Isaya 14:1-32
14 Mwafwa Yehova akatetela Jakobu, na kwangula lalo Isalele. Akabaka* mu lifuti lyabo, co banu ba ku mafuti eka bakalikwatasana nabo na kukala na bakunjibo ya Jakobu.
2 Miyati ya banu bakaya hamo nabo ku mwela wabo, co bakunjibo ya Isalele bakabapwisa bangamba ba banalume na ba banakazi mu lifuti lya Yehova. Co bakafungulula baje babafungulwile, na kuyula baje bakele na kubasindiya kupanga.*
3 Ha litangwa olyo, Yehova mwakamihwimisa ku byuma bije byakele na kumizibisa kubabala na kuminenela bukalu na ku bundungo bwa kumisindiya,
4 mukatela mwene wa Babiloni eci cisimo* ngweni:
“Uje wakele na kusindiya bakwabo kupanga* nanyongo.
Kulyatelela kwendi kunahu.
5 Yehova napokola mbweti ya banu bababi,Napokola mulamu wa baka-kuyula,
6 Napokola uje natwalelelaho kupupa miyati ya banu mafaindi mu kulubala,Uje ali na kuyula baka-mafuti na butenu na kutwalelelaho kubayandesa.
7 Lifuti-libu lyoshe lili mu kwoloka, kukwesi bimpindangano.
Banu bali na kutambeka mu kubwahelela.
8 Miti ya junipa nayo inabwahelela mwafwa ya byuma binalingiwa kuli yobe,Hamolika na miti ya sida ya ku Lebanoni.
Ili na kwendeka ngwayo, ‘Kutunda habakunyongeselele,Kukwesi muka-kuteta miti naija na kututeta.’
9 Cihilo* naco calibwaheselaKuliwana nobe muwija.
Mwafwa yobe, cinendula baje banatsi,Cinendula bantwama ba kukenyuka ba ha lifuti-libu.
Cilingisa bimyene boshe ba baka-mafuti bakatuke ha matanda abo.
10 Boshe bakuleka ngwabo,‘Nobe unazeye ngeci mwetu ndi?
Nobe unalifu netu ndi?
11 Kulyalesa kwobe kunasikumuka mu Cihilo,*Cilumo ca bisanzi byobe bya mikole cinasikumuka.
Mabuno banajalakana kwisi yobe ngwe mwela,Co ndulo inapu ngwe nanga yobe ya kulifwika.’
12 Unau kutunda mwilu,Obe ngongonosi ya mutondo ya kubyakula.
Banakuwisila hasi,Yobe wakele na kufungulula baka-mafuti.
13 Walyendekesele mu mbunge yobe ngwobe, ‘Njikanduka mwilu.
Njijundwila litanda lyange helu lya bingongonosi bya Njambi,Co njitumama ha munkinda wa kulikungulwila,Mu myela ya ku kunto* ya kulako manene.
14 Njikanduka helu lya mashelwaNjipwa ngwe Wahakamwa Manene.’
15 Oloni bakusikumwisa mu Cihilo,*Ha masima a bwina.
16 Baje bakumona bakuyongola,Bakutalesesa na kwendeka ngwabo,‘Kuma keti ikeye wakele na kuningangesa lifuti-libu ou,Uje wakele na kulingisa bumwene bujaje,
17 Uje walingisile lifuti-libu lipwe ngwe mamboNa kufungulula binganda byalyo,Uje wabyanene kupatula mapanditi beluke kwimbo lyabo ndi?’
18 Bimyene bakwabo boshe ba baka-mafuti,Eyo, bimyene bakwabo boshe, banalala mu bumpau,Umo na umo wabo ali mu mbumbo* yendi.
19 Oloni yobe banakumbila kuti kwa kujeneka kukutsinda,Ngwe munango uje ubanaseze mwangoco,Banakufwiki bibimbi bya baje babanatubu na mukwale,Baje basikumuka mu bwina bwa mamanya,Co unapu ngwe cibimbi cibali na kulyatangela.
20 Kubakakutsindi hamo nabo,Mwafwa wabiisile lifuti lyobe,Watsiile banu bobe.
Mazina a bana ba banu baje bakalingi byuma byabibi kubakawatumbula lalo.
21 Bwaheseni mwela wa kutsiila bana bendiMwafwa ya bubi bwa bakukulwila babo,Mangana keti bemane na kufungulula lifuti-libuNa kulingisa lifuti lishule na binganda byabo.”
22 Yehova wa maswalale nendeka ngwendi: “Njibakatukila na kubalwisa.
Na kuzimangana lizina lyabo mu Babiloni na kunyongesa baje banasalaho, na batekulwila babo, na bisemwa bija kulutwe.” Mukemwo mwanendeka Yehova.
23 Yehova wa maswalale nendeka ngwendi: “Njikailingisa ipwe mwela wa biningi na mwela wa mandoba. Co njikaikomba na lukombo lwa kunyongesa.”
24 Yehova wa maswalale nalisingi ngwendi:
“Byuma binjinayongola, bikebyo bikalingiwa,Co byuma binjinangula kulinga, bikalingiwa bene.
25 Njikatika muka-Asiria mu lifuti lyange,Na kumulyatangela ha minkinda yange.
Njikatundisa joko yendi hali bakebo,Na kutundisa citele cendi ha bitsili byabo.”
26 Ebi bikebyo byanangula kulinga ha lifuti-libu hoshe,Co eli likelyo liboko lyendi lyanolwela* baka-mafuti boshe.
27 Mwafwa Yehova wa maswalale nayongola kulinga ngoco.
Iya asa kwonowesa biyongola byendi?
Nolola liboko lyendi.
Iya asa kulyeteka?
28 Mu mwaka watsile mwene Ahazi, batambekele ou muzimbu ngwabo:
29 Keti ubwahelele, obe Filistiya, nambe woshe wakala muli yobe,Mwafwa ya mulamu wa uje nakala na kukupupa ubanapokola.
Mwafwa ha cikota* ca linyoka hakatunda linyoka wa bushungu,Co munendi akapwa linyoka wa tuhya wa kupulula.*
30 Bantwatwa ba banu ba kwisi bakalya na kukuta,Co tuhutu bakalala mu kwoloka,Oloni njikatsiya bana bobe* na njala,Co baje bakasalaho bakabatsiya.
31 Mbolozoka, obe cikolo. Tetubuka, obe nganda.
Banu boshe bakala muli yobe, obe Filistiya, bakalijujukila.
Mwafwa citozi ali na kwija ngwe bwisi kutunda ku kunto,*Co ha cibunga cendi ca maswalale, naumo wahi asala munima.”
32 Banapande kukumbulula bati tutumwa ba baka-mafuti?*
Babakumbulule ngwabo Yehova najala lubula lwa Siyone,Co banu bendi ba kwisi batewelamo.
Majwi a kwinikila
^ Nambe “Abalingisa bahwime.”
^ Nambe “baka-kubapangesa.”
^ Nambe “mukashendumuna mwene wa Babiloni.”
^ Nambe “muka-kupangesa bakwabo.”
^ Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa.
^ Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa.
^ Nambe “ku north.”
^ Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa.
^ Lijwi na lijwi “njibo.”
^ Nambe “lyanalibwahesela kupupisa.”
^ Lijwi na lijwi “muzi.”
^ Nambe “linyoka wa lumbisi wa bushungu.”
^ Lijwi na lijwi “muzi wobe.”
^ Nambe “ku north.”
^ Lijwi na lijwi “lifuti.”
