Isaya 21:1-17
21 Ou ukewo muzimbu wa kusompa mambo ya kalunga-ndonga:*
Bukalu buli na kwija ngwe lihunzi lyakama lije lihuwila ku mbwela,*Lije litunda mu mambo, mu lifuti lya kutewesa.
2 Bananjimwesa cimona ca kutewesa:
Muka-makuli ali na kukwisa,Co muka-kunyongesa ali na kunyongesa.
Kanduka, obe Elamu! Zengeleka nganda, obe Mede!
Njikamanesa binyengo byoshe biinanene.*
3 Mukemwo njili na kuziba manene kubabala.*
Njili na kulitunyaNgwe munakazi uje ali na kupapa.
Njinashoto manene mbunge, co kunjesi na kuziba,Njili mu citanga, co kunjesi na kumona.
4 Mbunge yange inalijakamena, njinalijujukila mwafwa ya lyoba.
Kulahuka kwa litangwa kunjinashungwiiye kuli na kunjizibisa lyoba.
5 Bwaheseni mesa na kubwahesa bitwamo!
Lyeni na kunwa!
Katukeni, eni bamyata, bwabeseni ntelo!*
6 Mwafwa Yehova wanjilekele ngwendi:
“Ya ukake muka-kunyunga mangana akuleke byoshe byamona.”
7 Co wamwene litemba lya nzita libali na kukoka tubalu,Litemba lya nzita libali na kukoka bidonki,*Litemba lya nzita libali na kukoka tumele.
Watalesesele mwamubwa na kwakako manene mbunge.
8 Co watambekele na lijwi lyakama ngwe ndumba abuluma, ngwendi:
“Obe Yehova, njinatwalelelaho kwimana ha kaposhi ka kukengela mutanya na mutanya,Na kutwalelelaho kwimana ha mwela wange wa kunyungila butsiki na butsiki.
9 Tala bili na kwija:
Kuli na kwija banu banalondo mu litemba lya nzita libali na kukoka tubalu!”
Co wendekele mu kutambeka ngwendi:
“Nau! Babiloni nau!
Tumponya ba kushonga boshe ba binjambi bendi banabatikila hasi!”
10 Eni banu bange babanajungula,Yeni mutunda mu lijungwilo lyange,Njinamileke binjinazibi kuli Yehova wa maswalale, Njambi ya Isalele.
11 Ou ukewo muzimbu wa kusompa Duma:*
Kuli munu ali na kutambeka kuli yange kutundilila ku Seya ngwendi:
“Obe muka-kunyunga, kunasala simbu ya kupwa hali mangana kukye?
Obe muka-kunyunga, kunasala simbu ya kupwa hali mangana kukye?”
12 Muka-kunyunga ngwendi:
“Mutondo uli na kwija, butsiki nabwo buli na kwija.
Nga mushaka kwihula, ihuleni.
Ijeni lalo.”
13 Ou ukewo muzimbu wa kusompa mambo:
Mu shwata, mu mambo, mukemwo mumukalalela butsiki,Eni byendo bya banu ba ku Dedani.
14 Eni mwatunga mu lifuti lya Tema,Neneleni mema baje banatsi lihwila,Neneleni byakulya baje bali na kutewa.
15 Mwafwa banatewe mikwale, banatewe mukwale ubanashomona mu cindalo,Banatewe buta bwa lusipa bubananana, banatewe nzita yakama manene.
16 Mwafwa Yehova nanjileke ngwendi: “Bumpau bwoshe bwa Keda bukahwa mu mwaka umolika ngwe simbu yapanga muka-kupanga wa kukumuna.
17 Banalume ba nzili ba mu Keda baje bakalu na mata a lusipa bakakeha manene, mwafwa omu mukemwo mwanendeka Yehova Njambi ya Isalele.”
Majwi a kwinikila
^ Hamo kulumbununa mutambela wa Babilonia ya kusañulu.
^ Nambe “ku south.”
^ Cisholoka kulumbununa Babiloni.
^ Lijwi na lijwi “bintungi byange bili na kuziba manene kubabala.”
^ Nambe “kwiteni ntelo mazi.”
^ Nambe “bimulu.”
^ Kulumbununa “Kwoloka Kulu.”
