Ekizoda 15:1-27
15 Ha simbu ije, Mosesa na baIsalele bembilile Yehova ou mwaso ngwabo:
“Njimbila Yehova, mwafwa banamuzumbangeya manene.
Nombila kabalu na muka-kulonda kabalu mu kalunga-ndonga.
2 Jah* ikeye nzili yange na kukanyama kwange mwafwa ikeye napu mwobole wange.
Ou ikeye Njambi yange, co njimushangazala. Ikeye Njambi ya tate, co njimuzumbangeya.
3 Yehova wapwa muka-kulwa wa nzili, Yehova likelyo lizina lyendi.
4 Nombila matemba a Falo na maswalale bendi mu Kalunga-ndonga.
Co baka-kulwa ba Falo ba nzili banabombila mu Kalunga-ndonga wa Kubenga.
5 Mankimba anabangumbula, co banaselyama kwisi ya kalunga-ndonga ngwe limanya.
6 Obe Yehova, liboko lyobe lya cilyo lyakala manene na nzili.
Obe Yehova, liboko lyobe lya cilyo lyasa kubwabwanya citozi.
7 Mwafwa ya nzili yobe yakama, wasa kuwisila hasi baje bakulwisa.
Ubatumina butenu bwobe buje buli na kushukuma, co bubenyeka ngwe bishati.
8 Muku wa mu majulu obe unakungulwilile mema hamolika.
Anemanene na kwonowesa libazi,Aje mema anakele na kulwa na nzili anakondele mu kalunga-ndonga.
9 Citozi nendekele ngwendi: ‘Njibakaba. Njikabawana.
Njikambata bufuko bwabo kweta noho hanjikajaukila.
Njikashomona mukwale wange. Liboko lyange likabahyana.’
10 Unahwimine mpunzi, co kalunga-ndonga nabangumbwile.
Banakaselyamene kwisi ya mema ali na kulwa na nzili, ngwe cikubo ca kulema.
11 Iya hakati ka binjambi napu ngwe yobe, obe Yehova?
Iya napu wa kujela manene ngwe yobe?
Yobe ibanapande kuzibila lyoba na kwimbila myaso ya kukushangazala. Yobe ukalingi byuma bya kukomokesa.
12 Unolwele liboko lyobe lya cilyo, co lifuti-libu linabalehwile.
13 Mwafwa ya cizemo cobe cije kucesi kutenguluka, unatwamenena banu baje baunapatula.
Mu nzili yobe, ubatwamenena ku mwela wobe wa kujela.
14 Banu banapande kuziba, co bakajaja.
Baje batunga mu Filistiya bakaziba lyoba.
15 Bamyata ba Edomu mubakaziba ebi, bakaziba lyoba,Co baka-kuyula ba mu Mowabi ba nzili bakajaja.
Baje batunga mu Kanana boshe bakahezuka bimbunge.
16 Bakajaja na kuziba lyoba.
Mwafwa ya nzili yobe yakama, bakemana homa hamolika ngwe limanyaKubanga noho banu bobe baneti, obe Yehova,Kubanga noho banu bobe bawangwile baneti.
17 Ukabanena na kubaka ha lilundu lyobe lya buswana,Ha mwela wobe uje uunabwahesa ngwobe utungeho, obe Yehova,Ha mwela wobe wa kujela, obe Yehova, Uje uunazameka na maboko obe.
18 Yehova ayula ngwe mwene myaka yoshe.
19 Tubalu ba Falo na matemba endi a nzita na banu bendi baka-kulonda tubalu mubanakobelele mu kalunga-ndonga,Yehova nelwisile mema mu kalunga-ndonga na kubangumbula,Oloni banu ba Isalele banetile ha libu lya kuma mu kalunga-ndonga.”
20 Co Miriamu kapolofweto wa munakazi, ndokazi ya Aloni wakwatele kangoma mu liboko lyendi, co banakazi boshe bamukabele na tungoma twabo oku bali na kukina.
21 Miriamu watabeyeye banalume ngwendi:
“Imbileni Yehova mwafwa banamuzumbangeya manene.
Nombila kabalu na muka-kulonda kabalu mu kalunga-ndonga.”
22 Mu kwita kwa simbu, Mosesa watwamenene baIsalele kutunda ku Kalunga-ndonga wa Kubenga, co baile mu mambo ya Shuri. Bendele bungenzi bwa matangwa atatu mu mambo, oloni kubawanene mema.
23 Co bakwetele ku Maraha,* oloni kubasele kunwa mema a ku Maraha mwafwa apwile a kulula mukemwo walukile uje mwela ngwendi Maraha.
24 Ngeci banu bashangumukile kuyayabalela Mosesa ngwabo: “Tunwa bikoni?”
25 Mosesa walombele bukwasi kuli Yehova, co Yehova wamumwesele muti. Mwombilile uje muti mu mema, aje mema apwile amabwa.
Njambi wapangesele cije cuma calingiwile kupwa cakumwenako mangana amwese baje banu byuma byatonda kuli bakebo. Njambi wabesekele mangana amone indi bamwononoka.
26 Co wendekele ngwendi: “Nga mutolilila lijwi lyange Yehova Njambi yeni na kulinga byuma byabibwa ku mesho ange na kwononoka mashiko ange na kulinga binjishaka, co kunjikaminenela mishongo injanenelele baka-Ijipiti mwafwa yange Yehova njimikangwisa.”
27 Munima yebi, bakwetele ku Elimu kuje kwakele tubwelubwelu 12 twa mema na miti ya mashakabale ya kupwa 70. Co bashimbikile cilombo cabo ku mema.
