Filimoni 1:1-25
1 Yange Paulu, lipanditi mwafwa ya Kristu Yesu, njili na ndolome yetu Timothi. Njisonekela yobe Filimoni mukwetu mutuli na kupangela hamo,
2 na ndokazi yetu Afiya, na mukwetu liswalale Akipasi, na cikungulukilo cije cili mu njibo yobe ngwange:
3 Ngozi yakama na kwoloka bya kutunda kuli Njambi Tate yetu na kuli Mwata wetu Yesu Kristu bikale neni.
4 Simbu yoshe njikakandelela Njambi munjikakwaka mu malombelo ange,
5 mwafwa njili na kuziba bya likulahelo lyobe nomu muwazemena Mwata Yesu na bakujela boshe.
6 Njili na kulombela ngwange likulahelo lyobe likushongangeye kuzibuka byuma byoshe byabibwa bituli nabyo muli Kristu.
7 Kuziba bya cizemo cobe ndolome yange kunanjizibisa kubwaha, co lalo kunanjizembeleka, mwafwa unahwimisa bimbunge bya bakujela.
8 Ngeci, ha kupwa kapositolo ka Kristu njinazituka kukuleka byuma byabibwa biunapande kulinga,
9 oloni njikulambelela mwafwa ya cizemo cobe, ha kuwana ngwe yange Paulu njinakolo, co lalo nji lipanditi mwafwa ya Kristu Yesu.
10 Njikulambelela hali munange Onesimasi uje injinapu ngwe ishe ha simbu injili mu kamenga.*
11 Hakulibanga wapwile wangoco kuli yobe, oloni hano napu wa seho kuli yobe na kuli yange.
12 Njili na kumwilwisa kuli yobe. Njamuzema na mbunge yange yoshe.
13 Njinashakele ngwange njikale nendi kuno mangana apange bipangi biunapandele kunjipangela ha simbu ibananjikutu mu kamenga mwafwa ya muzimbu waubwa.
14 Oloni kunjishaka kulinga cuma cije kuwanjitabesele mangana cuma cacibwa ciulinga citundilile kwisi ya mbunge yobe keti ca kukusindiya.
15 Hamo bikebyo byakubombolokelele ha simbu yaindondo,* mangana mweluka kuli yobe, ukale nendi myaka yoshe.
16 Mweluka, keti akupwe lika ndungo, oloni akupwe lalo ndolome yobe. Njamuzema, oloni yobe wamuzema manene mwafwa mwaliwanena ku mubila na kuli Mwata.
17 Ngeci, nga nji kabusamba kobe,* co mutambule mwamubwa ngwe muunesi kutambwila yange.
18 Co lalo nga kuli bimo byakubiisilile nambe nga ali na mukuli kuli yobe, co fwetesa yange.
19 Yange Paulu, njili na kusoneka na liboko lyange ngwange: Njikaufweta. Anuka ngwobe nobe uli na mukuli kuli yange, co ou mukuli unapu yobe bene.
20 Ndolome yange, njikulomba ngwange unjikwase ha kupwa muka-kukabangeya Mwata. Hwimisa mbunge yange ha kupwa muka-kukabangeya Kristu.
21 Njakulahela ngwange ulinga ngoco, mukemwo njili na kukusonekela mwafwa njazibuka ngwange ulinga byabingi kutubakana binjinendeka.
22 Co lalo njibwahesele kunjakukala, mwafwa njakulahela ngwange kwitila mu malombelo eni njiluka lalo kuli yeni.*
23 Epafrasi, mukwetu lipanditi mwafwa ya Kristu Yesu nakumeneka.
24 Co lalo Maki, Alistakasi, Dimasi na Luka, bakwetu mutuli na kupangela banakumeneka.
25 Ngozi yakama ya Mwata Yesu Kristu ikale neni mwafwa ya bimbunge byeni byabibwa.
Majwi a kwinikila
^ Lijwi na lijwi “malyenge.”
^ Lijwi na lijwi “ola imolika.”
^ Lijwi na lijwi “u mukwetu mutukapangela hamo.”
^ Nambe “bakanjipatula, co njikaija kuli yeni.”
