Isaya 16:1-14
-
Muzimbu wa kusompa Mowabi utwalelelaho (1-14)
16 Tumeni manga wa nkomba kuli mwene wa lifuti,Mutundiseni ku Sela, mumwitise mu mambo,Mumutwale ku munkinda wa muna Siyone wa munakazi.
2 Ku myaba ya Anoni, bana ba Mowabi ba banakaziBakapwa ngwe kazila ibanasheke mu lishwa lyendi.
3 “Tumbeni butumbe, lingeni bimunangula.
Munzinzime weni upwiseni ngwe butsiki okuni mutanya-mwelu.
Shwekeni baje babanashandola, co keti mwende bungungu baje bali na kutewa.
4 Banu bange babanashandola bakale muli yobe, obe Mowabi.
Pwa mwela mubabanda mubatewa muka-kunyongesa.
Muka-kulyatelela bakwabo akanyonga.
Kubiisa byuma kukahwa,Co baje bali na kulyatangela bakwabo bakanyonga ha lifuti-libu.
5 Co litanda bakalizameka na cizemo cije kucesi kutenguluka.
Uje akatumama ha litanda mu tenti ya Devidi akapwa wa kulongwa,Akasompa mwamubwa banu na kwakula mu kusungama bwasi-bwasi.”
6 Tunazibi bya kulyalesa kwa Mowabi, wapwa wa kulyalesa manene.
Tunazibi bya kulijundula kwendi na kulyalesa kwendi na butenu bwendi,Oloni byendeka byendi bya kulishasha bikapwa byangoco.
7 Ngeci, Mowabi akambolozoka mwafwa ya byuma bikamwizila,Banu boshe bakambolozoka.
Baje babanapupu, bakalilila makende a bushuka bwa binyu bwa kuma a ku Kile-halesethi.
8 Mwafwa mahya a mu Heshiboni anajujwama.
Miti ya binyu ya mu Sibma nayo inajujwama.
Baka-kuyula mafuti banalyatangela minango yayo ije yakoyokele bushuka bwa binyu.
Yetele na ku Jaze,Yaketele na mu mambo.
Minango yayo ije yajobelelele, yajalakanene kuketa na ku kalunga-ndonga.
9 Ngeci, njikalila muti wa binyu wa Sibma ngwe munjikalilila Jaze.
Mukajabama mu misozi yange, obe Heshiboni na Eleyale,Mwafwa kukuwa kumwakele na kukuwa mumwakele na kuteja bushuka bweni bwa ntondwe na bimbuto byeni kunahu.*
10 Kubwahelela na kulisamba banabitundisa mu lihya lya miti ya bushuka,Co kukwesi myaso ya kubwahelela na kukuwa mu mahya a miti ya binyu.
Muka-kutika binyu nalikele kutika binyu mu bitikilo bya binyu,Mwafwa njinalingisa banu balikele kukuwa.
11 Mukemwo bilyo byange bya mukati bili na kujaja mwafwa ya Mowabi,Bili na kujaja ngwe mikole ya kalyalya,Co bilyo byange bya mukati bili na kujaja mwafwa ya Kile-halesethi.
12 Nameme Mowabi alikwisa kukanduka ku mwela wa kulunduka na kuya ku mwela wendi wa kujela na kulombela, alisina ngoco.
13 Awa akewo majwi endekele Yehova kunima kutalesa kuli Mowabi.
14 Co hano Yehova nendeka ngwendi: “Mu myaka itatu lika, ngeci mwa myaka ya muka-kupanga wa kukumuna,* bumpau bwa Mowabi bukahwa mwafwa ya bimpindangano bya kuliseza-seza, co baje bakasalako bakapwa babandondo manene na kujeneka seho.”
Majwi a kwinikila
^ Nambe hamo “Mwafwa miteto ya mu nzita inawila ha bushuka bweni bwa ntondwe na bimbuto byeni.”
^ Nambe “ibanatanda mwamubwa ngwe mwakatandela muka-kupanga wa kukumuna”; kulumbununa, myaka itatu bene.
