Ekizoda 10:1-29
10 Co Yehova walekele Mosesa ngwendi: “Ya kuli Falo mwafwa njinecelela mbunge yendi na bimbunge bya bangamba bendi bijeneke kwononoka mangana njimumwese ebi bikomokeso byange,
2 co lalo mangana mukaleke bana beni na batekulyeni ngweni njanene baka-Ijipiti kashitiko kakama na kulinga bizibukiso mukati kabo, co mukazibuka ngweni yange Yehova.”
3 Co Mosesa na Aloni baile kuli Falo bakamulekele ngwabo: “Yehova Njambi ya baHebelu nendeka ngwendi, ‘Simbu ya kupwa hali iubyana kulyaka kwisi yange? Tabesa banu bange baye mangana bakanjipangele.
4 Nga utwalelelaho kubindika banu bange ngwobe keti baye, co imene njikutumina bimbimba mu lifuti lyobe.
5 Co bakashula hasi hoshe, co kumukasa kumona libu. Bakalya bije binoboka ku nyonzi ya mamanya bije binasaleleko. Co bakalya miti yobe yoshe ili na kumena mu shwata.
6 Bakashula mu binjibo byobe na mu binjibo bya bangamba bobe boshe na mu binjibo bya baka-Ijipiti boshe. Bakapwa babangi manene, na baisho bene na bakuku yobe kanda bacibamoneho laja muno mu lifuti.’” Ngeci watengulukile na kutunda kuli Falo.
7 Co bangamba ba Falo bamulekele ngwabo: “Ou munalume atwalelelaho kwaka kuyoya kwetu mu bushonde simbu ya kupwa hali? Tabesa aba banu baye mangana bakapangele Yehova Njambi yabo. Kuma na simbu ino kuwanangukile ngwobe lifuti lya Ijipiti linabihya ndi?”
8 Ngeci Mosesa na Aloni babelwisile lalo kuli Falo, co wabalekele ngwendi: “Yeni mukapangele Yehova Njambi yeni. Oloni beya baya?”
9 Co Mosesa wakumbulwile ngwendi: “Tuya na bakwenje na bambanda betu, na tukulukazi betu, na bana betu ba banalume, na bana betu ba banakazi, na bimanga betu, na bingombe betu, mwafwa tuya na kulingila Yehova cilika.”
10 Wabalekele ngwendi: “Nga yange bene ou njimitabesa ngwange muye na bana beni, co cili bene Yehova ali neni. Njinamono ngwange munayongola kulinga cuma cacibi.
11 Noku kumuya bene kwahi! Banalume lika mukati keni bakebo baya na kupangela Yehova mwafwa bikebyo bimunalombele.” Ngeci babatundisile ku mesho a Falo.
12 Co Yehova walekele Mosesa ngwendi: “Olwela liboko lyobe ha lifuti lya Ijipiti mangana usane bimbimba baije mu lifuti lya Ijipiti, co bakulye bimena byoshe bya mu lifuti, byoshe bije binasalele ku nyonzi ya mamanya.”
13 Co haje bene Mosesa wenikile mulamu wendi ha lifuti lya Ijipiti, co Yehova walingisile lihunzi lya ku butuhukilo bwa litangwa lihuwile mu lifuti lya Ijipiti uje mutanya woshe na butsiki bwoshe. Co ku mutondo, lihunzi lya ku butuhukilo bwa litangwa lyanenele bimbimba.
14 Co bimbimba bezile, co bakukele mu lifuti lyoshe lya Ijipiti. Bapwile babangi manene. Kanda kukaleho laja bimbimba babangi ngwe baje. Co kukukakala lalo bimbimba babangi ngwe baje.
15 Bashulile muje mu lifuti mwoshe, co lije lifuti lyazibalele na bimbimba. Balile bimena byoshe bya mu lifuti na bushuka bwoshe bwa ku miti buje bwasalele ku nyonzi ya mamanya. Kukwesi liputa lya bushompo lyasalele ku muti nambe ku cimena ca mu shwata mu lifuti lyoshe lya Ijipiti.
16 Ngeci bwasi-bwasi Falo wasanene Mosesa na Aloni na kubaleka ngwendi: “Njinalingi bubi kuli Yehova Njambi yeni na kuli yeni.
17 Co hano njimilomba ngwange munjikonekeleko bubi bwange olu lwa mamaneselelo, co mulambelele Yehova Njambi yeni mangana atundise aka kashitiko kakabi kuli yange.”
18 Ngeci watundile* kuli Falo, co waile na kulambelela Yehova.
19 Co Yehova walingisile lije lihunzi litenguluke. Co lyashangumukile kuhuwa kutunda ku bulahukilo bwa litangwa, co lyapekumwine baje bimbimba na kukabombila mu Kalunga-ndonga wa Kubenga. Co kukwasalele nambe mbimba umo mu lifuti lya Ijipiti mwoshe.
20 Oloni Yehova wecelelele Falo akaluwise mbunge yendi, co katabesele baIsalele ngwendi baye.
21 Co Yehova walekele Mosesa ngwendi: “Olwela liboko lyobe mwilu mangana mu lifuti lya Ijipiti mukale lisusulungu lya kuzibala manene-nene.”
22 Co haje bene Mosesa wolwelele liboko lyendi mwilu, co mu lifuti lyoshe lya Ijipiti mwakele lisusulungu lya kuzibala ha matangwa atatu.
23 Kubalimwene umo na mukwabo, co ha matangwa atatu na umo wahi watundile hakele. Oloni kuje kubakele baIsalele kwakele ceke.
24 Co Falo walekele Mosesa ngwendi: “Yeni mukapangele Yehova. Bimanga na bingombe beni lika bakebo basala. Mwasa kuya na bana beni.”
25 Oloni Mosesa wendekele ngwendi: “Yobe bene utwana* na milambu na bwana bwa kwenyeka, co tukabyana kuli Yehova Njambi yetu.
26 Bimuna betu nabo tuya nabo. Kukwesi cimuna asala kuno mwafwa tukapangesako bamo mu kulemesa Yehova Njambi yetu, co kutuzibuka bitunapande kukana mu kulemesa Yehova kubanga mutuketa kuje.”
27 Ngeci Yehova wecelelele Falo akaluwise mbunge yendi, co kabatabesele ngwendi baye.
28 Falo wamulekele ngwendi: “Tunda ku mesho ange! Keti wakweseke lalo kwa kusholoka kuli yange mwafwa litangwa liwakusholoka kuli yange, co kwobe ngu.”
29 Ngeci Mosesa wamukumbulwile ngwendi: “Kunjikasholoka lalo kuli yobe ngwe muunendeka.”
