Isaya 22:1-25
22 Ou ukewo muzimbu wa kusompa Cinema ca Cimona:*
Bika binamilingisa mubaboshe mulonde ha biluli?
2 Obe nganda ya liwayanga na mbongi ya kulisamba,Wakele manene na lwozi.
Banu bobe baje batsile, kubatsile na mukwale,Nambe kutsa mu nzita.
3 Boshe baje bakele na kukuyula mu bukenya banatewe.
Banabatwala mu bundungo kwa kujeneka kupangesa buta bwa lusipa.
Boshe babanawana banabatwala mu bundungo,Nameme banatewela kulako.
4 Mukemwo njinendekele ngwange: “Keti unjitale,Njecele njilile manene.
Keti ukakateye kunjizembelekaMwafwa ya banu bange bananyongo.
5 Mwafwa Mwata Wahakamwa ya Byoshe, Yehova wa maswalale,Nanene litangwa lya bitanga na kufungulula na kulijujukila,Mu Cinema ca Cimona.
Bali na kupujula cibumbe,Co baje bali ku munkinda bali na kuziba miteto.
6 Elamu ambata ngonga ya mikili.*
Ali na matemba a nzita na tubalu,*Co Kile nashomona* laja ntelo.
7 Binema byobe byabibwa maneneBikashula matemba a nzita,Co tubalu* bakemana ha cikolo,
8 Co cije cikanyungilila Juda bakacitundisako.
“Ha litangwa olyo mukatala kuje kubakanyungila bitwa mu Njibo ya mu Shwata,
9 co mukamona bimbengwa byabingi bya nganda ya Devidi. Co mukakungulula mema mu kalishali ka ku cikulo.
10 Mukatanda binjibo bya mu Jelusalema, na kusiula binjibo mangana mukanyamese cibumbe.
11 Mukabwahesa lilonga mukati ka bibumbe bibali mumukanyungila mema a mu kalishali ka laja, oloni kumukatala kuli Muka-kutanga Wakama uje wabyakeleko, co kumukamono uje wayongwele ngoco kusañulu.
12 Ha litangwa olyo Mwata Wahakamwa ya Byoshe, Yehova wa maswalale,Akashika banu ngwendi balile na kuziba busiwa,Akabashika ngwendi batehule ku mitwe yabo na kuzala bikeleya.
13 Nameme ngoco, bali na kubwahelela na kulisamba,Bali na kutsiya bingombe na kutsiya bimanga,Bali na kulya situ na kunwa binyu,Na kwendeka ngwabo, ‘Tulyeni na kunwa mwafwa imene tutsa.’”
14 Ngeci Yehova wa maswalale wanjilekele ngwendi: “‘Ou mulonga kubaukonekela kweta noho hamukatsila,’ ngwendi Mwata Wahakamwa ya Byoshe, Yehova wa maswalale.”
15 Ebi bikebyo byanendeka Mwata Wahakamwa ya Byoshe, Yehova wa maswalale, ngwendi: “Ya kuli Shebina, muka-kutwamenena njibo ya mwene, ukamuleke ngwobe,
16 ‘Bika biutonda kuno? Iya wobe wakala kuno, mangana ulicakwile mbumbo kuno?’ Ali na kulicakwila mbumbo mu mwela wa kulunduka, ali na kucakula mwela wendi wa kuhwimina mu limanya.
17 ‘Tala! Yehova akakundamwina hasi, obe munu, akakukwata na nzili.
18 Akakubunga-bunga na nzili na kukumbila ngwe bola ha lifuti lyakama. Hakeho haukatsila, co matemba obe a bumpau hakeho hawakakala. Eci cikashawisa bakunjibo ya shukulu yobe.
19 Co njikakutundisa ha citwamo cobe na kukutundisa ha cipangi cobe.
20 “‘Ha litangwa olyo, njikasana ngamba yange Eliakimu muna Hilikiya.
21 Njikamuzika mukanjo wobe na kumukuta mwiba wobe, na kwaka moko yobe mu liboko lyendi. Co akapwa ishe ya baje batunga mu Jelusalema na bakunjibo ya Juda.
22 Njikaka masapi a ku njibo ya Devidi ha citsili cendi. Akashokolola, co naumo wahi akashoka, co akashoka, co naumo wahi akashokolola.
23 Njikamupameya ngwe mbambo ya citi ibanapameya manene, co akapwa ngwe litanda lya bumpau ku njibo ya ishe.
24 Hali ikeye bakashukikaho bumpau bwoshe bwa ku njibo ya ishe, kulumbununa batekulwila na bana, na bikwata byoshe byabindondo, na bikwata bya malonga, hamolika na binjaba byoshe byakama.’”
25 Yehova wa maswalale ngwendi: “‘Ha litangwa olyo, mbambo ya citi ibanapameya manene bakaishomona na kuiteta, co ikawa. Co citele cije cinazameneneneho cikawa na kubihya, mwafwa Yehova ikeye nendekamo.’”
Majwi a kwinikila
^ Hamo kutalesa ku Jelusalema.
^ Nambe “ambata lyumato.”
^ Nambe “baka-kulonda tubalu.”
^ Nambe “nabwahesa.”
^ Nambe “baka-kulonda tubalu.”
