Genese 29:1-35
29 Munima yebi, Jakobu watwaleleleleho na bungenzi bwendi, co waile ku lifuti lya banu ba ku Butuhukilo bwa litangwa.
2 Co wamwene lisima lyakele mu lihya na matanga atatu a bimanga anabutama kuyehi nalyo, mwafwa kuje ku lisima kukekwo kubakele na kunwisila mema bimanga babo. Co ku kanwa ka lisima bafwikileko limanya lyakama.
3 Matanga oshe muwabutamene kuje ku lisima, batundisile lije limanya libafwikile ku kanwa ka lisima, co banwisile mema matanga oshe a bimanga, co munima belwisile lije limanya ku kanwa ka lisima.
4 Co Jakobu wabehwile ngwendi: “Babushoko bwange mutunda kuli?” Bamukumbulwile ngwabo: “Tutunda ku Halani.”
5 Jakobu wabehwile lalo ngwendi: “Mumuzibuka Labani mutekulya Nahole?” Bamukumbulwile ngwabo: “Tumuzibuka.”
6 Mwazibile ngoco, wabehwile lalo ngwendi: “Ali mwamubwa ndi?” Bamukumbulwile ngwabo: “Ali mwamubwa, co na munendi Recho uje ali na kwija muje na bimanga.”
7 Co Jakobu wendekele ngwendi: “Litangwa kulicili, ino keti ikeyo simbu ya kukungulula bimanga. Banwiseni mema muye na kubalisa.”
8 Bakumbulwile ngwabo: “Bakatubindika kulinga ngoco kubanga matanga oshe analikungulwila hamo asina tutundisa eli limanya ku kanwa ka lisima, co tunwisa mema bimanga.”
9 Simbu Jakobu wacikele na kwendeka nabo, Recho wakwetele na bimanga ba ishe mwafwa wapwile kanyungi.
10 Jakobu mwamwene Recho muna inanu Labani na bimanga ba Labani, bwasi-bwasi Jakobu washwenene kuje ku lisima, co watundisile lije limanya lyakele ku kanwa ka lisima na kunwisa mema bimanga ba inanu Labani.
11 Co Jakobu watsembele Recho na kushangumuka kulila manene na misozi.
12 Co Jakobu washangumukile kuleka Recho ngwendi wapwa kabushoko* ka ishe, co lalo ngwendi wapwa muna Rabeka. Co Recho washatukile na kukaleka ishe.
13 Labani mwazibile lika ngwabo Jakobu muna ndokazi yendi naija, washatukile na kukaliwana nendi. Wakamubumbateyeye na kumutsemba, co wamutwalele ku njibo yendi. Ngeci Jakobu washangumukile kuleka Labani byuma byoshe byalingiwile kuli ikeye.
14 Labani walekele Jakobu ngwendi: “Cili bene u citsiya cange na situ* yange.” Ngeci Jakobu wakele hamolika na Labani ngonde yoshe yamutunu.
15 Labani wehwile Jakobu ngwendi: “Kuma unjipangela lika bwana mwafwa u kabushoko* kange ndi? Njileke, bika biushaka njikufwete?”
16 Labani wakele na bana ba bambanda babali. Munendi wa kukola wapwile Leya, co munendi wa mwanike wapwile Recho.
17 Leya kakele na mesho amabwa, oloni Recho wemanene mwamubwa, co lalo wakele na cihanga cacibwa.
18 Jakobu wazemene Recho mukemwo wendekele ngwendi: “Njikupangela myaka 7 mangana unjane munobe wa mwanike Recho.”
19 Labani mwazibile ngoco, wendekele ngwendi: “Cacibwa kumwana kuli yobe kutubakana kumwana ku munalume weka. Twalelelaho kukala nange.”
20 Jakobu wapangelele Labani myaka 7 mangana amwane Recho. Oloni mu mesho a Jakobu ei myaka yasholokele lika ngwe matangwa amandondo mwafwa wazemene manene Recho.
21 Co Jakobu walekele Labani ngwendi: “Njane munakazi wange mangana njililale nendi mwafwa simbu itwalizibasanene inapumo.”
22 Labani mwazibile ngoco, wakungulwile banu boshe ba muje mu mwela na kulinga cilika.
23 Oloni ku mangwezi, Labani watwalele munendi wa mumbanda Leya kuli Jakobu mangana akalilale nendi.
24 Labani wanene lalo ngamba yendi wa munakazi Ziupa kuli munendi Leya mangana apwe ngamba yendi.
25 Lyamukwabo mutondo, Jakobu wamwene ngwendi Leya ikeye ibamwanene. Ngeci wehwile Labani ngwendi: “Bika biunanjilingilamo? Kuma Recho keti ikeye injinakupangela ndi? Bika biunanjikwisila?”
26 Labani wamukumbulwile ngwendi: “Mu cisemwa cetuni kutwesi kubanga kushombwesa tahi wa mwanike kuseza ntwatwa.
27 Manesa tahi calumingo ca bushombolwa nou munakazi, co munima njikwana ou munakazi mukwabo mangana unjipangele lalo myaka 7.”
28 Jakobu walingile ngoco, co wamanesele calumingo na uje munakazi. Munima, Labani wamwanene munendi Recho kupwa munakazi wendi.
29 Co lalo Labani wanene ngamba yendi wa munakazi Biuha kuli munendi Recho mangana apwe ngamba yendi.
30 Co Jakobu walilalele na Recho, co wazemene Recho kutubakana Leya, co Jakobu wapangelele Labani myaka 7 lalo.
31 Yehova mwamwene ngwendi Leya kubamuzemene,* wamulingisile emite,* oloni Recho wapwile mumba.
32 Ngeci Leya wakele na cikute, co wakitile mwana wa munalume na kumuluka ngwendi Rubeni,* mwafwa wendekele ngwendi: “Njinamuluku eli lizina mwafwa Yehova namono kayando kange. Mwafwa hanwoni munalume wange ashangumuka kunjizema.”
33 Wakele lalo na cikute, co wakitile mwana wa munalume, co wamulukile ngwendi Simyoni,* co wendekele ngwendi: “Njinamuluku eli lizina mwafwa Yehova nanjitolilila, mwafwa kubanjizemene mukemwo nanjana nou mwana mukwabo.”
34 Wakele lalo na cikute, co wakitile mwana wa munalume. Wamulukile ngwendi Levi,* co wendekele ngwendi: “Hanwoni munalume wange alipandakana nange mwafwa njinamukitila bana ba banalume batatu.”
35 Co wakele lalo na cikute, wakitile mwana wa munalume, co wamulukile ngwendi Juda. Wendekele ngwendi: “Hanwoni njishangazala Yehova.” Munima yebi, walikelele kukita.
Majwi a kwinikila
^ Lijwi na lijwi “ndolome.”
^ Nambe “lininga.”
^ Lijwi na lijwi “ndolome.”
^ Lijwi na lijwi “bamumuzindile.”
^ Lijwi na lijwi “washokolwele shibu yendi.”
^ Kulumbununa “Taleni Mwana wa Munalume.”
^ Kulumbununa “Kuziba.”
^ Kulumbununa “kwononoka; kulipandakana.”
