Isaya 19:1-25
19 Ou ukewo muzimbu wa kusompa Ijipiti:
Taleni, Yehova nalondo ha lishelwa lya lumbisi, co ali na kwija mu Ijipiti.
Binjambi ba Ijipiti ba kujeneka seho bajaja ku mesho endi,Co bimbunge bya banu ba mu Ijipiti bilijujukila.
2 “Njikalingisa baka-Ijipiti batengulukile bakwabo baka-Ijipiti,Co bakalilwisa umo na mukwabo.
Umo na umo wabo akalwisa ndolome yendi na munu yatunga nendi.
Nganda ikalwisa nganda ikwabo, bumwene bukalwisa bumwene bukwabo.
3 Co baka-Ijipiti bakakala mu citanga,Njikatanganesa matumbe abo.
Bakakulahela binjambi babo ba kujeneka sehoNa kuya kuli baka-kushasheya, na baka-kwendeka na bakulu, na baka-kumikiya.
4 Njikaka baka-Ijipiti mu liboko lya shukulu wa kuminina mbunge,Co mwene wamukalu akabayula.” Mukemwo mwanendeka Mwata wa busunga, Yehova wa maswalale.
5 Mema a mu kalunga-ndonga bakawomisa,Co ndonga ikoma cau.
6 Bindonga bikanika,Mema a mu tupila twa Nailo ya mu Ijipiti akatepuluka na kuma cau.
Mahongo na matebe bikabola.
7 Bimena byoshe bili ku ndonga ya Nailo, ku shango ya Nailo,Na bimbuto bibanakunu mu libu kumukulo wa Nailo, bikoma cau.
Bikapekumuka, co kubikakalako lalo.
8 Co baka-kuta bisi bakaziba busiwa,Baje bakalobela bisi mu Nailo bakalila,Co baje bakate manda abo mu ndonga bakatepuluka.
9 Baje bakapanga bizalo ha fulakisi* ya kusakulaNa baje bakatungila bizalo ha fremu ya kutungila, bakaziba shwamwa.
10 Baka-kutonga bendi bakabatika,Baka-kupanga bendi ba kukumuna boshe bakaziba busiwa.
11 Bamyata ba mu Zoani banapu bilema.
Baka-kunangula ba Falo ba mana bali na kwana binangulo bya kujeneka seho.
Wasa kuleka bati Falo ngwobe:
“Nji mutekulwila wa baka-mana,Nji mutekulwila wa bimyene ba kusañulu”?
12 Banu bobe ba mana bali kuli?
Bakuleke nga bazibuka byanayongola kulinga Yehova wa maswalale kuli Ijipiti.
13 Bamyata ba mu Zoani banalingi bya bulema,Bamyata ba mu Nofu* banabakwisi,Bantwama ba miyati ya banu ba mu Ijipiti banongumuna Ijipiti.
14 Yehova natanganesa Ijipiti,Co bantwama banongumuna Ijipiti mu byuma byoshe biikalingi,Inapu ngwe muka-kupenda uje ali na kulyalanga mu bishanjo byendi.
15 Co mu Ijipiti kumukala bipangi bya kupanga,Ipwe bipangi byanasa kupanga munu wakama nambe wamundondo,* munu wa bulemu nambe wa kwisi.*
16 Ha litangwa olyo, Ijipiti akapwa ngwe banakazi, akajaja na kuziba lyoba mwafwa ya liboko lya Yehova wa maswalale lya kutewesa lyanamwolwela.
17 Co lifuti lya Juda likazibisa baka-Ijipiti lyoba. Bakalijujukila mubakaziba bya lifuti lya Juda mwafwa ya byuma byanayongola kulinga Yehova kuli bakebo.
18 Ha litangwa olyo, mu lifuti lya Ijipiti mukakala binganda bitanu bije bikendeka ndaka ya ku Kanana, co bikalisinga ngwabyo bipwa bya kulongwa kuli Yehova wa maswalale. Nganda imo bakaisana ngwabo Nganda ya Kunyongesa.
19 Ha litangwa olyo, kukakala mutula ubakatungila Yehova hakati ka lifuti lya Ijipiti, na ngunzi ibakashimbikila Yehova ha nginga yalyo.
20 Bikapwa cizibukiso na bukaleho kuli Yehova wa maswalale mu lifuti lya Ijipiti, mwafwa bakatambeka kuli Yehova mwafwa ya baka-kubalyatelela, co akabatumina mwobole wakama uje akabobola.
21 Yehova akalisholola kuli baka-Ijipiti, co baka-Ijipiti bakazibuka Yehova ha litangwa olyo, co bakana mulambu na bwana na kulikumiiya kuli Yehova na kulinga bibanalikumiiya.
22 Yehova akapupa baka-Ijipiti, akabapupa na kubakangwisa, co bakeluka kuli Yehova, co akataba kulambelela kwabo na kubakangwisa.
23 Ha litangwa olyo, kukakala tapalo itunda mu Ijipiti kuya ku Asiria. Co baka-Asiria bakaija mu Ijipiti, baka-Ijipiti nabo bakaya mu Asiria, co baka-Ijipiti bakapangela Njambi hamo na baka-Asiria.
24 Ha litangwa olyo, Isalele akapwa wamucitatu, akalikwatasana na Ijipiti na Asiria, co akapwa cibezikiso ha lifuti-libu,
25 mwafwa Yehova wa maswalale akababezikisa ngwendi: “Banu bange baka-Ijipiti babezike, na baka-Asiria baje banapu bipangi bya maboko ange, na baIsalele baje banapu buswana bwange.”
Majwi a kwinikila
^ Mbuto ibanalimi kushwa kusañulu mangana bapangeho bizalo bya lineni.
^ Nambe “Memufisi.”
^ Lijwi na lijwi, “mutwe na mukila.”
^ Lijwi na lijwi “munango nambe litebe”; Nambe hamo “munango wa mashakabale nambe lihongo.”
