Isaya 20:1-6
-
Cizibukiso ca byuma bikalingiwa ku Ijipiti na Ithopia. (1-6)
20 Mu mwaka waile Tatani* ku Ashidodi mwamutumine Mwene Sagoni wa Asiria, wakalwisile Ashidodi na kuifungulula.
2 Ha simbu ije, Yehova wendekele kwitila muli Isaya muna Amozi ngwendi: “Ya ukashulule cikeleya mu mbunda yobe na kushulula masanda ku mendi obe.” Co walingile ngoco. Wendele mutotototo* na mendi-mendi.
3 Co Yehova wendekele ngwendi: “Ngamba yange Isaya nende mutotototo na mendi-mendi ha myaka itatu mangana cipwe cizibukiso na cimweso ca byuma bikalingiwa ku Ijipiti na Ithopia.
4 Ngeci, na mwene wa Asiria akatwamenena banu banafungulula mu Ijipiti na mu Ithopia kubatwala mu bufunge, bakwenje na banalume oku bali na kwenda mutotototo na mendi-mendi na matako-tako, mangana azibise Ijipiti shwamwa.
5 Co bakaziba lyoba na shwamwa mwafwa ya Ithopia ibakulahelele na Ijipiti ibakele na kulyalesela.*
6 Ha litangwa olyo, banu batunga oku kumukulo wa kalunga-ndonga bakendeka ngwabo: ‘Taleni binalingiwa ku lifuti litwakulahelele, kuje kutwakele na kutewela mangana batukwase na kutwamena kuli mwene wa Asiria. Iyoni atwamena?’”
Majwi a kwinikila
^ Nambe “kapitau.”
^ Nambe “oku kazalele bwino.”
^ Nambe “ibashungwiiye mwafwa ya bubwa bwendi.”
