Isaya 10:1-34
10 Lubinda lwa baje batunga mashiko amabi,Baje batwalelelaho kusoneka mashiko a kulyatelela bakwabo,
2 Mangana babyane kwakula ñanda ya kahutu,Na kujeneka kwakula mwamubwa banu bange ba kwisi.
Bafungulula byuma bya bifwileNa kupukula byuma bya bana baje kubesi na baishabo.*
3 Bika biukalinga ha litangwa lya kusompa*Kunyonga mucikaija kutunda kulako?
Ukatewela kuli iya mangana akukwase?
Co kuli kuukaseza bufuko* bwobe?
4 Nomu muukalingila mwahi kubanga kutsikama mukati ka mapanditiNambe kutsila hamo na baje babakatsiya.
Mwafwa yebi byuma byoshe, butenu bwendi kubwahwile,Co anga nolwela liboko lyendi mangana abapupe.
5 “Taleni, muka-Asiria!
Ikeye mbweti injipangesa mu kumwesa butenu bwange.
Njipangesa mulamu uli mu liboko lyendi mu kwana kashitiko.
6 Njimutuma akalwise muyati wa baka-kutengulukila,Akalwise banu baje bananjilubalesa.
Njimushika akafungulule byuma byabingi na kupukula byuma byabingiNa kubalyatangela ngwe uje alyatangela mandoba mu tapalo.
7 Nameme bisinganyeka byendi byeka, akasinganyeka mu ngila ei,Nameme biyongola bya mu mbunge yendi byeka, akatumba obu butumbe,Mwafwa nayongola mu mbunge yendi ngwendi abanyongesa,Nayongola kunyongesa miyati yaingi, keti yaindondo.
8 Mwafwa ali na kwendeka ngwendi,‘Kuma bamyata bange boshe keti bimyene ndi?
9 Kuma Kauno kuilifu na Kakemishi ndi?
Kuma Hamathi kuilifu na Apadi ndi?
Kuma Samaliya kuilifu na Damasika ndi?
10 Liboko lyange linafungulula bumwene buje buli na binjambi ba kujeneka seho,Buje bwakele na tumponya ba kushonga babangi manene kutubakana ba mu Jelusalema na Samaliya.
11 Kuma kunjilingi Jelusalema na tumponya bayoNgwe munjinalingila Samaliya na binjambi bayo ba kujeneka seho ndi?’
12 Yehova mwakamanesa bipangi byendi byoshe ha Munkinda wa Siyone na mu Jelusalema, akana kashitiko mwene wa Asiria mwafwa ya likamba lyendi na talesi yendi ya kulyalesa, ya kulijundula.
13 Mwafwa nendeka ngwendi,‘Njikalinga ngoco na nzili ya liboko lyangeNa mana ange, mwafwa njakala na mana.
Njikatundisa binginga bya miyati ya banuNa kupukula bufuko bwabo,Na kufungulula banu bakalamo ngwe munu wa nzili mwakafungulula banu.
14 Njikambata byuma bya banu,Ngwe munu uje akobelesa liboko lyendi mu lishwa.
Njikakungulula byuma byoshe bya ha lifuti-libu,Ngwe munu uje akungulula mayaki abanombila kuti.
Banu boshe bakapwa ngwe tuzila baje kubasa kulyamena.’”
15 Kuma ngimbu yasa kulimona kupwa yakama kutubakana uje ali na kuishinjisa ndi?
Kuma saha yasa kulimona kupwa yakama kutubakana uje ali na kuisahesa ndi?
Kuma mulamu wasa kuhwingisa uje naujundula ndi?
Nambe mbweti kuma yasa kujundula uje kubapangele ha citi ndi?
16 Ngeci, Mwata wa busunga, Yehova wa maswalale,Ayondwesa banu bayo ba kununa*Na kushwameka tuhya mwisi ya bumpau bwayo.
17 Ceke ca Isalele cipwa tuhya,Co Wakujela wendi apwa mulangi wa tuhya.
Tuhya tushwama na kwenyeka mwila wayo* na biputa byayo bya mingonga mu litangwa lya ngongo.
18 Akamanesa bumpau bwa shwata yayo na bumpau bwa lihya lyayo lya miti ya bushuka,Bikapwa ngwe mwakayondwela munu uje ali na kubinja.
19 Miti ije ikasala mu shwata yendiIkapwa yaindondo manene, co na mwanike akasa kuitanda.
20 Ha litangwa olyo, baje bakasalaho ku batekulwila ba IsaleleNa bakunjibo ya Jakobu baje bakoboka,Kubakakulahela lalo uje wabapupile,Oloni bakakulahela Yehova,Wakujela wa Isalele, na kupwa ba kulongwa kuli ikeye.
21 Baje bakasalaho bakebo lika bakeluka,Baje bakasalaho ku batekulwila ba Jakobu bakeluka kuli Njambi wa Nzili.
22 Mwafwa nameme banu bobe, obe IsaleleBanapu ngwe mushekesheke wa ku kalunga-ndonga,Baje bakasalaho bakebo lika bakeluka.
Njambi nayongola kunyongesa banu,Co cihiso cikabangumbula ngwe libazi.
23 Eyo, Mwata Wahakamwa ya Byoshe, Yehova wa maswalale, nayongola kubanyongesa,Akanyongesa banu mu lifuti lyoshe.
24 Ngeci, Mwata Wahakamwa ya Byoshe, Yehova wa maswalale, nendeka ngwendi: “Eni banu bange mwakala mu Siyone, keti muzibile lyoba muka-Asiria, uje wakele na kumipupa na mbweti yendi na kujundula mulamu wendi mangana amipupe ngwe mubalingile baka-Ijipiti.
25 Mwafwa mu simbu yaindondo lika njimusompa. Butenu bwange bumwepukila na kumunyongesa.
26 Yehova wa maswalale amuhwingisila cibanzi ngwe mwalingilile omwo wahyanene Midiani ku limanya lya Olebu. Co akolwela mulamu wendi ha kalunga-ndonga na kuujundwila mwilu ngwe mwalingile kuli Ijipiti.
27 Ha litangwa olyo, citele cendi cikatunda ha citsili cobe,Na joko yendi ikatunda ha singo yobe,Co ei joko ikapokoka mwafwa ya mazi.”*
28 Naija ku Ayathi,Neti mu Migroni,Natulila bitenga byendi mu Mikimashi.
29 Najabuka ha mwaba,Nalalela mu Geba.
Lama ajaja, banu ba mu Gibea ije yapwa nganda ya Saulu banatewe.
30 Tambeka na kutetubuka, obe muna Galimu wa munakazi.
Tolilila, obe Laisha,Obe Anathothi wa kahutu.
31 Banu ba mu Madimena banatewe.
Banu ba mu Gebimu banabanda.
32 Ha litangwa lino bene emana ku Nobu.
Enazeka faindi yendi ku munkinda wa muna Siyone wa munakazi,Kulumbununa lilundu lya Jelusalema.
33 Taleni! Mwata wa busunga, Yehova wa maswalale,Ali na kubatozola minango mu ngila ya kutewesa.
Miti yailaha manene bali na kuiteta,Co miti ya kuya manene mwilu bali na kuiwisa.
34 Ateta biputa bya kuzika bya mu shwata na ngimbu,*Co uje wanzili awisa Lebanoni.
Majwi a kwinikila
^ Nambe “bisiwa.”
^ Nambe “kwana kashitiko.”
^ Nambe “bumpau.”
^ Kulumbununa, banu ba Asiria.
^ Kulumbununa, Asiria.
^ Hamo kulumbununa mazi a kubwekesa tuhya nambe mazi abakele na kubwabesa bimyene.
^ Nambe “cikwata ca cikubo.”
