Genese 26:1-35
26 Co muje mu lifuti mwakobelele njala ngwe ije yakeleko hakulibanga mu matangwa a Abrahamu. Ngeci Isaki waile ku Gela kuli Abimeleki mwene wa baFilistiya.
2 Co Yehova washolokele kuli Isaki na kumuleka ngwendi: “Keti uye ku Ijipiti. Kala mu lifuti linjikumwesa.
3 Kala omu mu lifuti ngwe muka-kwija, co njitwalelelaho kukala nobe na kukubezikisa mwafwa awa mafuti oshe njikawana kuli yobe, co njikashulisilila cikumiiyo cinjalikumiiye na isho Abrahamu ngwange:
4 ‘Njikatumisa bana* bobe ngwe bingongonosi bya mwilu. Njikana bana* bobe mafuti oshe awa, co kwitila muli bana* bobe miyati yoshe ya ha lifuti-libu ikabezika,’*
5 mwafwa Abrahamu watolililile ku lijwi lyange, co watwaleleleleho kunyunga binjitonda nebi binjamulekele na mashiko ange oshe.”
6 Co Isaki watwaleleleleho kukala mu Gela.
7 Banu ba kuje ku mwela mubakele na kumwihula hali munakazi wendi, wakele na kwendeka ngwendi wapwile ndokazi yendi. Wazibile lyoba kwendeka ngwendi wapwile munakazi wendi mwafwa wendekele ngwendi: “Banu bomu mu mwela basa kunjitsiya mwafwa ya Rabeka,” mwafwa wapwile wamubwa.
8 Mu kwita kwa simbu, Abimeleki mwene wa baFilistiya wakele na kutala mu windo, co wamwene Isaki ali na kukwata-kwata* munakazi wendi Rabeka.
9 Haje bene Abimeleki wasanene Isaki na kumuleka ngwendi: “Kumou wapwa munakazi wobe! Bika biunendekelele ngwobe ndokazi yobe? Isaki wamukumbulwile ngwendi: “Njinendekele ngoco mwafwa njinatewele ngwange banjitsiya mwafwa yendi.”
10 Oloni Abimeleki wendekele ngwendi: “Bika biunatulingilamo? Umo wa banu betu ngwe nalilala na munakazi wobe, co ngwe unatulingisa tukale na mulonga.”
11 Co Abimeleki washikile banu boshe ngwendi: “Woshe akwata ou munalume na munakazi wendi banapande kumutsiya.”
12 Co Isaki washangumukile kukuna mbuto muje mu lifuti. Co uje mwaka watejele lwa kupwa 100 ku byuma byakunine mwafwa Yehova wakele na kumubezikisa.
13 Isaki wafukile, co watwaleleleleho kufuka kweta noho hafukilile manene.
14 Wakele na matanga a bimanga na bingombe na bangamba babangi, co baFilistiya bashangumukile kumuzibila cipululu.
15 Co baFilistiya bofwelele masima oshe abendile bangamba ba ishe mu simbu ya ishe Abrahamu.
16 Co Abimeleki walekele Isaki ngwendi: “Tunda hayehi netu mwafwa hano uli na nzili kututubakana.”
17 Co Isaki watundile kuje, wakashimbikile cilombo cendi mu cinema ca Gela, co wakakele kuje.
18 Co Isaki wofulwile masima aje abendile mu simbu ya ishe Abrahamu aje abofwelele baFilistiya munima ya kutsa kwa Abrahamu. Co wawalukile mazina aje awalukile ishe.
19 Bangamba ba Isaki mubakele na kwinda masima mu cinema, bawanene lisima lyakale na mema amabwa.
20 Co tunyungi ba ku Gela bashangumukile kulicokota na tunyungi ba Isaki ngwabo: “Mema etu awa.” Ngeci walukile lije lisima ngwendi Eseki* mwafwa balicokotele nendi.
21 Co bashangumukile kwinda lisima likwabo lalo, oloni balicokotelelelyo lalo. Ngeci walilukile ngwendi Sitina.*
22 Mu kwita kwa simbu, watundile kuje, co wakendile lisima lyeka, oloni lije kubalicokotelelelyo ngeci walilukile ngwendi Lehobothi* na kwendeka ngwendi: “Mwafwa hanwoni Yehova nanjana mwela wa kupwamo, co natulingisa tutume mu lifuti.”
23 Co watundile kuje, waile ku Bele-sheba.
24 Buje butsiki Yehova washolokele kuli ikeye na kumuleka ngwendi: “Yange Njambi ya isho Abrahamu, keti uzibe lyoba mwafwa njili hamo nobe. Njikubezikisa na kutumisa bana* bobe mwafwa ya ngamba yange Abrahamu.”
25 Ngeci watungile mutula kuje na kusana ha lizina lya Yehova. Co Isaki washimbikile tenti yendi kuje, co bangamba bendi bendileko lisima.
26 Mu kwita kwa simbu, Abimeleki watundile ku Gela waile kuli Isaki. Waile hamolika na muka-kumunangula Ahuzate na ntwama ya maswalale bendi Faiko.
27 Ngeci Isaki wabehwile ngwendi: “Bika bimunezila? Ngwetu munanjizindile na kunjisheka mu mutambela weni.”
28 Bamukumbulwile ngwabo: “Tunalimwena ha kujela ngwetu Yehova natwalelelaho kukala nobe. Mukemwo tunaliyongwele ngwetu tulisinge nobe na kulinga cikumiiyo nobe
29 ngwetu keti ulinge cuma cacibi kuli yetu ngecilika omwo yetu kutwakubulumwine, ha kuwana ngwe twakulingile mwamubwa ha kukusununa mu kwoloka. Yehova ali na kukubezikisa.’”
30 Co wabalingilile cilika, co balile na kunwa.
31 Lyamukwabo mutondo balibangele kwinduka, co balisingile. Munima yebi, Isaki wabasunwine, co bamusezele mu kwoloka.
32 Ha litangwa lije bene, bangamba ba Isaki bezile na kumuleka muzimbu wa lisima libendile. Bamulekele ngwabo: “Tunawana mema!”
33 Ngeci walilukile ngwendi Shiba.* Mukemwo na lelo lino ije nganda baisana ngwabo ya Bele-sheba.
34 Isau mwakele na myaka 40, wambatele Judithi muna Beeli wa kaHiti kupwa munakazi wendi. Wambatele lalo Basemathi muna Eloni wa kaHiti.
35 Aba banakazi bazibisile manene Isaki na Rabeka kubabala ku mbunge.
Majwi a kwinikila
^ Lijwi na lijwi “mbuto.”
^ Lijwi na lijwi “mbuto.”
^ Lijwi na lijwi “mbuto.”
^ Nambe “ikaliwanena bibezikiso akewo babenya.”
^ Nambe “kubumbateya.”
^ Kulumbununa “Kulilwisa.”
^ Kulumbununa “Kulibangeya.”
^ Kulumbununa “Myela Yakama.”
^ Lijwi na lijwi “mbuto.”
^ Kulumbununa “Cisingo; 7”
