Isaya 1:1-31
1 Eci cikeco cimona camwene Isaya* muna Amozi kutalesa ku Juda na Jelusalema mu matangwa a Uziya, a Jothamu, a Ahazi nawa a Hezekiya, bimyene ba Juda:
2 Zibeni, eni melu, co tolilila, obe lifuti-libu,Mwafwa Yehova nendeka ngwendi:
“Njinalele bana na kubakolesa,Oloni bananjitengulukila.
3 Ngombe azibuka uje wamulandele,Co donki* azibuka kwakamulisila shukulu yendi.
Oloni Isalele kanjizibuka,*Banu bange kubesi na kulinga byuma mu kuzibisisa.”
4 Lubinda lwa muyati wa baka-bubi,Banu baje kusebuka kwabo kunaleme,Cisemwa ca banu bababi, bana ba bilinga byabibi.
Banaseze Yehova,Banashaula Wakujela wa Isalele,Banamukengesa nima.
5 Bamipupila hali lalo mumuli na kutwalelelaho kupwa baka-kutengulukila?
Mutwe woshe ubabala,Na mbunge yoshe ibinja.
6 Kutunda ku bilyato kweta ku mutwe nahamo hahi hanalikangula.
Hoshe hali lika bimbandu byabindondo na bitunyu na bimbandu byakama.
Kubabisakele* nambe kubikuta nambe kubyononwesa na mazi.
7 Lifuti lyeni linapu ngundu.
Binganda byeni banabyenyeka na tuhya.
Banu ba ku lifuti lyeka babiisa lifuti lyeni oku munabatala.
Linapu ngwe lifuti libanafungulula banu ba ku lifuti lyeka na kulipwisa ngundu.
8 Muna Siyone wa munakazi banamuseze ngwe lipapela lya mu lihya lya binyu,Ngwe cipundo ca mu lihya lya kyukamba,Ngwe nganda ibanazengeleka.
9 Ngwe Yehova wa maswalale katusezelele bamo baje banoboka,Ngwe tunapu lika ngwe Sodoma,Co lalo ngwe tunalifu na Gomola.
10 Zibeni lijwi lya Yehova, eni baka-kuyula babakalu ba mu Sodoma.
Tolilileni mwamubwa ku mashiko* a Njambi yetu, eni banu ba mu Gomola.
11 Yehova ngwendi: “Milambu yeni yaingi ili na seho muka kuli yange?
Bwana bweni bwa kwenyeka bwa bimanga ba nkomba na mazi a tusitu ba kununa binapumo,Co kunjishaka maninga a bana ba bingombe na bimanga na bimembe.
12 Iya akamileke ngwendiMwije na kulisholola ku mesho ange,Muye na kulyatangela mu malapa ange?
13 Likeleni kunena bwana bweni bwa binona bwa kujeneka seho.
Isense yeni inapu ya bunyengwe kuli yange.
Mukalingi bilika bya kutenama kwa ngonde na sabata na kubwahesa biwano.
Kunjasa kumitabesa mulinge manseno na biwano byeni bya kulitila.
14 Njinazindi bilika byeni bya kutenama kwa ngonde na bilika byeni bikwabo.
Binapu citele kuli yange.
Njajuka kubyambata.
15 Co mumwolola maboko eni,Njilalameka mangana keti njimimone.
Nameme mulombele malombelo amangi,Kunjimitolilila.
Maboko eni anashulu na maninga.
16 Taneni, lijeleseni,Tundiseni bilinga byeni byabibi ku mesho ange.
Likeleni kulinga byuma byabibi.
17 Lilongeseni kulinga byuma byabibwa, akuleni mwamubwa,Ololeni muka-kulyatelela bakwabo,Lwileni lisesa lya mwana uje kesi na ishe*Na kwimanena fwile.”
18 Yehova ngwendi: “Ijeni oni tubwahese byuma mukati ketu.
Nameme bubi bweni bubenge ngengu,Bupwa bwa kutoka ngwe mema a kukonda.
Nameme bubenge manene ngwe nanga ya kubenga,Bupwa ngwe bwanda bwa kutoka.
19 Nga mulyangwila kwononoka,Mulya byuma byabibwa bya mu lifuti.
20 Oloni nga mubyana na kupwa baka-kutengulukila,Mukwale umilya,Mwafwa yange Yehova, yange njinendekamo.”
21 Ei nganda yapwile ya kulongwa, lelo ikatenguluke kupwa lihule!
Mwashulile baka-kwakula mwamubwa.
Mwakele bilinga bya kusungama,Oloni hano mwakushula mwa baka-kutsiya banu.
22 Obe nganda, siuva yobe inatenguluka kupwa mazilo,Co bwala bwobe* bunashamuka na mema.
23 Bamyata bobe bapwa ba kutindibala, co bali na kulikwatasana na bezi.
Umo na umo wabo wazema lizika-kanwa, co ali na kushakezeka bwana.
Kubesi na kwakula mwamubwa uje kesi na ishe,*Co ñanda ya fwile kuyesi na kweta kuli bakebo.
24 Ngeci, Mwata wa busunga, Yehova wa maswalale,Wanzili wa Isalele nendeka ngwendi:
“Ewa! Njilitotomona bitozi bangeNa kubalinga shambandinga.
25 Njikulwisa na liboko lyange,Njitosola maboko obe ngwe uje awatosola na lito,Co njitundisa mazilo obe oshe.
26 Njikelwisa maako bobe ngwe mukwafwile ku mashangumukiloNa kwilwisa baka-kunangula bobe ngwe mukwafwile ku maputukilo.
Munima yebi, bakakusana ngwabo Nganda ya Kusungama, Mbongi ya Kulongwa.
27 Siyone bakaipatula omwo bakayakula mwamubwa,Co banu bayo baje bakeluka, bakabapatula na kusungama.
28 Baka-kutengulukila na baka-bubi bakabapokozwela hamo,Co baje baseza Yehova bakahwa njwa.
29 Mwafwa bakazibila shwamwa miti ya nzili iwashungwiiye,Co ukashauka mwafwa ya mahya* awangwile.
30 Mwafwa upwa ngwe muti wakama uje uli na maputa aje ali na kujujwama,Na kupwa ngwe citungu cije kucesi na mema.
31 Munu wa nzili apwa bulimu,Co cipangi cendi cipwa bishashe.
Byoshe bibali bikwata milangi,Co naumo wahi abizima.
Majwi a kwinikila
^ Kulumbununa “Kwobola kwa Yehova.”
^ Nambe “cimulu.”
^ Nambe “kazibuka shukulu yendi.”
^ Lijwi na lijwi “Kubabikamwine masina.”
^ Nambe “bilongesa.”
^ Nambe “siwa.”
^ Nambe “bwala bwobe bwa tiliku.”
^ Nambe “siwa.”
^ Hamo miti na mahya abakele na kupangesa mu kulemesa binjambi ba makuli.
