Ekelesiya 3:1-22
3 Byuma byoshe bili na simbu yabyo,Cipangi coshe ha lifuti-libu cili na simbu yaco:
2 Kuli simbu ya kusemuka* na simbu ya kutsa.Kuli simbu ya kukuna na simbu ya kutukula bibanakunine.
3 Kuli simbu ya kutsiya na simbu ya kwobola.*Kuli simbu ya kusiula na simbu ya kutunga.
4 Kuli simbu ya kulila na simbu ya kujola.Kuli simbu ya kumbolozoka na simbu ya kukina.
5 Kuli simbu ya kwasha mamanya na simbu kukungulula mamanya hamolika.Kuli simbu ya kubumbateya na simbu ya kulikela kubumbateya.
6 Kuli simbu ya kutonda na simbu ya kumona ngwabo cuma cinazimbala.Kuli simbu ya kutulika na simbu ya kumbila.
7 Kuli simbu ya kutabula na simbu ya kutunga.Kuli simbu ya kwoloka na simbu ya kwendeka.
8 Kuli simbu ya kuzema na simbu ya kuzinda.Kuli simbu ya nzita na simbu ya kukala mu kwoloka.
9 Bika byawana muka-kupanga mu kufwitangana kwendi kwoshe?
10 Njinamono bipangi byanana Njambi ku bana ba banu mangana bibazezamese.
11 Byuma byoshe nabitanga mwamubwa ha simbu yabyo. Naka na lishungu lya kuyoya myaka yoshe mu bimbunge byabo. Nameme ngoco, banu kubakazibuka bipangi byanapanga Njambi wa busunga, kutunda ku mashangumukilo kweta na ku mamaneselelo.
12 Njinamono ngwange kukwesi cuma cacibwa ku banu kutubakana kubwahelela na kulinga byuma byabibwa mu kuyoya kwabo,
13 co lalo ngwange munu woshe napande kulya na kunwa na kubwahelela na bipangi byendi byoshe byanondangana. Obu bunapu bwana bya kutunda kuli Njambi.
14 Njinazibuka ngwange byuma byoshe byatanga Njambi wa busunga bikalako myaka yoshe. Kukwesi ca kubwezelelako, co lalo kukwesi ca kutundisako. Njambi wa busunga nabitanga mu ngila ei mangana banu bamuzibile lyoba.
15 Byuma byoshe bilingiwa, binalingiwa laja, co byoshe bije bija, kubyakele na laja. Oloni Njambi wa busunga akatondo bije bibanakabangeya banu.*
16 Njinamono lalo eci cuma hano hasi ngwange: Mu mwela wa kusompela mu kusungama mwakele bubi, co mu mwela wa kusungama namwo mwakele bubi.
17 Ngeci njalyendekesele mu mbunge yange ngwange: “Njambi wa busunga akasompa baka-kusungama na baka-bubi, mwafwa cipangi coshe cili na simbu yaco, na bilinga byoshe bili na simbu yabyo.”
18 Co njalyendekesele lalo mu mbunge yange ha bana ba banu ngwange Njambi wa busunga akabeseka na kubamona ngwendi banapu tusitu,
19 mwafwa kuli mamaneselelo a banu na mamaneselelo a tusitu, boshe mamaneselelo abo amolika. Mwakatsi munu mukemwo mwakatsi na kasitu, boshe bali na sipilitu imolika. Ngeci, banu kubatubakana tusitu mwafwa byuma byoshe byangoco.
20 Boshe bali na kuya ku mwela umolika. Boshe batunda ku likungu, co lalo boshe bali na kwiluka ku likungu.
21 Iyajo azibuka indi sipilitu ya banu ikai mwilu, co sipilitu ya tusitu ikai mu libu?
22 Co njamwene ngwange kukwesi cuma cacibwa ku munu kutubakana kubwahelela na bipangi byendi, mwafwa cikeco cikandelela cendi. Mwafwa iya asa kumulingisa amone byuma bikalingiwa munima yendi nga natsi?
