Genese 30:1-43
30 Recho mwamwene ngwendi kakitilile Jakobu bana, wazibilile ndokazi yendi cipululu, co wakwatelelele kuleka Jakobu ngwendi: “Njane bana, keti ngoconi njitsa.”
2 Jakobu mwazibile ngoco, walubalelele manene Recho, co wendekele ngwendi: “Kuma yange Njambi uje nakwonowesa kukala na bana ndi?”
3 Co Recho wendekele ngwendi: “Ndungo yange Biuha ou. Lilale nendi mangana anjikitile bana,* co kwitila muli ikeye nange lalo njikale na bana.”
4 Ngeci Recho wanene ngamba yendi Biuha kuli Jakobu kupwa munakazi wendi, co Jakobu walilalele nendi.
5 Biuha wakele na cikute, co mu kwita kwa simbu, wakitilile Jakobu mwana wa munalume.
6 Co Recho wendekele ngwendi: “Njambi napu lyaako wange, co lalo natolilila ku lijwi lyange, ngeci nanjana mwana wa munalume.” Mukemwo wamulukile ngwendi Dani.*
7 Biuha ngamba ya Recho wakele lalo na cikute, co mu kwita kwa simbu, wakitilile Jakobu mwana wa munalume wamucibali.
8 Co Recho wendekele ngwendi: “Njinalu na nzili na ndokazi yange. Co nange lalo njinahyana.” Ngeci walukile uje mwana ngwendi Nafutali.
9 Leya mwamwene ngwendi necela kukita bana, wambatele ngamba yendi Ziupa na kumwana kuli Jakobu kupwa munakazi wendi.
10 Co Ziupa ngamba ya Leya wakitilile Jakobu mwana wa munalume.
11 Co Leya wendekele ngwendi: “Njinabezika.” Co walukile uje mwana ngwendi Gadi.*
12 Munima yebi, Ziupa ngamba ya Leya, wakitilile Jakobu mwana wa munalume wamucibali.
13 Co Leya wendekele ngwendi: “Njinabwahelela mwafwa banakazi bakanjendeka ngwabo nji wa kubwahelela.” Ngeci walukile uje mwana ngwendi Asha.*
14 Litangwa limo, Rubeni wakele na kwenda mu lihya ha simbu ya kuteja tiliku, co wawanenemo bushuka bwa mandraki.* Ngeci wambatele buje bushuka na kubutwala kuli ina Leya. Co Recho walombele Leya ngwendi: “Njaneko bushuka bwa munobe.”
15 Leya mwazibile ngoco, wehwile Recho ngwendi: “Kuma kuwapwisilemo muunanjinyeke munalume wange ndi? Co ushaka lalo kwambata na bushuka bwa munange ndi? Co Recho wakumbulwile Leya ngwendi: “Nga ngoconi kumani Jakobu alilala nobe butsiki nga unjana bushuka bwa munobe.”
16 Jakobu mwakele na kutunda ku mahya mangwezi, Leya wamusheshele. Co wamulekele ngwendi: “Yange iulilala nendi lelo mwafwa njinakukumuna na bushuka bwa munange.” Ngeci walilalele nendi buje butsiki.
17 Co Njambi wazibile Leya na kumukumbulula. Wamukwasele akale na cikute, co mu kwita kwa simbu, wakitilile Jakobu mwana wamucitanu.
18 Co Leya wendekele ngwendi: “Njambi nanjana fweto yange mwafwa njinana ngamba yange kuli munalume wange.” Ngeci walukile uje mwana ngwendi Isakale.*
19 Leya wakele lalo na cikute, co mu kwita kwa simbu, wakitilile Jakobu mwana wa munalume wa bu 6.
20 Leya wendekele ngwendi: “Njambi nanjana bwana bwabubwa, co hanwoni munalume wange anjitambula mwafwa njinamukitila bana ba banalume 6.” Co walukile munendi ngwendi Zebuloni.*
21 Kutundaho, wakitile mwana wa munakazi, co wamulukile ngwendi Dina.
22 Kumamaneselelo, Njambi wanukile Recho, co wamuzibile na kumukumbulula ha kumukwasa mangana emite.*
23 Recho wakele na cikute, co wakitile mwana wa munalume. Wendekele ngwendi: “Njambi nanjitundisa shwamwa.”
24 Ngeci wamulukile ngwendi Jozefu,* co wendekele ngwendi: “Yehova nanjana mwana wa munalume mukwabo.”
25 Recho mwakitile Jozefu, Jakobu walekele Labani ngwendi: “Njisuule njiluke kwimbo lyetu na ku lifuti lyetu.
26 Njane banakazi bange banjinakupangela, hamolika na bana bange mangana njiye, mwafwa uzibuka mwamubwa munjinakupangela.”
27 Labani walekele Jakobu ngwendi: “Nga njinawana kutetela ku mesho obe, keti uye. Munjinataha* njinamono ngwange Yehova ali na kunjibezikisa mwafwa yobe.”
28 Labani wendekele lalo ngwendi: “Njileke fweto yobe, co njikwanayo.”
29 Jakobu wendekele ngwendi: “Uzibuka munjinakupangela nomu munjinanyungila butanga bwobe.
30 Simbu kanda njije wakele lika na byabindondo. Oloni hano butanga bwobe bunalibwezelela na kusemunwina, co Yehova nakubezikisa kutunda hanjinezila. Tangwa lika njikashangumuka kulipangela byange?”
31 Co wamwihwile ngwendi: “Njikwane bika?” Jakobu wamukumbulwile ngwendi: “Kuwapandele kunjifweta. Nga unjilingila eci cuma cimo, co njishangumuka lalo kulisa butanga bwobe na kubunyunga.
32 Lelo njita mu butanga bwobe bwoshe, co yobe unapande kwaka kumukulo bimanga boshe ba mindoli-ndoli na ba mapwata-mapwata na ba kubenguluka baje bali mukati ka bana ba bimanga ba nkomba, na bimembe boshe ba mapwata-mapwata na ba mindoli-ndoli baje bali mukati ka bimembe ba lwabo. Kutunda hano, ei ikeyo ipwa fweto yange.
33 Co kusungama kwange kukanjendekelako kulutwe muukaija na kumona fweto yange. Bimembe boshe ba kujeneka mindoli-ndoli na mapwata-mapwata baukawana mukati ka bimembe ba lwabo na bimanga baje keti ba kubenguluka baukawana mukati ka bana ba bimanga ba nkomba, bakapwa ba kwiba nga ukanjiwana nabo.”
34 Labani mwazibile ngoco, wendekele ngwendi: “Bukalu bwahi. Kupwe ngoco bene ngwe muunendeka.”
35 Co lije bene litangwa, Labani wakele kumukulo bizamba ba bimembe ba mishulundu na ba mapwata-mapwata na bimembe ba lwabo boshe ba mindoli-ndoli na ba mapwata-mapwata. Wakele lalo kumukulo na bana ba bimanga ba nkomba boshe baje bakele na mubala wa kutoka na ba kubenguluka, co wabanene bana bendi mangana babanyunge.
36 Munima yebi, Labani wakutile bungenzi bwa matangwa atatu kutunda haje hakele Jakobu, co Jakobu wakele na kunyunga matanga a Labani aje asalele nendi.
37 Co Jakobu watetele minango ya muti wa storaki na muti wa omondi na muti wa puleni, co ha byula byayo walendulwileho mangana hakale mapwata a kutoka.
38 Co wakele ije minango kulutwe lwa butanga. Wayakele mu mangolengole a kunwila mema kuje kubakele na kwija na kunwila bimuna mema mangana baje bimuna bakulilondele kulutwe lwa ije minango mubaija na kunwa mema.
39 Ngeci baje bimuna bakele na kulilondela kulutwe lwa ije minango, co baje bimuna bakele na kusema bana ba mishulundu na ba mindoli-ndoli na ba mapwata-mapwata.
40 Co Jakobu watundisile baje bana ba bimanga ba nkomba haje ha matanga, co walingisile aje matanga alitale na bimuna ba mishulundu na ba kubenguluka, boshe baje bakele hakati ka matanga a Labani. Watundisileho matanga endi, co kawakumbasanene na matanga a Labani.
41 Co simbu yoshe baje bimuna ba kukanyama mubakele na kulilonda, Jakobu wakele na kwambata ije minango na kuyaka mu mangolengole kulutwe lwa baje bimuna mangana balilondele kuyehi na ije minango.
42 Oloni bimuna ba kuzeya mubakele na kulilonda, kakele na kwaka ije minango mu mangolengole. Ngeci bimuna boshe ba kuzeya bapwile ba Labani, oloni ba kukanyama bapwile ba Jakobu.
43 Co Jakobu wafukile manene, co wakele na matanga akama na bangamba ba banalume na ba banakazi na tumele na bidonki.
Majwi a kwinikila
^ Lijwi na lijwi “akitile ha mabuli ange.”
^ Kulumbununa “Lyaako.”
^ Kulumbununa “Kubezika.”
^ Kulumbununa “Kubwahelela.”
^ Bushuka buje bubamwene bamo ngwabo bukwasa munu akale na lusemo.
^ Kulumbununa “Napu fweto.”
^ Kulumbununa “Kutambula.”
^ Lijwi na lijwi “Njambi wamutolilillile, co washokolwele shibu yendi.”
^ Inapu lizina lya kabatu lya Josifaya lije lilumbununa ngwalyo “Jah Abwezelele (Akeleko).”
^ Nambe “bukaleho bunamwesa ngwabwo.”
