Isaya 13:1-22
13 Ou ukewo muzimbu wa kusompa Babiloni wamwene Isaya muna Amozi mu cimona:
2 “Imikeni cimweso ha munkinda wa mamanya.
Basaneni, bashobweyeni na liboko,Mangana baije na kukobelela ku bikolo bya banu ba bulemu.
3 Njinana eli lishiko baje banjinangula.*
Njinasana maswalale bange mangana bamwese butenu bwange,Co balisamba mu kulyalesa.
4 Tolilileni! Ku malundu kuli mbunga ya banu,Kuli na kuzibika ngwe banu babangi baliuya.
Tolilileni! Bumwene buli na kuliuya,Baka-mafuti baje banalikungulula hamo bali na kuliuya.
Yehova wa maswalale ali na kukungulula maswalale mangana baye ku nzita.
5 Bali na kwija kutunda ku lifuti lya kulako,Ku mamaneselelo a lilu.
Yehova ali na kwija na maswalale baje banapu bitwa byendi bya butenu,Mangana banyongese lifuti-libu lyoshe.
6 Mbolozokeni, mwafwa litangwa lya Yehova lili muyehi.
Likaija omwo Muka-nzili Yoshe akanyongesa byuma.
7 Mukemwo maboko oshe akazeya,Co mbunge ya munu woshe ikalijujukila manene.
8 Banu bali mu citanga.
Bali na kulitunya na kuziba kubabala,Ngwe munakazi ashaka kupapa.
Bali na kulitala umo na mukwabo mu kulikasamena,Oku bihanga byabo bimwesa ngwabyo bali na kuziba manene kubabala.
9 Taleni! litangwa lya Yehova lili na kwija,Litangwa lya kujeneka kutetela munu, lya kutewesa na butenu bwakama,Mangana lilingise lifuti lipwe cuma ca kukomokesa,Na kunyongesa baka-bubi bakalaho.
10 Mwafwa bingongonosi bya mwilu na bibunga bya bingongonosiKubikatu ceke.
Litangwa likazibala mulituhuka,Co ngonde kuikatu ceke.
11 Njikana kashitiko baje batunga ha lifuti-libu mwafwa ya bilinga byabo byabibi,Na banu bababi mwafwa ya kusebuka kwabo.
Njikamanesa kulyalesa kwa banu ba kulyalesa,Na kukehesa baka-kulyatelela ba kulyalesa.
12 Njikalingisa banu bapwe babandondo kutubakana goldi ibanajelesa,Bapwe babandondo kutubakana goldi ya ku Ofiya.
13 Mukemwo njikalingisa melu ajaje,Na kuningangesa lifuti-libu kulitundisa mu mwela walyoMwafwa ya butenu bwa Yehova wa maswalale ha litangwa lya butenu bwendi.
14 Ngwe shonge ibali na kuyomba, na butanga buje kubwesi nou abukungulula,Umo na umo wabo akeluka ku banu bendi.
Umo na umo wabo akatewela ku lifuti lyendi.
15 Woshe ibakawana bakamupulyasana,Co woshe ibakakwata akawa na mukwale.
16 Bana babo bakabasanyozola sanyu-sanyu oku banatala,Binjibo byabo bakabipukula,Co banakazi babo bakabapika.
17 Njibatumina baMede bakabalwise,Baje bamona siuva ngwe byuma byangoco,Co kubakele mbunge ku goldi.
18 Mata abo a lusipa akatsiya bakwenje.
Kubakazibila ngozi bimbututuNambe kutetela banike.
19 Co Babiloni ije yapwa bumwene bwa bumpau manene kutubakana bumwene bwoshe,Nganda yaibwa ibakalyalesela baKaudiya,Ikapwa ngwe binganda bya Sodoma na Gomola, Njambi mwabinyongesele.
20 Naumo wahi akatungamo,Nambe kukalamo ku bisemwa byoshe.
Kukwesi kaArabia akashimbikamo tenti yendi,Co kukwesi kanyungi akahwimisilamo butanga bwendi.
21 Tusitu ba mu mambo bakabutamamo.
Mu binjibo byabo mukashula binkungulu.
Banyamalanda bakakalamo,Co bimembe ba mu shwata* bakakilyangelamo.
22 Tusitu baje bakolula bakohyela mu tuposhi twayo,Co bimbanje bakohyela mu mapela ayo amabwa.
Simbu yayo ili muyehi, co matangwa ayo kubawabwezelela.”
Majwi a kwinikila
^ Lijwi na lijwi “banu bange ba kujela.”
^ Nambe hamo “badimona ba kulifwa na bimembe.”
