seho, mwafwa butenu bwa Njambi buli na kwija ha bana ba kujeneka kwononoka, mwafwa yebi byuma.
7 Ngeci, keti mulikwatasane nabo.
8 Mwafwa mwapwile lisusulungu, oloni hano munapwoni ceke, mu kulikwatasana na Mwata. Twaleleleniho kwenda ngwe bana ba ceke,
9 mwafwa bushuka bwa ceke buli na miyati yoshe ya bubwa na kusungama na busunga.
10 Twaleleleniho kunanguka byuma byatabesa Mwata.
11 Co likeleni kulikwatasana nabo mu bipangi bya kujeneka kwima bushuka, bya lisusulungu, oloni bijombololeni muje bene mubinafu.
12 Mwafwa byuma bibakalingi ku bushweke binapu bya shwamwa nambe kubyendeka.
13 Co byuma byoshe bije bili na kusholoka hashandangala, ceke cili na kubisholola, mwafwa byuma byoshe bije bibanasholola binapu ceke.
14 Mukemwo kwakala endekesi ya kwendeka ngwayo: “Tona, obe muka-kulala, sanguka ku batsi, co Kristu akutwila ceke.”
15 Ngeci nyanyameni mumwendela mangana keti mwende ngwe banu ba kujeneka mana, oloni mwende ngwe banu bali na mana.
16 Pangeseni mwamubwa simbu yeni,* mwafwa ano matangwa anapu amabi.
17 Ngeci, keti mupwe ba kujeneka kuzibisisa, oloni twaleleleniho kunanguka cizango ca Yehova.
18 Co lalo keti mupende binyu mwafwa bikalingisa munu alikobelese manene mu bilinga byabibi,* oloni twaleleleniho kushula na sipilitu ya kujela.
19 Lyendekeseni umo na mukwabo* na bisamu, na kushangazala Njambi, na myaso ya ku sipilitu, na kwimba myaso ya kushangazala Yehova mu bimbunge byeni.
20 Simbu yoshe kandeleleni Njambi yetu na Tate yetu mwafwa ya byuma byoshe mu lizina lya Mwata wetu Yesu Kristu.
21 Lyakeni kwisi ya umo na mukwabo mwafwa ya kuzibila lyoba Kristu.
22 Banakazi balyake kwisi ya banalume babo ngwe mubakalingi kuli Mwata,
23 mwafwa munalume napu mutwe wa munakazi wendi ngwe Kristu mwanapu mutwe wa cikungulukilo ha kupwa ikeye mwobole wou mubila.
24 Ngecilika mwa cikungulukilo mucikalyaka kwisi ya Kristu, banakazi nabo banapande kulyaka kwisi ya banalume babo mu byuma byoshe.
25 Eni banalume, twaleleleniho kuzema banakazi beni ngwe Kristu nendi mwazemene cikungulukilo na kulyana mwafwa yaco,
26 mangana acijelese na kucitanesa na mema kwitila mu lijwi,
27 mangana cikungulukilo cipwe cacibwa mu mesho endi, ca kujeneka bitoma-bitoma, nambe minkonya, nambe byuma bya cifweci, oloni cipwe ca kujela, ca kujeneka kapenga.
28 Mu ngila imolika, banalume banapande kuzema banakazi babo, ngwe mubazemena mibila yabo. Munalume uje wazema munakazi wendi, walizema ikeye babenya.
29 Mwafwa kukwesi munu wazinda mubila* wendi, oloni aulisa na kuwaka mbunge, ngwe Kristu mwakalingila cikungulukilo,
30 mwafwa tu bilyo bya mubila wendi.
31 “Ngeci bene, munalume akaseza ishe na ina na kulipandakana* na munakazi wendi, co aba babali bakapwa situ imolika.”
32 Eli lihungu lya kujela linapu lyakama. Co hano njili na kwendeka bya Kristu na cikungulukilo.
33 Nameme ngoco, umo na umo weni napande kuzema munakazi wendi ngwe mwalizema ikeye babenya, co munakazi napande kusingimika manene munalume wendi.
Majwi a kwinikila
^ Nambe hamo “mwamizemene.”
^ Nambe hamo “yeni.”
^ Mu Cigriki por·nei′a. Taleni Majwi Abanalumbununa.
^ Taleni Majwi Abanalumbununa, “Bupangala.”
^ Lijwi na lijwi “Landeni simbu.”
^ Nambe “mu buka.”
^ Nambe hamo “yeni babenya.”
^ Lijwi na lijwi “situ.”
^ Nambe “kutwalelelaho kukala hamo.”
